ISOMO 14
Okuramya Kwaitu Nikusobora Kuta Kusemeza Ruhanga?
Nk’oku turozere omu isomo erihoire, tikiri ngu amadiini goona gasemeza Ruhanga. Baitu, nitusobora kuramya Omuhangi waitu omu mulingo ogurukumusemeza. “Diini” ki erukumusemeza? (Yakobo 1:27) Wetegereze Baibuli ekyerukwegesa.
1. Okuramya kwaitu kusemeriire kusigikirra hali ki?
Okuramya kwaitu kusemeriire kusigikirra ha Baibuli. Yesu akagambira Ruhanga ati: “Ekigambo kyawe nigo mananu.” (Yohana 17:17) Amadiini agamu tigahondera amananu agali omu Kigambo kya Ruhanga Baibuli, ekyaterekereziibwe omwoyo ogurukwera. Omu kiikaro ky’okwegesa ebiri omu Baibuli, geegesa enyegesa z’abantu hamu n’emigenzo. Baitu Yahwe tasemerererwa abo ‘abangira kimu ekiragiro kya Ruhanga.’ (Soma Marako 7:9.) Tusemeza Ruhanga okuramya kwaitu obukusigikirra ha Baibuli, kandi tukahondera obuhabuzi oburumu.
2. Yahwe tusemeriire kumuramya tuta?
Tusemeriire kuramya Yahwe wenka habwokuba nuwe Omuhangi waitu. (Okusuku’rwa 4:11) Kinu nikimanyisa ngu tusemeriire kumugonza kandi turamye uwe wenka, tutarukukozesa ekisisani kyona.—Soma Isaya 42:8.
Okuramya kwaitu kusemeriire kuba ‘okusemiire’ kandi okurukwikirizibwa hali Yahwe. (Abarumi 12:1) Kinu nikimanyisa ngu tusemeriire kworobera ebiragiro bye ebirukukwata ha ngeso. Ekyokurorraho, abo abarukugonza Yahwe, bagonza endengo ze ezirukukwata ha buswere kandi bazihondera. Ekindi, betantara ebikorwa eby’akabi, nk’okunywa etaaba, kukozesa ebibazi ebirukutokooza obwongo, rundi kukozesa kubi amaarwa.a
3. Habwaki tusemeriire kuramya Yahwe tuli n’Abakristaayo bagenzi baitu?
Ensorrokano zaitu eza buli wiiki zituha omugisa ogw’okukugiza Yahwe ‘omu kitebe.’ (Zabuli 111:1, 2) Gumu ha miringo tukikoramu nukwo kuzina ebizina ebirukukugiza Ruhanga. (Soma Zabuli 104:33.) Yahwe n’agonza tugende omu nsorrokono habwokuba n’atugonza kandi akimanyire ngu niziija kutukonyera kwegondeza omu bwomeezi ebiro n’ebiro. Obutugenda omu nsorrokano, tugarramungana amaani.
YEGA EBIRUKUKIRAHO
Manya ensonga habwaki Yahwe ataikiriza kukozesa ebisisani omu kuramya. Yega emiringo emikuru nk’oku tusobora kukugiza Ruhanga.
4. Titusemeriire kukozesa ebisisani omu kuramya kwaitu
Nitumanya tuta ngu kubikozesa nikibiihiza Ruhanga? Mutekeho VIDIYO, hanyuma mubazeeho ekikaguzo kinu.
Kiki ekyabaireho, bamu h’abantu ba Ruhanga aba kara obubalengereho kumuramya nibakozesa ebisisani?
Abantu abamu bakozesa ebisisani obubarukuba nibaramya Ruhanga habwokuba nibagonza kwehurra bali haihi nauwe. Baitu kinu nikiba kitarukumwiriza hara? Musome Okuruga 20:4-6 na Zabuli 106:35, 36, hanyuma mubazeeho ebikaguzo binu:
Bintu ki rundi bisisani bya mulingo ki eby’orora abantu nibakozesa omu kuramya kwabo?
Yahwe ayehurra ata abantu obubakozesa ebisisani?
N’otekereza, tusemeriire kukozesa ebisisani omu kuramya kwaitu? Habwaki?
5. Kakuba turamya Yahwe wenka titurukwija kuhabisibwa entekereza ez’ebisuba
Rora nk’oku kuramya Yahwe omu mulingo oguhikire kitujuna kuruga omu nyegesa ez’ebisuba. Mutekeho VIDIYO.
Musome Zabuli 91:14, hanyuma mubazeeho ekikaguzo kinu:
Kiki Yahwe ekyarukuraganiza kutukorra kakuba twoleka ngu nitumugonza kandi nituramya uwe wenka?
6. Turamya Ruhanga omu nsorrokano z’ekitebe
Tukugiza Yahwe kandi tugarramungana abandi amaani obutuzina n’obutugarukamu omu nsorrokano. Musome Zabuli 22:22, hanyuma mubazeeho ebikaguzo binu:
Ogonza kuhurra eby’okugarukamu by’abandi omu nsorrokano?
Wakugondeze kutekaniza okahayo eky’okugarukamu?
7. Yahwe asemererwa obutugambiraho abandi ebiturukwega
Haroho emiringo nyingi eitusobora kukozesa kugambiraho abandi amananu kuruga omu Baibuli. Musome Zabuli 9:1 na 34:1, hanyuma mubazeeho ekikaguzo kinu:
Kintu ki eky’oyegere kuruga omu Baibuli ekiwakugondeze kugambiraho omuntu ondi?
ABANTU ABAMU BAGAMBA: “Nitusobora kuramya Ruhanga omu mulingo gwona oguturukugonza.”
Iwe n’otekereza ki?
OYEGERE KI?
Tusemeza Omuhangi waitu obuturamya uwe wenka, tukamukugiza omu nsorrokano, kandi tukagambiraho abandi ebitwegere.
Kweijukyamu
Nitusobora tuta kumanya omulingo oguhikire ogw’okuramyamu Ruhanga?
Habwaki tusemeriire kuramya Yahwe wenka?
Habwaki tusemeriire kuramiza hamu n’abandi abarukugonza kusemeza Ruhanga?
SERULIIRIZA
Omu kicweka “Tinkyali Mwiru w’Ebisisani,” soma omanye omulingo omukazi omu y’asoboire kuleka kuramya ebisisani.
“Baibuli Ehindura Obwomeezi” (Watchtower, eya Julaayi 1, 2011)
Manya ekisobora kukukonyera kuha ebyokugarukamu omu nsorrokano.
“Kugiza Yahwe Hagati y’Ekitebe” (Omunaara gw’Omulinzi, ogwa Janwali 2019)
Rora omulingo omusigazi yagasiirwe habwokwija omu nsorrokano n’obukiraaba ngu tikyamwanguhiraga kuziijamu.
Abantu baingi baikiriza ngu omusalaba k’okurorraho k’Obukristaayo, baitu mali tusemeriire kugukozesa omu kuramya?
“Habwaki Abakaiso ba Yahwe Batakozesa Omusalaba omu Kuramya Kwabo?” (Ekicweka kinu kiri ha mukura)
a Ebintu binu nibiija kubazibwaho omu masomo ag’omu maiso.