Yesu Agaruka omu Iguru

Yesu akatangatangana abakurasi be omu Galiraya kandi yabaha ekiragiro kinu ekikuru: ‘Mugende, muhindule amahanga goona abegeswa. Mubegese byona ebimbegeseze kandi mubabatize.’ Kandi akabaraganiza ati: ‘Mwikale nimwijuka ngu ndi hamu nainywe.’

Yesu obuyahumbuukire, akamara ebiro 40 n’abonekera abegeswa be baingi omu Galiraya n’omu Yerusalemu. Akabegesa ebintu ebikuru kandi yakora eby’amahano bingi. Hanyuma Yesu akongera yatangatangana n’abakwenda be ha Rusozi Zaituni. Akabagambira ati: ‘Mutaruga omu Yerusalemu. Mwikale mulindiriire Ise nyowe ekiyaraganiize.’

Abakwenda be batetegereze Yesu eky’akaba namanyisa. Bamukaguza bati: ‘Nogenda kufooka hati Mukama wa Isareri?’ Yesu akabagarukamu ati: ‘Obwire bwa Yahwe obw’okunfoora Mukama tibukahikire. Muli haihi kutunga omwoyo ogurukwera kandi nimwija kuba bakaiso bange. Mugende mutebeze omu Yerusalemu, Yuda, Samaliya, hamu n’ebicweka ebindi omu nsi yoona.’

Hanyuma, Yesu akatwarwa omu mwanya kandi ekicu kyamusereka. Abegeswa be bakaikara nibarora omu iguru baitu akaba amazire kugenda.

Abegeswa bakaruga ha Rusozi Zaituni bagaruka Yerusalemu. Baso’rokanaga hamu buli kiro omu kisiika kandi basabaga. Bakaba balinzire Yesu kubaha oburagirizi obundi.