Ebijuliziibwe omu Katabu Obwomeezi n’Obuheereza Bwaitu nk’Abakristaayo
MAAYI 3-9
EBITURUKWEGA KURUGA OMU BAIBULI | OKUBARA 27-29
“Hondera Ekyokurorraho kya Yahwe eky’Okutasoroora”
w13-E 6/15 10 ¶14
Weyongere Kumanya Emiringo Ya Yahwe
Bahara ba Zerofehadi bataano bakagenda hali Musa bamugambira ngu: “Kiki ekirukuiha ibara lya isitwe omu [kika] kyowabu, habwokutaba nabatabani?” Hanyuma bamwesengereza ngu: “Mutuhe itwe obutaka hamu na bene babu isitwe.” Musa akabatabukira yabambira ngu, ‘Ekiragiro nukwo kirukugamba tinyine ekyokubakorra’? Nangwa, oihireho ‘akaleeta ebigambo byabo hali Yahwe.’ (Kubar. 27:2-5) Yahwe akagarukamu ki? Akagambira Musa Ati: “Abahara ba Zerofehadi bagambire ebyobulyo: mazimakwo olibaha obutaka obwobugwetwa hamu na bene babu isebo; kandi olibagweta obugwetwa bwa isebo.” Yahwe atagarukire aho. Akaragira ngu eki kifooke kiragiro, yagambira Musa ati: “Omusaija obwaliba nafa atanyina omutabani, nubwo muligweta omuharawe obugwetwabwe.” (Kubar. 27:6-8; Yos. 17:1-6) Kuruga obu, abakazi Abaisaleri abayesangaga omu nyikara nk’egi, batungaga obulinzi.
w13-E 6/15 11 ¶15
Weyongere Kumanya Emiringo Ya Yahwe
Mali eki kakikole ngu Yahwe w’embabazi kandi tasoroora! Abakazi banu abakaba bataine muntu wena arabakonyera, Yahwe akabatwaza omu mulingo gw’ekitiinisa, nk’oku yatwazaaga n’Abaisaleri abandi abaabaga bali omu nyikara enungi. (Zab. 68:5) Kinu kiri kimu ha byokurorraho bingi ebihandiikirwe omu Baibuli ebirukwolekera kimu kurungi ngu, Yahwe tasoroora. Abaheereza be boona abatwaza omu mulingo gw’obwinganiza.—1 Sam. 16:1-13; Eng 10:30-35, 44-48.
w13-E 6/15 11 ¶16
Weyongere Kumanya Emiringo Ya Yahwe
Nitusobora tuta kuhondera ekyokurorraho kya Yahwe eky’okutasoroora? Ijuka ngu kusobora kuba abantu abatarukusoroora tusemeriire kubanza kukora ebintu binu bibiri. Itwe itwenka tusemeriire kubanza kweyihiramu kimu enyehurra ey’okusoroora. Ky’amananu ngu itwena tugonza kwerora nk’abantu abarukufaaho abandi kandi abatasoroora. Naiwe n’osobora kukiikiriza ngu tikyanguhire kwekebera tukamanya enyehurra yaitu. Hati, kiki ekitusobora kukora kumanya obuturaaba tuli bantu abatasoroora? Yesu obwakaba nagonza kumanya biki eby’abantu bakaba nibamubazaaho, akakaguza abanyawni be abaakaba nayesiga ati: “Omwana womuntu, abantu nibamweta oha?” (Mat. 16:13, 14) Habwaki naiwe otakora nk’oku Yesu yakozere? N’osobora kukaguza omunywani ow’orukwesiga akugambire obworaaba oli muntu atarukusoroora. Kiki ekyosemeriire kukora kakuba akugambira ngu oine okusoroora kuke n’osigikirra ha ruganda, ekiikaro rundi eby’entahya by’omuntu? Ikara n’osaba Yahwe kandi omwesengereza akukonyere kuhindura ha nyehurra yawe nukwo ofooke omuntu atarukusoroora na kake.—Mat. 7:7; Bak. 3:10, 11.
