ISOMO 49
Eka Yaawe n’Esobora Eta Kubamu Okusemererwa?—Ekicweka 1
Abaakataaha obuswere banihira ngu okusemererwa okubatunga ha kiro kyabo eky’okugaitwa, nikwija kwikaraho ebiro n’ebiro. Kandi nikusobora kwikaraho. Abakristaayo abaikaire omu buswere kumara akasumi kandi abekambire muno kuteeka obuhabuzi bwa Baibuli omu nkora, bakimanyire ngu eki nikisoboka.
1. Buhabuzi ki Baibuli obw’eha banyineeka?
Yahwe akomere banyineeka kuba mutwe gw’eka. (Soma Abefeso 5:23.) Yahwe n’agonza omusaija akole encwamu eziragasira eka. Baibuli egambira banyineeka eti: “Mugonzege bakazi banyu.” (Abefeso 5:25) Eki nikimanyisa ki? Nyineeka ow’okugonza obw’aba ali omu ka rundi ali n’abantu abandi, atwaza mukazi we omu mulingo ogw’embabazi. Akora kyona ekirukusoboka kumusemeza, kumulinda kutahikwaho akabi, n’okumuhikyaho ebyetaago bye. (1 Timoseo 5:8) Ekirukukirayo obukuru, amukonyera kutunga enkoragana enungi na Yahwe. (Matayo 4:4) Ekyokurorraho, n’asobora kusaba n’okusoma na mukazi we Baibuli. Nyineeka obw’afaaho mukazi we omu mulingo ogw’okugonza, aikazaaho enkoragana ye na Yahwe.—Soma 1 Petero 3:7.
2. Buhabuzi ki Baibuli obw’eha banyinabwenge?
Ekigambo kya Ruhanga nikigamba ngu omukazi “atinege iba.” (Abefeso 5:33) Eki n’asobora kukikora ata? N’asobora kuteekerezaaho emiringo ya musaija we enungi, amaani atamu kumufaaho hamu n’abaana. Ekindi, n’asobora kwoleka ngu n’atamu iba ekitiinisa kurabira omu kusagika encwamu ze n’okumubaliza omu mulingo gw’embabazi rundi kumubazaaho kurungi n’obwarukuba atali muheereeza wa Yahwe.
3. Abaswerangaine nibasobora bata kugumya obuswere bwabo?
Baibuli ebazaaho abaswerangaine eti: “Nabo babiri baliba mubiri gumu.” (Matayo 19:5) Kinu nikimanyisa ngu basemeriire kurwanisa ekintu kyona ekisobora kucekya okugonza okubainiirengana. Kinu bakikora kurabira omu kumara hamu obwire butoosa, n’okugambirangana enteekereza n’enyehurra zaabo batarukuserekangana. Tibaikiriza ekintu kyona rundi omuntu weena—oihireho Yahwe—kuba kintu ekikuru kukira ogu oubali nauwe omu buswere. Beerinda muno kukora omuganjano ogutasemeriire n’omuntu ondi wena.
YEGA EBIRUKUKIRAHO
Manya emisingi ya Baibuli ey’esobora kugumya obuswere bwawe.
4. Banyineeka—mugonze kandi mufeeho abakazi banyu
Baibuli egamba ngu “abasaija [basemeriire] okugonzaga abakazi babu nkemibiri yabu bonka.” (Abefeso 5:28, 29) Eki nikimanyisa ki? Mutekeho VIDIYO, hanyuma mubazeeho ekikaguzo ekirukuhonderaho.
Miringo ki nyineeka ey’asobora kwoleka ngu n’agonza mukazi we kandi n’amufaaho?
Musome Abakolosai 3:12, hanyuma mubazeeho ekikaguzo kinu:
Nyineeka n’asobora ata kwoleka emiringo enu omu buswere bwe?
