ISOMO 05
Baibuli Butumwa bwa Ruhanga Hali Itwe
Yahwe akatuha Baibuli. Baibuli kisembo kirungi muno ekirumu ebitabu 66. Baitu n’osobora kwekaguza: ‘Baibuli ekaruga nkaha? Noha yagihandiikisize?’ Kusobora kugarukamu ebikaguzo binu, leka tubazeeho omulingo obutumwa obuli omu Baibuli bw’atuhikireho.
1. Abantu obubaraaba nubo bahandiikire Baibuli, habwaki nitugamba ngu ekaruga hali Ruhanga?
Abasaija nka 40 abarukwahukana nubo bahandiikire Baibuli. Ekitabu eky’okubanza kikahandiikwa emyaka nka 3500 enyuma, kandi eky’okumalirra kikahandiikwa emyaka nka 1900 enyuma. Kandi abahandiiki banu bakaba nibaruga omu nyikara ezirukwahukana. Baitu nabwo, ebicweka byona ebya Baibuli nibiikiranganiza. Kinu nikisoboka kita? Habwokuba Ruhanga nuwe y’Ahandiikisize Baibuli. (Soma 1 Abasesalonika 2:13.) Abahandiiki banu batahandiike entekereza zaabo. Oihireho, “bagambaga ebyarugire hali Ruhanga baterekereziibwe omwoyo ogurukwera.”a (2 Petero 1:21) Ruhanga akakozesa omwoyo gwe ogurukwera kuterekereza abasaija banu, rundi kubaletera kuhandiika ebitekerezo bye.—2 Timoseo 3:16.
2. Baibuli n’Esobora kugasira buli omu?
‘Amahanga goona, enganda, endimi, n’abantu’ nibasobora kugasirwa omu makuru amarungi agali omu Baibuli. (Soma Okusuku’rwa 14:6.) Ruhanga akakora kyona ekirukusoboka kurora ngu Baibuli yateekwa omu ndimi ezindi kukira ekitabu ekindi kyona omu byafaayo. Haihi buli muntu wena n’asobora kutunga Baibuli. Kinu nikisoboka hoona nambere abantu barukwikara rundi omu rulimi orubakubaza.
3. Yahwe alinzire ata Baibuli?
Baibuli ekahandiikwa ha bintu ebirukusisikara bwangu, nk’empu hamu n’ebijuza. Baitu abasaija abagonzaaga Baibuli baikaraga nibagikoporra n’engaro nibagiteeka ha bintu ebihyaka. N’obukiraaba ngu abantu ab’amaani bakalengaho kuhwerekereza Baibuli, abandi bakateeka obwomeezi bwabo omu kabi kusobora kugirinda. Yahwe taikiriize muntu wena rundi ekintu kyona kumutanga kutuhikyaho obutumwa bwe. Baibuli n’egamba eti: “Ekigambo kya Ruhanga waitu kirigumaho ebiro nebiro.”—Isaya 40:8.
YEGA EBIRUKUKIRAHO
Yega bingi ha mulingo Ruhanga yaterekeriize abantu kuhandiika Baibuli, omulingo y’agirinziremu, hamu n’omulingo y’asobozeseze abantu kugitunga.
4. Baibuli n’eyoleka Ayagihandiikisize
Mutekeho VIDIYO. Hanyuma musome 2 Timoseo 3:16, kandi mubazeeho ebikaguzo ebirukuhonderaho.
Abantu obubaraaba nubo bahandiikire Baibuli, habwaki n’eyetwa Ekigambo kya Ruhanga?
Notekereza ky’amagezi kwikiriza ngu Ruhanga akaba n’asobora kuhikyaho abantu abahandiikire Baibuli ebitekerezo bye?