Eby’Omuhendo Kuruga Omu Baibuli
it-2-E 528 ¶5
Ebihongwa
Ebihongwa eby’eby’okunywa. Ebihongwa eby’eby’okunywa babiherayoga hamu n’ebihongwa ebindi ebirukukira obwingi, kukira muno hanyuma y’Abaisaleri kutandika kwikara omu Nsi ey’Ekaba Eraganiziibwe. (Kubar 15:2, 5, 8-10) Ebihongwa kinu kyabamuga amaarwa (agarukutamiiza) kandi gaseeswaga ha kyoto. (Kubar 28:7, 14; lengesaniza na Kurug 30:9; Kubar 15:10.) Omukwenda Paulo akahandikira Abakristaayo ab’omu Firipi ati: “N’obundaaba ninseeswa nk’ekihongwa eky’eky’okunywa ekiseeswa ha kihongwa hamu n’obuheereza obw’okuhikirra okwikiriza kwanyu okurukubasobozesa, nsemeriirwe.” Hanu Paulo akakozesa ekyokurorraho eky’ekihongwa, kwoleka omulingo akaba ayehaireyo kukonyera Abakristaayo bagenzi be. (Baf 2:17) Obuhakaba nihaburayo akasumu kake afe, akahandiikira Timoseo ati: “Ninseswa [nk’ekihongwa eky’ky’okunywa], kandi akasumi akokulekerwa kwange kahikire.”—2Tim 4:6.
MAAYI 10-16
EBITURUKWEGA KURUGA OMU BAIBULI | OKUBARA 30-31
“Ohikiirize Ebyoyeraga”
it-2-E 1162
Okweraga
Kwabaga okw’okwegondeza, baitu Hanyuma y’Okukukora Kukaba Kwine Kuhikirizibwa. Okweraga kwabaga okw’okwegondeza. Baitu omusaija obuyayeragaga, ebiragiro bya Ruhanga byamwetagisaaga kuhikiriza ekiyabaga ayeragire. Nahabweki enu niyo ensonga habwaki okweraga kwe kwatwarwaga ‘nk’okumwebohereho,’ ekirukumanyisa ngu yasisanaga nkataireyo obwomeezi bwe nk’omusiimbo kukigumya ngu naija kukora eky’ayeragire. (Kubar 30:2; rora n’omu Bar 1:31, 32.) Nk’oku obwemeezi bwe bwali nibukwatwaho, enu niyo ensonga habwaki Ebyahandiikirwe byatererraga omuntu kutaanguhiriza kweraga, baitu akaba asemeriire kubanza kwecumitirizaaho muno okweraga oku nikitwarramu ki. Ebiragiro bikagamba ngu: “Obworabaga noyeraga okweraga hali [Yahwe] . . . Ruhanga wawe talireka okukukutonga; kandi kyakubaire kibi haliiwe. Baitu obwolirema okweraga tikiriba kibi namberoli.”—Bir 23:21, 22.
it-2-E 1162
Okweraga
Kuli kuraganiza Ruhanga ngu noija kukora ekintu, kuhayo ekihongwa rundi ekisembo, kutaaha omu buheereza obw’embaganiza rundi kwerekesa ebintu ebitatangirwe. Okweraga kyabaga kiri kintu omuntu ekiyakoraga ayegondiize. Nk’oku kwabaga kuli kuraganiza, okweraga kwabaga kuli nk’okurahira kandi omu Baibuli, obwire obumu okweraga n’okurahira bikira kuhonderangana. (Kubar 30:2; Mat 5:33) “Okweraga” nikutwarramu kubaza ekyorukugonza kukora, baitu “okurahira” nikutwarramu kwatura omu maiso g’ab’obusobozi, kwoleka ngu ebyorukubaza mananu rundi ngu eby’obalize noija kubihikiiriza. Hanyuma y’okurahira hakira kubaho kukora endagaano.—Kub 26:28; 31:44, 53.
w04-E 8/1 27 ¶3
Ebiturukwega Kuruga omu Kitabu ky’Okubara
30:6-8—Omusaija Omukristaayo n’asobora kusazaamu okweraga kwa mukazi we? Obukirukuhika ha kweraga, kasumi kanu Yahwe akoragana n’abaheereza be omu omu. Nk’ekyokurorraho, okwehayo hali Yahwe kuba okweraga omuntu okw’akora habwe. (Abagaratiya 6:5) Omusaija taine busobozi obw’okutanga rundi kusazaamu okweraga okwa mulingo gunu. Baitu nabwo mukazi asemeriire kwetantara kukora okweraga okurukuhakaniza Ekigambo kya Ruhanga rundi obujunanizibwa bwe hali iba.
