Okwikiriza​—Omulingo Ogutukonyera Kuguma

OKWIKIRIZA kutukonyera kuba b’amaani. Ekyokurorraho, Sitaani alengaho kutuhwerekereza omu by’omwoyo baitu okukwikiriza kutusobozesa “okuraza emisogi yona eyomurro eyomubi.” (Bef. 6:16) Kandi nukwo kutusobozesa kuraba omu bizibu ebirukusisana ensozi enkooto. Yesu akagambira abegeswa be ati: “Kuba munyina okuikwikiriza okuingana nkakajuma akakaradali, muba mugambira orusozi runu ngu [ruga] hanu, ogende hali; ruba rugenda.” (Mat. 17:20) Nk’oku okwikiriza kutukonyera kuguma omu by’omwoyo, tusemeriire kutekerezaaho ebikaguzo binu: Okwikiriza nikyo kiki? Enyikara y’omutima gwaitu ekwataho eta okwikiriza kwaitu? Nitusobora tuta kugumya okwikiriza kwaitu? Kandi n’oha outusemeriire kwikiririzaamu?​—Bar. 4:3.

OKWIKIRIZA NIKYO KIKI?

Okwikiriza tikugarukira ha kumanya amananu, habwokuba n’abadaimoni “nibaikiriza [ngu Ruhanga aroho] nibatukumira.” (Yak. 2:19) Hati, okwikiriza nikyo kiki?

Baibuli esoborra ngu okwikiriza nikutwarramu ebintu bibiri. Eky’okubanza, “okuikiriza nukwo kurukugumya ebinihizibwa.” (Baheb. 11:1a) Obworukuba oine okwikiriza, noba n’okigumiza kimu ngu Yahwe ebiyagambire by’amananu kandi nibiija kuhikirra. Ekyokurorraho, Yahwe akagambira Abaisaleri ngu: “Obumuraba nimusobora okucwa ekiragano kyange ekyekiro, hatabaho nyamusana nekiro omu busumi bwabyo; nubwo nekiragano ekinaragaine na Daudi omuiru wange kisobora okucweka.” (Yer. 33:20, 21) Haroho obw’oyeralikirra ngu izooba tirirukugenda kujwa rundi kugwa kikaletera obwire kulemwa kwira rundi kukya? Obworaaba otarukugurukyagurukya ngu ebiragiro ebirema eby’obuhangwa ebiretera ensi kwikara negenda kandi n’eyetorora izooba, mali osemeriire kugurukyagurukya ngu Omuhangi ayataireho ebiragiro binu nasobora kulemwa kuhikiriza ebiyaraganiize? Tusemeriire kumwesigira kimu!​—Is. 55:10, 11; Mat. 5:18.

Ekyakabiri, okwikiriza “nukwo kurukumanyisa ebitarukurorwa.” Okwikiriza nukwo kutumanyisa rundi nubwo bwakaiso obutukonyera kugumya nk’oku ebintu ebitutarukurora biroho. (Baheb. 11:1b) Kyokurorraho ki ekirukwoleka ngu nitusobora kwikiririza omu kintu ekitutarukurora? Kakuba omwana akukaguza ati, ‘nitugumya tuta ngu orwoya ruroho kwo?’ N’obworaaba otakarorahoga orwoya, nosobora kukonyera omwana ogu kukyetegereza ngu ruroho habwokuba turwikya, kandi turora ebintu omuyaga gukora. Omwana obwamara kugumya obwakaiso oburukwoleka ngu orwoya ruroho, aikiriza ngu ruroho n’obwaraaba atarukururora. Nikyo kimu n’okwikiriza, kusigikirra ha bwakaiso obugumire.​—Bar. 1:20.