Omuhandiiki n’asobora kuhandiika ebbaruha, baitu obutumwa bw’ogu arukumugambira eky’asemeriire kuhandiika. Omu mulingo nugwo gumu, abantu nubo bahandiikire Baibuli, baitu obutumwa bwayo bukaruga hali Ruhanga
5. Baibuli ekakira okuhwerekerezebwa
Baibuli obweraaba n’eruga hali Ruhanga, nituba nitumunihira kugirinda. Ebyafaayo nibyoleka ngu abantu ab’amaani balengereho kuhwerekereza Baibuli. Abebembezi b’amadiini bakaba batarukugonza abantu basome Baibuli. Abantu baingi bakateeka obwomeezi bwabo omu kabi kusobora kulinda Baibuli n’obukiraaba ngu bakahakanizibwa kandi baatiinisirizibwa kwitwa. Kusobora kumanya omu h’abantu banu, mutekeho VIDIYO, hanyuma mubazeeho ebikaguzo ebirukuhonderaho.
Kumanya omulingo abantu bayehaireyo kusobora kulinda Baibuli, nikikuletera kugonza kugisoma? Habwaki?
Musome Zabuli 119:97, hanyuma mubazeeho ekikaguzo kinu:
Kiki ekyaletiire abantu baingi kuteeka obwomeezi bwabo omu kabi kusobora kuhindura Baibuli omu ndimi ezindi hamu n’okugigaba?
6. Ekitabu eky’abantu boona
Omu byafaayo, Baibuli nikyo ekitabu ekikyakizireyo kuhindurwa omu ndimi nyingi hamu n’okugabwa. Musome Engeso Ezabakwenda 10:34, 35, hanyuma mubazeeho ebikaguzo binu:
Habwaki Ruhanga n’agonza Ekigambo kye kihindurwe omu ndimi nyingi kandi kigabwe?
Kiki eky’okira kugonza ha Baibuli?
Haihi
abantu boona
omu nsi
nibasobora kutunga Baibuli omu rulimi orubakwetegereza
Eri omu ndimi
ezirukuhingura
3,000
omu bwijwire rundi ekicweka kyayo
5,000,000,000
Omuhendo gwa Baibuli ezirukuteberezebwa kuba zakaturukibwa,
kukira ekitabu ekindi kyona
ABANTU ABAMU BAGAMBA: “Baibuli kitabu ekyakara ekyahandiikirwe abantu.”
Iwe notekereza ki?
Bwakaiso ki oburukwoleka ngu Baibuli Kigambo kya Ruhanga?
OYEGERE KI?
Baibuli Kigambo kya Ruhanga, kandi akozere kyona ekirukusoboka kurora abantu boona bagitunga.
Kweijukyamu
Tumanyisa ki obutugamba ngu Ruhanga akaterekereza abantu kuhandiika Baibuli?
Kiki ekirukukira kukukwataho ha mulingo Baibuli erinzirwemu, endimi ez’ehindwirwemu, n’obwingi bwayo omu nsi yoona?
N’oyehurra ota habw’okukimanya ngu Ruhanga ayekambire muno kusobora kukuhikyaho obutumwa bwe?
SERULIIRIZA
Soma ebyafaayo ebirukukwata ha Baibuli—kutandikira ha bihandiiko eby’okubanza ebya kara kuhika ha mpindura eza kasumi kanu.
Yega omulingo Baibuli esoboire kwikaraho n’obukiraaba ngu hali haroho ebintu bisatu ebyali nibisobora kugihwerekereza.
“Baibuli—Omulingo Esoboire Kwikaraho” (Watchtower No. 4 2016)
Rora omulingo abantu abandi baataire obwomeezi bwabo omu kabi kusobora kuhindura Baibuli omu ndimi ezindi.
Emirundi nyingi, Baibuli ekakopororwa kandi yahindurwa omu ndimi ezindi. Nitusobora tuta kukigumya ngu obutumwa bwayo butahindurwe?
“Baibuli Ekafurungurwa Rundi Bakagicupura?” (Ekicweka kinu kiri ha mukura)