Eby’Omuhendo Kuruga Omu Baibuli
it-2-E 28 ¶1
Yefuta
Abantu bakaba nibasobora kuhebwayo kuheereza Yahwe obwomeezi bwabo bwona harukwera. Abazaire nubo bakaba baine obugabe obw’okukora ekintu kinu. Samwiri akaba ali omu h’abantu banu. Obw’akaba atakazairwe, nyina arukwetwa Hana akeeraga ngu naija kumuhayo kuheereza ha heema y’okutangatanganiramu. Okweraga kunu kukagumibwa musaija we Erikana. Aho naaho Samwiri obuyamazire kucuuka, Hana akamuhayo kuheereza harukwera. Haba akaleteraho n’ekisoro eky’okuhonga. (1Sam 1:11, 22-28; 2:11) Samusoni nauwe akaba ali mwana ahairweyo kuheereza Ruhanga nk’Omunaziri.—Bac 13:2-5, 11-14; lengesaniza obusobozi bw’omusaija hali muhara we nk’oku kyolekerwe omu Kubar 30:3-5, 16.
MAAYI 17-23
EBITURUKWEGA KURUGA OMU BAIBULI | OKUBARA 32-33
“Mubinge Boona Abamulisanga omu Nsi Egi”
w10-E 8/1 23
Obaire Okimanyire?
“Ebiikaro ebiraihire” ebirukubaziibwaho omu byahandiikirwe eby’Oruheburaniya bikaba nibyo biha?
Abaisaleri obubakaba bali haihi kutaaha omu nsi ey’Ekaba Eraganniziibwe, Yahwe akabagambira kuhwerekereza ebiikaro byona eby’okuramizaamu eby’Abakanaani abaikaraga omu nsi egi. Ruhanga akabaragira ati: ‘Mulihwerekereza amabaale gaabo goona agatiirweho ebisisani, mulihwerekereza ebisisani byabo ebyagire byona, kandi mulimaraho ebiikaro byabo ebiraihire byona.’ (Okubara 33:52) Ebiikaro ebi ebyakozesebwaga omu kuramya okw’ebisuba nibisobora kuba byali biri ha busozi rundi ebituuti ebyombekerwe omu biikaro ebindi nka hansi y’emiti rundi omu mbuga. (1 Ekyabakama 14:23; 2 Ekyabakama 17:29; Ezekyeri 6:3) Byabaga birumu ebyoto, amabaale agaraihire rundi enyomyo eziraihire, ebisisani, emigaju hamu n’ebintu ebindi ebyakozesebwaga omu kuramya.
w08-E 2/15 27 ¶5-6
Yegera ha Nsobi z’Abaisaleri
Kasumi kanu, nituhikwaho ebizibu bingi ebirukusisanaho n’eby’Abaisaleri baatungire. Ensi eiturumu nayo ine ebisisani byayo. Ebisisani binu nibitwarramu sente, abantu baruranganwa omu kuzina, omu mizaano, omu by’obulemi, abebembezi b’amadiini hamu n’ab’omu maka gaitu. Nitusobora kwesanga ngu omutima gwaitu gwona nitugumarra ha bimu ha bintu binu. Kukurakuraniza obunywani naabo abatarukugonza Yahwe nikisobora kutucekya omu by’omwoyo.
Engeso ezitasemiire ez’okuterana zikaba ziri kicweka eky’okuramya Bbaali kandi kyasikirizaaga Abaisaleri baingi. Emitego nk’egi ekwasire abaheereza ba Ruhanga baingi kasumi kanu. Nk’ekyokurorraho obworukuba oli wenka, nikikwetaagisa kumiga ipeesa limu lyonka erya kompyuta kwesanga otandikire kurora ebisisani by’orwanju kandi kikasiisa omuntu waawe ow’omunda. Mali kanikiba kiri ky’obusaasi Omukristaayo kakuba atwalirizibwa kurora ebisisani eby’orwanju ha intaneeti!
