Abegeswa ba Yesu Batunga Omwoyo Ogurukwera

Hanyuma y’ebiro ikumi Yesu agarukire omu iguru, abegeswa be bakatunga omwoyo ogurukwera. Kikaba kiro kya Pentekoti 33 C.E., kandi abantu baingi bakaba baizire Yerusalemu kujaguza kuruga omu biikaro bingi. Omu kisiika ekya haiguru eky’enju, haali harumu abegeswa nka 120. Aho n’aho, hakabaho eky’okuhuniriza eky’amaani. Ekintu ekiri nk’orulimi rw’omurro kikaija ha mutwe gwa buli mwegeswa kandi batandika kubaza omu ndimi nyingi ezirukwahukana. Bakahurra okuhirra okw’amaani nk’okw’omuyaga omu nju ei bakaba barumu.

Abagenyi abakaba baizire Yerusalemu kuruga omu biikaro ebindi bakahurra iraka linu baija nibairuka kurora kiki ekikaba kiri omu nju. Bakahunirra muno obu bahuliire abegeswa nibabaza omu ndimi nyingi ezirukwahukana. Hanyuma bakagamba bati: ‘Baitu abantu banu kanibaruga Galiraya. Hati, nibasobora bata kubaza omu rulimi rwaitu?’

Hanyuma, Petero n’abakwenda abandi bakaija omu maiso g’abantu. Petero akagambira abantu nk’oku baisire Yesu kandi nk’oku Yahwe akaba amuhumbwire kuruga omu bafu. Petero akabagambira ati: ‘Yesu hati ali omu iguru ha mukuno gwa Ruhanga ogw’obulyo kandi atuhaire omwoyo ogurukwera. Enu niyo ensonga habwaki muboine kandi mwahurra eby’amahano binu.’

Abantu bakakwatwaho muno habw’ebigambo ebi Petero yabalize kandi bamukaguza bati: ‘Hati, kiki ekitusemeriire kukora?’ Akabagarukamu ati: ‘Mwegarukemu ebibi byanyu kandi mubatizibwe omu ibara lya Yesu. Kandi nimwija n’okutunga ekisembo eky’omwoyo ogurukwera.’ Ha kiro eki kyonyini, abantu 3,000 bakabatizibwa. Kwiha obu, abegeswa bakatandika kuba baingi omu Yerusalemu. Omwoyo ogurukwera gukakonyera abakwenda kutandikaho ebitebe bingi nukwo basobole kwegesa abegeswa byona Yesu ebyakaba abegeseze.