KUTUNGA OKWIKIRIZA TUSEMERIIRE KUGONZA AMANANU

Nk’oku okwikiriza kusigikirra habwakaiso obugumire, omuntu kukutunga asemeriire kubanza “kumanyira kimu amazima.” (1 Tim. 2:4) Baitu kumanya kwonka tikurukumara. Omukwenda Paulo akahandiika nagamba ati: ‘Omutima nugwo guikirizisa omuntu.’ (Bar. 10:10) Nahabweki omuntu tasemeriire kugarukira ha kwikiriza amananu kwonka baitu asemeriire n’okugagonza. Kinu nikyo kiramuletera kuba n’okwikiriza, okuramukonyera kukora Yahwe eby’agonza. (Yak. 2:20) Omuntu ow’atarukugonza amananu kuruga ha mutima nasobora kwanga obwakaiso obugumire habwokuba aba atarukugonza kuhindura enyikiriza ze rundi n’agonza kuhondera okwegomba kwe okw’omubiri. (2 Pet. 3:3, 4; Yud. 18) Enu niyo ensonga habwaki omu busumi obwa kara abantu abamu abarozere ebyamahano bataratunge okwikiriza. (Kubar. 14:11; Yoh. 12:37) Omwoyo gwa Ruhanga ogurukwera gukonyera abo bonka ab’arukugonza amananu kutunga “okwikiriza.”​—Bag. 5:22, NW; 2 Bas. 2:10, 11.

DAUDI AKATUNGA ATA OKWIKIRIZA OKUGUMIRE

Omukama Daudi akaba ali omu h’abantu abaali baine okwikiriza okugumire. (Baheb. 11:32, 33) Baitu abanyabuzaale ba Daudi boona baali bataine okwikiriza okugumire. Ekyokurorraho, kiro kimu Eryabu, mugenzi wa Daudi arukukirrayo kimu obukuru akoleka ngu taine kwikiriza obuyabihiirwe hanyuma y’okuhurra Daudi nabazaaho kurwanisa Goliasi. (1 Sam. 17:26-28) Busaho muntu n’omu azarwa aine okwikiriza rundi ow’akutunga habw’abazaire be, nahabweki okwikiriza Daudi okw’akaba aine kukaletwa enkoragana enungi ey’akaba aine na Ruhanga.

Zabuli 27, n’etukonyera kumanya omulingo Daudi y’atungiremu okwikiriza okugumire. (Orukarra 1) Daudi akecumitirizaaho ebintu ebiyarabiremu hamu n’omulingo Yahwe akaba amukonyiremu kusingura abanyanzigwa be. (Orukarra 2, 3) Yagonzaga muno kugenda ha heema ya Yahwe ey’okuramizaamu. (Orukarra 4) Daudi yaramyaga Yahwe ha heema ey’okuramizaamu hamu n’Abaisaleri abandi. (Orukarra 6) Yaserraga obukonyezi bwa Yahwe kuraba omu kusaba. (Orukarra 7, 8) Kandi Daudi yagonzaga Yahwe amwegese omuhanda gwe. (Orukarra 11) Habwokuba okwikiriza kwali kukuru muno hali Daudi, kikamuletera kugamba ati: “Nakugwire ensazi kakuba ntaraikiriize.”​—Orukarra 13.

NK’OKU OSOBORA KUGUMYA OKWIKIRIZA KWAWE

Naiwe nosobora kuba n’okwikiriza nk’okwa Daudi kakuba oba n’entekereza nk’eye kandi oketwaza omulingo y’ayetwaizemu oguturukusomaho omu Zabuli 27. Nk’oku okwikiriza kusigikirra ha kumanya okuhikire, obw’orayeyongera kusoma Ekigambo kya Ruhanga hamu n’ebintu ebindi kuruga hali omwiru omwesigwa, omwoyo gwa Ruhanga nigwija kukukonyera kutunga okwikiriza. (Zab. 1:2, 3) Obworaaba n’oyesomesa tunga obwire oburukumara kwecumitirizaaho eby’osomere. Kakuba twecumitirizaaho ebitusomere, nikiija kutukonyera kweyongera kwoleka okusiima habw’ebintu Yahwe atukoliire. Kusiima Yahwe nikiija kukwekambisa kwoleka okwikiriza kwawe kuraba omu kugenda omu nsorrokano zoona hamu n’okugambiraho abandi okunihira kwawe. (Baheb. 10:23-25) Omulingo ogundi ogutwolekamu okwikiriza kwaitu nukwo “okusaba obutosa [tutarukujwaha].” (Luk. 18:1-8) Nahabweki, ‘tusabege obutoosa’ nitwesigira kimu ngu Yahwe n’atufaaho muno. (1 Bas. 5:17; 1 Pet. 5:7) Okwikiriza kutuletera kukora ebihikire kandi obutukora ebihikire, kweyongera kuguma.​—Yak. 2:22.

IKIRIRIZA OMULI YESU

Ha kiro eky’okumalirra Yesu atakafiire, akagambira abegeswa be ati: ‘Mwikirize Ruhanga, nanyowe munyikirizege.’ (Yoh. 14:1) Nahabweki tusemeriire kwikiririza omuli Ruhanga hamu na Yesu. Nosobora ota kwikiririza omuli Yesu? Leka tubazeeho emiringo esatu.