it-1-E 404 ¶2
Kanaani
Yosuha akaba w’amagezi, “atasige kyona kitakozerwe ha byona [Yahwe] ebiyaragiire musa” ebirukukwata ha kuhwerekereza Abakanaani. (Yos 11:15) Baitu ihanga lya Isaleri likalemwa kuhondera obwebembezi bwe oburungi nukwo bahwerekerereze kimu ekintu kyona ekyakubaletiire kusiisa. Habw’Abakanaani kwikaraho, kikaletera oburwaire kweyongera omu Isaleri, ekintu ekyaletiire baingi kufa (bakaleeta obucwi bw’ebiragiro, obusiihani, hamu n’okuramya ebisisani) ekintu ekitaakubaireho kakuba Abaisaleri baahondiire ekiragiro eky’okuhwerereza Abakanaani boona. (Kubar 33:55, 56; Bac 2:1-3, 11-23; Zab 106:34-43) Yahwe akaba atereriire Abaisaleri ngu nabo bakaba nibaija kuhwerekerezebwa kakuba baakoragaine n’Abakanaani, bakaswerana nabo, baketaba omu kuramya kwabo, kandi bakatandika n’okwetaba omu migenzo yabo ey’okuramya, ekintu ekyakurugiiremu Abaisaleri ‘ensi kubatanaka.’—Kurug 23:32, 33; 34:12-17; Lev 18:26-30; Bir 7:2-5, 25, 26.
Eby’Omuhendo Kuruga Omu Baibuli
it-1-E 359 ¶2
Omutaano
Hanyuma y’okukozesa okutoma kumanya rubaju ki nambere oruganda ruratunga obugwetwa bwarwo, kyayetagisaaga kucwamu ha bukooto bw’obugwetwa obusemeriire kuheebwa buli ruganda. Kusobora kukora kinu basigikirraga ha nsoga eyakabiri: Obukooto bw’oruganda. “Kandi muligwetwa ensi habwokutoma, [nk’ebika] byanyu okubiri; abaingi mulibaha obugwetwa bwingi, nabake mulibaha obugwetwa obuke. Nambere mulitomera omuntu wena, nuho haliba obugwetwabwe.” (Kubar 33:54) Encwamu eyarugaga omu kutoma erukwoleka orubaju tiyahindukaga, baitu kyayetagisaaga kuhinduramu obukyahikaga ha bukooto bw’obugwetwa. Nahabweki, obugwetwa obw’oruganda rwa Yuda obubwasangirwe ngu bukooto muno, bakabukeehya kandi ebicweka ebimu baabiheereza oruganda rwa Simeoni.—Yos 19:9.
MAAYI 24-30
EBITURUKWEGA KURUGA OMU BAIBULI | OKUBARA 34-36
“Foora Yahwe Bwirukiro Bwawe”
Yahwe Omufoire Obwirukiro Bwawe?
Baitu kiki ekyabahoga Omwisareri obu yaitaga omuntu atakigenderiire? Yajunanizibwaga esagama y’omuntu ogu n’obukiraba ngu yabaga amwisire atakigenderiire. (Okubanza 9:5) Baitu nabwo, Yahwe akagamba ngu akaba n’asobora kwoleka omuntu ogu embabazi. Anyakwisire atakigenderiire akaba n’asobora kwiruka omuhozi wenzigu kandi agende omu rumu ha mbuga mukaaga ez’okwirukiramu. Yatungaga obulinzi obuyaikirizibwaga kwikara omu rubuga oru. Baitu akaba asemeriire kwikara omu rubuga orw’okwirukiramu kuhikya nyakatagara omukuru obwalifa.—Okubara 35:15, 28.
Yahwe Omufoire Obwirukiro Bwawe?
Omunyaisaleri obuyaitaga omuntu atakigenderiire, akaba asemeriire kwiruka agende omu rubuga orw’okwirukiramu nukwo ‘asoborre ebigambo bye’ hali abakuru omu irembo ery’orubuga. Abakuru omu rubuga oru bakaba basemeriire kumutangirra. (Yosuha 20:4) Hanyuma y’obwire, bamuletaga hali abakuru b’orubuga nambere yaitiire omuntu, kumucwera omusango. (Soma Okubara 35:24, 25.) Abakuru obubaakizoraga ngu akaba atakigenderiire kwita omuntu, bamugarrayoga omu rubuga orw’okwirukiramu.
Yahwe Omufoire Obwirukiro Bwawe?
Omuntu anyakwirukire akaba aine obulinzi obuyabaga ali munda y’orubuga. Yahwe akabazaaho embuga zinu ati: “Zirabaga namberemuli ezokuirukiramu.” (Yosuha 20:2, 3) Yahwe akaba atarukwetagisa omuntu onu kwongera kucwerwa omusango. Kandi n’omuhoozi w’enzigu akaba atarukwikirizibwa kutaaha omu rubuga kumwita. Omuntu onu obuyaikaraga omu rubuga, yabaga ali hansi y’obulinzi bwa Yahwe. Yabaga atali omu nkomo. Akaba n’asobora kuba n’emirimo ey’okukora, kukonyera abandi, n’okuhereza Yahwe omu businge. Yabaga n’okusemererwa hamu n’obwomeezi oburungi!