5. Banyinabwenge—mugonze kandi mutemu abasaija banyu ekitiinisa
Baibuli n’eyekambisa omukazi kutamu iba ekitiinisa kabe n’aheereza Yahwe rundi tarukumuheereza. Musome 1 Petero 3:1, 2, hanyuma mubazeeho ebikaguzo binu:
Obworaaba oine omusaija ow’atarukuheereza Yahwe, hataroho kugurukyagurukya n’ogonza amuramye. N’otekereza mulingo ki ogurukukirayo ogw’osobora kumukonyeramu?—n’otekereza osemeriire kumutebeza buli kaire rundi kuba n’engeso enungi n’okumutamu ekitiinisa? Habwaki?
Banyineeka na banyinabwenge nibasobora kukora hamu encwamu. Baitu, obwire obumu omukazi n’asobora kutaikiranganiza na musaija we. Omu mulingo ogutekaine kandi ogw’ekitiinisa, n’asobora kumugambira eky’arukutekereza, baitu asemeriire kwijuka ngu Yahwe ahaire iba obujunanizibwa obw’okukora encwamu eziragasira eka. Omukazi asemeriire kukora ekirukusoboka kuzisagika. Obw’akora eki, akonyera eka yoona kutunga okusemererwa. Musome 1 Petero 3:3-5, hanyuma mubazeeho ekikaguzo kinu:
Yahwe ayehurra ata omukazi obw’atekamu iba ekitiinisa?
6. Nimusobora kusingura ebizibu omu buswere bwanyu
Busaho buswere obuhikiriire. Nahabweki abaswerangaine basemeriire kukorra hamu kusobora kusingura ebizibu. Mutekeho VIDIYO, hanyuma mubazeeho ebikaguzo ebirukuhonderaho.
Kusigikirra ha vidiyo, kiki ekirukwoleka ngu omusaija na mukazi we bakaba balekere kufaahongana?
Bintu ki ebibaakozere kugumya obuswere bwabo?
Musome 1 Abakolinso 10:24 na Abakolosai 3:13. Hanyuma y’okusoma buli kyahandiikirwe, mubazeeho ekikaguzo kinu:
Kuteeka omu nkora obuhabuzi bunu nikisobora kita kugumya obuswere?
Baibuli n’egamba ngu tusemeriire kutekamungana ekitiinisa. Kutekamungana ekitiinisa nikitwarramu kutwaza omuntu kurungi kandi omu mulingo ogw’embabazi. Musome Abarumi 12:10, hanyuma mubazeeho ebikaguzo binu:
Hagati y’omusaija n’omukazi, n’oha asemeriire kubanza kutekamu mutaahi we ekitiinisa? Habwaki?
ABANTU ABAMU BAGAMBA: “Nyowe n’oundi nauwe omu buswere titukyafaahongana nk’oku tukaba tuli kara.”
N’osobora ota kubasoborra ngu Baibuli n’esobora kubakonyera?
OYEGERE KI?
Nyineeka na nyinabwenge nibasobora kutunga okusemererwa obubarukuba nibagonzangana, nibatekamungana ekitiinisa, kandi nibateeka omu nkora emisingi ya Baibuli.
Kweijukyamu
Bintu ki nyineeka eby’asobora kukora kuleeta okusemererwa omu ka?
Bintu ki nyinabwenge eby’asobora kukora kuleeta okusemererwa omu ka?
Obw’oraaba oli omu buswere, musingi ki ogwa Baibuli ogusobora kugumya obuswere bwawe?
SERULIIRIZA
Manya amagezi agasobora kubakonyera kwegondeza omu bwomeezi nk’eka.
Murole vidiyo ey’ekizina ey’erukwoleka emigisa ey’eruga omu kuteeka omu nkora obuhabuzi bwa Ruhanga omu buswere.
Wekebiije amakuru ag’okworobera omusaija nka nyineeka kandi omanye nk’oku nuwe aine obujunanizibwa obw’okwebembera eka.
“Abakazi, Habwaki Musemeriire Kworobera Entekaniza y’Obwebembezi?” (Watchtower, eya Maayi 15, 2010)
Rora obuhabuzi bwa Baibuli obusobora kukonyera abali omu buswere.