Ogw’okubanza, ekicunguro kirole nk’ekisembo Ruhanga ekiyahaireyo habwawe. Omukwenda Paulo akagamba ati: “Obwomezi obunyinabwo omu mubiri, nyinabwo omu kuikiriza okuli omu Kristo, Omwana wa Ruhanga, ayangondeze, ayayehaireyo wenka habwange.” (Bag. 2:20) Obw’oba oine okwikiriza omuli Yesu, okigumiza kimu ngu ekicunguro nikisobora kukugasira, nikyo Yahwe asigikirraho kukuganyira ebibi byawe, nikikukonyera kutunga okunihira kw’obwomeezi obutahwaho kandi nubwo bwakaiso oburukukirayo kugumya ngu Ruhanga n’akugonza. (Bar. 8:32, 38, 39; Bef. 1:7) Kwikiriza ngu ekicunguro nikisobora kukukonyera, kikusobozesa kuleka kwikara n’oyecwera omusaango habw’ebibi ebiwakozere, kandi oleka kwehurra kubi.​—2 Bas. 2:16, 17.

Ogwakabiri, irra haihi na Yahwe kuraba omu kusaba n’osigikirra ha kihongwa kya Yesu. Habw’ekicunguro nitusobora kusaba Yahwe n’okwirra “haihi nobumanzi hali ekitebe kyembabazi, tuhabwe okuganyira, tutungege embabazi ez’okukonyerwa” omu kasumi akahikire. (Baheb. 4:15, 16; 10:19-22) Okusaba kutuletera kucweramu kimu kurwanisa okwohebwa kwona okw’okukora ekibi.​—Luk. 22:40.

Ogwakasatu, yorobera Yesu. Omukwenda Yohana akagamba ati: “Anyakuikiriza Omwana, ayina obwomezi obutahwaho, baitu [anyakujeemera] Mwana talibona bwomezi, baitu ekiniga kya Ruhanga kiikaire haluwe.” (Yoh. 3:36) Wetegereze ngu Yohana akooleka ngu nitusobora kwikiririza omu Mwana rundi kumujeemere. Nahabweki twoleka ngu nitwikiririza omuli Yesu obutumworobera. Kandi tumworobera obutuhondera “ekiragiro kya Kristo,” ekirukutwarramu ebintu byona ebiyayegeseze kandi n’ebiyaragiire. (Bag. 6:2) Ekintu ekindi, tworobera Yesu obutuhondera obuhabuzi obwarukutuha nakozesa “omwiru omwesigwa kandi ow’amagezi.” (Mat. 24:45, NW) Kworobera Yesu nikiija kukukonyera kugumira ebizibu eby’amaani kandi ebirukutiinisa nk’ekiyaga eky’amaani.​—Luk. 6:47, 48.

YOMBEKA ‘OKWIKIRIZA KWAWE OKURUKWERA MUNO’

Kiro kimu omusaija akatokera haiguru yagambira Yesu ati: “Ninyikiriza; nkonyera okutaikiriza kwange.” (Mar. 9:24) Nobukiraaba ngu omusaija onu akaba aine okwikiriza, obwebundaazi bukamuletera kukyetegereza ngu akaba nayetaaga okwikiriza okurukukiraho. Nk’omusaija onu, naitwe akasumi nikaija kuhika twetaage okwikiriza okurukukira okutwine hati. Kandi itwena tusemeriire kugumya okwiriza kwaitu hati. Turozere ngu, nitusobora kugumya okwikiriza kwaitu kuraba omu kwesomesa Ekigambo kya Ruhanga hamu n’okukyecumitirizaaho, kinu nikiija kutukonyera kweyongera kugonza Yahwe. Kandi okwikiriza kwaitu nikwija kweyongera kuguma obuturagumizaamu nituramiza hamu Yahwe n’Abakristaayo bagenzi baitu, obuturagambiraho abantu abandi okunihira okutwine, kandi n’okusaba butoosa. Obuturagumya okwikiriza kwaitu nitwija kutunga empeera erukukirrayo kimu oburungi. Baibuli etutererra eti: ‘Abarukugonzebwa, nimweyombeka hali okuikiriza kwanyu okurukwera muno . . . mwerindirege omu kugonza kwa Ruhanga.’​—Yud. 20, 21.