Eby’Omuhendo Kuruga Omu Baibuli
w91-E 2/15 13 ¶13
Ekicunguro Ekisemeriire Habwa Boona
Ekicunguro tikisobora kugasira Adamu na Hawa. Omu biragiro bya Musa hakaba harumu omusingi gunu: “Timuliikiriza ebintu ebyokucungura obwomezi obwomuisi, agweriirwe omusango gwokufa.” (Okubara 35:31) Adamu atabiihwebiihwe, nahabweki akakora ekibi akigenderiire. (1 Timoseo 2:14) Ekiyakozere nikinganaingana n’okwita oruzaaro rwe, ekyarugiremu bakagwetwa obutahikirra bwe kandi nabo bagwerwa omusango ogw’okufa. Nikyeyolekira kimu ngu Adamu akaba asemeriire kufa, n’obukiraaba ngu akaba ahikiriire, akacwamu ayegondiize kujeemera ekiragiro kya Ruhanga. Kyakubaire kitarukwikiraniza n’emisingi ya Yahwe ey’okuhikirra kuhayo ekicunguru habwa Adamu. Baitu kusasurra ekibi kya Adamu kisobozesa kwihaho oruzaaro rwe omusango ogw’okufa! (Abarumi 5:16) Omu mulingo ogw’ebiragiro, endugirro y’amaani g’ekibi ekirukuhwerekereza ekaihwaho. Omucunguzi ‘akaroza ha kufa ha bw’abantu boona,’ yayetweka ebizibu byona ebihika ha baana ba Adamu habw’ekibi.—Abaheburaniya 2:9; 2 Abakolinso 5:21; 1 Petero 2:24.
MAAYI 31–JUUNI 6
EBITURUKWEGA KURUGA OMU BAIBULI | EKYEBIRAGIRO 1-2
“Ruhanga Nuwe Acwa Emisango”
w96-E 3/15 23 ¶1
Yahwe—Agonza Okuhikirra Hamu n’Obwinganiza
Abagurusi omu kitebe basemeriire kucwa omusango kakuba omuntu akora ekibi eky’amaani. (1 Abakolinso 5:12, 13) Obubaba nibacwa omusango baijuka ngu Ruhanga ow’obwinganiza n’agonza boleke okuganyira nambere kisemeriire. Baitu kakuba haba hataroho eky’okusigikirraho kuganyira, nk’ekyokurorraho anyakukozere ekibi kakuba ayanga kwegarukamu, okuganyira tikusemeriire kubaho. Baitu abagurusi b’ekitebe tibabinga ogu anyakukozere ekibi habw’okugonza kumusaliza rundi ngu leka akihurre. Baba nibanihira ngu kumubinga omu kitebe nikiija kumukonyera kumanyirra ekibi kye agonze kwegarukamu. (Lengesaniza na Ezekyeri 18:23.) Habwokuba nibaheerereza hansi y’obwebembezi bwa Kristo, abagurusi booleka ngu b’obwinganiza, kandi kinu nikitwarramu kuba “nkekiikaro ekyokweserekamu hali omuyaga.” (Isaya 32:1, 2) Nahabweki tibasemeriire kugwera orubaju kandi babe abarukwetegereza abandi.—Ekyebiragiro 1:16, 17.
w02-E 8/1 9 ¶4
Yorobera Obusobozi bwa Ruhanga
Kuba omucwi w’emisango kikaba kitarukugarukira ha kumanya ebiragiro kwonka. Habwokuba abakuru ab’omu Isaleri bakaba batahikiriire, bakaba baine kwegendereza kurora ngu bayeyihamu enyehurra embi nk’okwegondeza bonka, okusoroora, hamu n’omururu—ebikaba nibisobora kubaletera kucwa omusango ogutali gw’obwinganiza. Musa akabagambira ati: ‘Mucwege ebyobulyo. Mulihurra abato n’abakuru nibainganaingana: Mutalitiina amaiso g’abantu; baitu Ruhanga nuwe acwa emisango.’ Mali, abacwi b’emisango omu Isaleri bacwaga emisango omu ibara lya Yahwe. Ogu kagukaba mugisa gw’amaani!—Ekyebiragiro 1:16, 17.
