Tukahangwa Kwomeera Ebiro N’ebiro

NOHA omulitwe atarukugonza kwomeera ebiro n’ebiro kandi omu bwomeezi oburumu kusemererwa? Kitekerezeeho, kuba n’obwomeezi obutarukuhwaho, oburumu okusemererwa kandi butarumu kurwara! Twakusoboire kwikara n’abagonzebwa baitu ebiro byona, kurambura ensi yoona, n’okwega ebintu ebihyaka.

Habwaki abantu bagonza kwomeera? Ebyahandiikirwe nibitugambira ngu, Ruhanga akatuhanga n’ekihika eky’okugonza kwomeera ebiro n’ebiro. (Omugambizi 3:11) Baibuli eyongera egamba ngu “Ruhanga nukwo kugonza.” (1 Yohana 4:8) Mali nikikora amakuru goona, Ruhanga ow’okugonza kutuhanga n’ekihika eky’okwomeera ebiro n’ebiro kandi kunu akimanyire ngu nitwija kufa?

Amananu gali ngu, busaho muntu agonza kufa. Baibuli etugambira ngu okufa ‘munyanzigwa.’ (1 Abakolinso 15:26) Abamu bafa bakyali bato, kandi abandi bahangaara kumara akasumi baitu nabo bamalirra bafiire. Abamu betuntura muno kandi batiina obu batekerezaaho okufa. Okufa kulihwaho? Mali nikisoboka?

EBIRUKWOLEKA NGU RUHANGA N’AGONZA TWOMEERE

Ruhanga atahange abantu n’ekigendererwa eky’okufa. Ekitabu eky’Okubanza omu Baibuli nikiha obwakaiso oburukwoleka ngu Ruhanga akahanga abantu kwomeera omu nsi ebiro n’ebiro. Yahwe Ruhanga akahanga ensi yagitamu ebintu byona omuntu ebyarukwetaaga kusobora kuba mwomeezi kandi aine okusemererwa. Akongera yahanga omuntu ow’okubanza arukwetwa Adamu, kandi yamuta omu rugonjo orurungi Adeni. Hanyuma y’ebi, “Ruhanga [akarora] byona ebiyakozire, kandi dora bisemiire muno.”—Okubanza 1:26, 31.

Adamu akahangwa ahikiriire kandi omu kusisana kwa Ruhanga. (Ekyebiragiro 32:4) Na mukazi we Hawa, akaba ahikiriire ataine kamogo koona omu mubiri n’omu bitekerezo. Yahwe akabagambira ati: “Muzalege, mukanye, muijuze ensi, mugirye; mulemege encu ezomunyanja, nebihu’ruka omu mwanya, na byona ebinyina obwomezi ebigendera hansi.”—Okubanza 1:28.

Kikaba nikiija kutwarra Adamu na Hawa obwire kusobora kwijuza ensi. Hawa yakuzaire abaana kandi n’abaana nabo bakuzaire abandi kuhikya ensi yoona obuyakwijwire nk’oku Ruhanga akaba akitegekere. (Isaya 45:18) Mali Yahwe akaba nasobora kuha Adamu na Hawa omulimo ogw’okwijuza ensi kandi kunu akimanyire ngu baali nibagenda kugarukira ha kurora abaana hamu n’abaijukuru baabo bonka?

Tekerezaaho obujunanizibwa Ruhanga akaba ahaire Adamu obw’okurolerra ebisoro. Ruhanga akamugambira kuruka ebisoro amabara, kandi kinu kyakutwaire obwire bwingi muno. (Okubanza 2:19) Adamu kusobora kurolerra ebisoro kyakumwetagisize kubanza kwega ebirukukwata ha bisoro ebi nukwo kimwanguhire kusobora kubirolerra. Kinu kyakutwaire obwire bwingi kukira obwire obuyakumazire nabiruka amabara.

Nahabweki, ekiragiro kya Ruhanga eky’okuzaara bakaijuza ensi hamu n’ekyokurolerra ebisoro, nikyoleka nk’oku Adamu na Hawa baali b’okwomeera ebiro n’ebiro. Kandi Adamu akahangaara kumara obwire bwingi.

RUHANGA AKAHANGA ABANTU AINE EKIGENDERERWA NGU BOMEERE EBIRO N’EBIRO OMU RUGONJO ORURUNGI OMU NSI

BAKAHANGAARA KUMARA EMYAKA NYINGI

Omusaija kasumi kanu — Kasumi kanu, emyaka 70-80

Baibuli n’eyoleka ngu abantu kara bahangaaraga kumara emyaka nyingi kukira kasumi kanu. Negamba eti: “Nebiro byona bya Adamu ebiyahikize byaba emyaka rwenda mwasatu.” Hanyuma eyongera ebazaaho abantu abandi mukaaga abahangaire emyaka erukuhingura 900. Kandi banu nubo Sesi, Enosi, Kenani, Yaledi, Metusera, hamu na Nuha. Abasaija banu boona bakaba baroho okusandaara kw’amaizi okw’omu kasumi ka Nuha kutakabaireho kandi Nuha akaba ayomiire kumara emyaka 600 okusandaara okw’amaizi kutakahikire. (Okubanza 5:5-27; 7:6; 9:29) Habwaki abasaija abo basoboire kuhangaara kumara emyaka egi yoona?

Abasaija banu boona bakahangaara muno habwokuba baali bakyainemu okuhikirra. Egi niyo ensonga habwaki basobora kuba bahangaire muno. Okuhikirra nikusobozesa kuta abantu kuhangaara muno? Okufa kulisingurwa kuta? Kusobora kutunga eby’okugarukamu, tusemeriire kubanza kumanya habwaki tukaikura kandi tufa.