ISOMO 08
Nosobora Kufooka Munywani wa Yahwe
Yahwe n’agonza omumanye kurungi. Habwaki? N’anihira ngu obuturayeyongera kumanya emiringo ye kurungi, emihanda ye, hamu n’ekigendererwa kye nitwija kweyongera kugonza kufooka banywani be. Mali n’osobora kufooka munywani wa Ruhanga? (Soma Yakobo 2:23.) Kiki eky’osobora kukora kufooka munywani we? Baibuli egarukamu ebikaguzo ebi kandi n’eyoleka habwaki kufooka munywani wa Yahwe nubwo obunywani oburukukirrayo kimu obw’osobora kutunga.
1. Yahwe n’akuraaliza kukora ki?
“Muirre haihi Ruhanga, nauwe alibairra haihi.” (Yakobo 4:8) Eki nikimanyisa ki? Yahwe n’akuraaliza kufooka munywani we. Abamu nikisobora kubagumira kwikiriza ngu nibasobora kufooka banywani ba Ruhanga, habwokuba tibasobora kumurora. Baitu omu Kigambo kye Baibuli, Yahwe n’atugambira kyona ekiturukwetaaga kumanya hali uwe nukwo tusobole kumwirra haihi. Obutusoma obutumwa bwa Ruhanga obuli omu Baibuli, obunywani bwaitu na uwe bweyongera n’obukiraaba ngu titukamuroraga.
2. Habwaki Yahwe nuwe omunywani ow’arukukirayo ow’osobora kutunga?
Busaho muntu wena arukukugonza kukira Yahwe. N’agonza otunge okusemererwa kandi omusabe buli murundi oyetaaga obukonyezi. N’osobora ‘kumunagira okutuntura kwawe kwona, baitu n’abitaho omutima ebigambo byawe.’ (1 Petero 5:7) Yahwe aikara ayetekaniize kusagika, kuhuumuza n’okuhuliiriza banywani be.—Soma Zabuli 94:18, 19.
3. Yahwe n’agonza tukole ki kusobora kufooka banywani be?
Yahwe n’agonza abantu boona, “baitu ab’amananu abafoora banywani be nfe na nfe.” (Enfumo 3:32, NWT) Yahwe n’agonza banywani be bakole ebintu eby’arora ngu birungi kandi n’okwetantara ebintu eby’arora ngu bibi. Abamu behurra ngu tibasobora kukora ebintu byona Yahwe ebyarukugonza bakole kandi n’okwetantara ebintu byona ebibi. Baitu Yahwe n’ayetegereza. Aikiriza buli omu ow’arukumugonza kuruga ha mutima, kandi anyakwekamba kukora kyona ekirukusoboka kumusemeza.—Zabuli 147:11; Engeso Ezabakwenda 10:34, 35.
YEGA EBIRUKUKIRAHO
Yega ebirukukiraho ha mulingo osobora kufookamu munywani wa Yahwe, kandi omanye ensonga habwaki nuwe munywani ow’arukukirayo ow’osobora kutunga.
4. Iburahimu akaba ali munywani wa Yahwe
Baibuli eby’etugambira hali Iburahimu (kandi ow’ayetwa Iburamu) bitukonyera kumanya ebitusemeriire kukora kusobora kuba banywani ba Ruhanga, hamu n’emigisa banywani be batunga. Musome ebirukukwata hali Iburahimu omu Okubanza 12:1-4. Hanyuma mubazeeho ebikaguzo binu:
Kiki Yahwe ekiyasabire Iburahimu kukora?
Kiki Yahwe ekiyamuraganiize?
Kiki Iburahimu ekiyakozere?
5. Yahwe n’agonza banywani be bakole ki?
Haroho ebintu ebitunihirramu banywani baitu kukora.
Bintu ki ebimu eby’ogonza banywani baawe bakukorre?
Musome 1 Yohana 5:3, hanyuma mubazeeho ekikaguzo kinu:
Yahwe n’agonza banywani be bakole ki?
Kusobora kworobera Yahwe, nikisobora kutwetaagisa kuhindura engeso rundi enyetwaza zaitu. Musome Isaya 48:17, 18, hanyuma mubazeeho ekikaguzo kinu:
Habwaki Yahwe asaba banywani be kukora empindahinduka omu bwomeezi bwabo?
Omunywani omurungi atwijukya ebintu ebisobora kutulinda kandi n’okutugasira. Na Yahwe nikyo akorra banywani be
6. Yahwe eky’akora kukonyera banywani be
Yahwe akonyera banywani be kugumira ebizibu. Mutekeho VIDIYO, hanyuma mubazeeho ekikaguzo kinu.
Yahwe akakonyera ata omukazi ow’orozere omu vidiyo kugumira ebitekerezo ebirukutuntuza hamu n’okuhwamu amaani?
Musome Isaya 41:10, 13, hanyuma mubazeeho ebikaguzo binu:
Yahwe araganiize kukorra ki banywani be boona?
Notekereza Yahwe nasobora kuba omunywani omurungi? Habwaki?
Abanywani nfe na nfe batukonyera obutuba nitwetaaga obukonyezi. Yahwe naiwe naija kukukonyera
7. Kusobora kuba banywani ba Yahwe, tusemeriire kubaza na uwe kandi n’okumuhuliiriza
Obunywani bweyongera kuguma, abanywani obubaikara nibabaza hamu. Musome Zabuli 86:6, 11, hanyuma mubazeeho ebikaguzo binu:
Nitusobora tuta kubaza na Yahwe?
Yahwe abaza naitwe omu mulingo ki?
Tubaza na Yahwe kurabira omu kusaba; uwe abaza naitwe kurabira omu Baibuli
ABANTU ABAMU BAGAMBA: “Tikirukusoboka nakake kufooka banywani ba Ruhanga.”
Kyahandiikirwe ki eky’osobora kukozesa kwoleka ngu nikisoboka kufooka munywani wa Yahwe?
OYEGERE KI?
Yahwe n’agonza kuba munywani wawe, kandi naija kukukonyera kumwirra haihi.
Kweijukyamu
Yahwe akonyera ata banywani be?
Habwaki Yahwe agambira banywani be kukora empindahinduka omu bwomeezi bwabo?
Notekereza Yahwe n’anihira banywani be kukora ebintu ebibatarukusobora? Habwaki?
SERULIIRIZA
Kufooka munywani wa Ruhanga, nikisobora kita kuhindura obwomeezi bwawe?
“Yahwe—Ruhanga Outusemeriire Kumanya” (Watchtower, eya Febwali 15, 2003)
Yega omulingo osobora kufooka munywani wa Ruhanga.
“Ninsobora Nta Kufooka Munywani wa Ruhanga?” (Questions Young People Ask—Answers That Work, Volume 2, esuura 35)
Manya ensonga habwaki omukazi omu n’ayehurra ngu kufooka munywani wa Yahwe kikajuna obwomeezi bwe.
“Nkaba Ntarukugonza Kufa!” (Watchtower No. 1 2017)
Huliiriza ensinganto ebibarukubaza ha mulingo barukwehurramu hali Yahwe.