Eby’Omuhendo Kuruga Omu Baibuli
w13-E 9/15 9 ¶9
Okwijukibwa kwa Yahwe kw’Okwesiga
Abaisaleri obubaatandikire orugendo orwamazire emyaka 40 nibaraba omu irungu “erikoto kandi eryokutinisa,” Yahwe atabagambire buli kimu ekirukukwata ha mulingo arabebemberamu, arabalinda, n’okubarolerra. Baitu nabwo, akaikara nabooleka ngu nibasobora kumwesiga n’okwesiga oburagirizi bwe. Obuykozese enyomyo ey’ekicu nyamusa n’ey’omurro ekiro, Yahwe akaijukya Abaisaleri ngu nabasagika obwakaba nabebembera kubarabya omu irungu erikaba litanguhire. (Bir. 1:19; Kurug. 40:36-38) Ekindi, akabahikyoho ebyetaago byobo. “Ebyokujwara byabu bitakule, nebigere byabu bitazimbe.” Mali, “batasege kintu” kyona.—Neh. 9:19-21.
JUUNI 7-13
EBITURUKWEGA KURUGA OMU BAIBULI | EKYEBIRAGIRO 3-4
“Ebiragiro bya Yahwe by’Amagezi Kandi by’Obwinganiza”
it-2-E 1140 ¶5
Okwetegereza
Kwekamba kwesomesa Ekigambo kya Ruhanga hamu n’ebiragiro bye n’okubiteeka omunkora, nikisobora kuletera omuntu kuba w’amagezi kukira barukumwegesa hamu n’okwetegera kukira abagurusi. (Zab 119:99, 100, 130; lengesaniza na Luk 2:46, 47.) Kinu nukwo kiri habwokuba amagezi n’okwetegereza nibisangwa omu biragiro bya Ruhanga; nahabweki Abaisaleri obubabihonderaga n’obwesigwa, kyaleteraga amahanga agabetoroire kubarora ‘nkabantu ab’amagezi n’okwetegereza.’ (Bir 4:5-8; Zab 111:7, 8, 10; lengesaniza na 1Bakam 2:3.) Omuntu arukwetegereza akimanya ngu Ekigambi kya Ruhanga nikyo kihikire, aba nagonza ebyarukukukora bihikaane nakyo, kandi asaba Ruhanga kumukonyera kukora eki. (Zab 119:169) Aikiriza obutumwa bwa Ruhanga kumuhika ha mutima (Mat 13:19-23), abuhandiika ha kibbali ky’omutima gwe (Nfu 3:3-6; 7:1-4), kandi anobera kimu “omuhanda gwona ogwebisuba” (Zab 119:104). Omwana wa Ruhanga obwakaba ali omu nsi, akoleka okwetegereza obu nakora ekintu kinu. Akahika n’okwikiriza kufeera ha muti, habwokuba kurora Ebyahandiikirwe byahikirra kikaba nikimwetagisa kufa omu mulingo ogu.—Mat 26:51-54.
w99-E 11/1 20 ¶6-7
Okugaba Obukweyongera
Hanyuma y’okuhunirra habw’ebintu eby’akaba arozere n’eby’akaba ahuliire, omu mulingo ogw’obwebundaazi omugo akagamba ati: “Nabairu bawe banu banyina omugisa, abarukwemerra, obutosa omu maiso gawe nibahurra amagezi gawe” (1 Ekyabakama 10:4-8) Omugo onu atagambe ngu abairu ba Sulemani bakaba basemeriirwe ngu habwokuba bakaba betworoirwe eby’obuguuda bingi hamu n’itungo. Ohireho, abaheereza ba Sulemani bakaba baine omugisa habwokuba bahulirizaaga butoosa amagezi Ruhanga ag’akaba amuhaire. Omugo wa Seba akateraho ekyokurorraho ekirungi abaheereza ba Ruhanga ab’akasumi kanu, abegondeza omu kwegaho amagezi ga Ruhanga hamu n’Omwana we Yesu Kristo!
Wetegereze ekintu ekindi omugo ekiyagambiire Sulemani: “Mukama Ruhanga wawe asiimwe.” (1 Ekyabakama 10:9) Amananu gali ngu akakyetegereza ngu Yahwe nuwe akaba naaha Sulemani amagezi n’enkurakurana. Kinu nikisisana n’ekintu Yahwe akaba araganiize Abaisaleri enyumaho. Akagamba ati: ‘Kulinda ebiragiro byange,’ nugo “magezi ganyu nokwetegereza kwanyu omu maiso gamahanga, abalihurra ebi byona ebitairweho, nibagamba ngu Mazimakwo ihanga eri erikuru, bantu abamagezi nokwetegereza.”—Ekyebiragiro 4:5-7.
w07-E 8/1 29 ¶13
Oli Muguuda omu Maiso ga Ruhanga?
Yahwe obw’aha abantu be emigisa, akira kubaha ekirukukirayo oburungi. (Yakobo 1:17) Nk’ekyokurorraho, Yahwe obuyahaire Abaisaleri ahokwikara, akabaha “ensi erukugera amata nobwoki.” N’obukiraaba ngu ensi eya Misiri nayo ekaba ebaziibweho omu mulingo nugwo gumu, ensi Yahwe eiyahaire Abaisaleri ekaba eri y’embaganiza omu mulingo gumu omukuru. Musa akagambira Abaisaleri ngu ekaba eri “ensi [Yahwe] Ruhanga wawe eyataho omutima gwe.” Ekirukumanyisa ngu bakaba nibaija kukurakurana habwokuba Yahwe akaba naija kwikara n’abarolerra. Abaisaleri obubaikaraga bali besigwa hali Yahwe, yabahaga emigisa nyingi kandi bayegondezaaga omu bwomeezi oburungi oburukukirra kimu obw’abantu ab’omu mahanga agaali gabetoroire. Ego, omugisa gwa Yahwe nugwo “gutungisa itungo”!—Okubara 16:13; Ekyebiragiro 4:5-8; 11:8-15.
Eby’Omuhendo Kuruga Omu Baibuli
w04-E 9/15 25 ¶3
Ebiturukwega Kuruga omu Kitabu Kyebiragiro
4:15-20, 23, 24—Ekiragiro ekirukutanga kukora ebisisani nikimanyisa ngu tikihikire kukora ekisisani kyona eky’okutimba rundi eky’omwoleko? Nangwa. Ekiragiro kinu kikaba nikitanga kukora ebisisani eby’okuramya kandi kikaba nikitanga ‘kubinamira n’okubiheereza.’ Ebyahandiikirwe tibitanga kuteera n’okusiiga ebisisani, kukora ebisisani ebibaizirwe rundi ebibumbirwe ebinyakukorwa n’ekigendererwa eky’okubitimba.—1 Ekyabakama 7:18, 25.
JUUNI 14-20
EBITURUKWEGA KURUGA OMU BAIBULI | EKYEBIRAGIRO 5-6
“Tendeka Abaana Baawe Kugonza Yahwe”
w05-E 6/15 20 ¶11
Abazaire Muhikyeho Amaka Gaanyu Ebyetaago Byago
Obukirukuhika ha nsonga enu, ekyahandiikirwe ekikira kubazibwaho muno nikyo Ekyebiragiro 6:5-7. N’osabwa kusukura Baibuli yaawe osome enkarra zinu. Wetegereze ngu abazaire nibatererwa kubanza kugumya enkoragana yabo na Yahwe kurabira omu kusoma Ekigambo kye buli kiro nukwo kibahike ha mutima kandi betegereze kurungi emihanda ya Yahwe, emisingi ye hamu n’ebiragiro bye. Ekirarugamu omutima gwabo nigwija kwijura amananu ag’omu Baibuli, ekintu ekirabaletera kusemererwa, kutiina Yahwe hamu n’okumugonza. Obu nubwo muratunga ebintu ebirungi bingi eby’okwegesa abaana baanyu.—Luka 6:45.
w07-E 5/15 15-16
Ninsobora Nta Kukonyera Abaana Bange Kutunga Obwegese Bwonyini?
Ebirooto byawe, ebigendererwa byawe, ebintu eby’orukutwara nk’ebikuru, tibyeyolekera omu by’obaza byonka, baitu n’eby’okora. (Abarumi 2:21, 22) Omwana obw’aba akyali nkerembe, ayega kusigikirra ha by’arukurora abazaire be nibakora. Abaana bamanya ebintu ebikuru hali abazaire baabo kandi nabo nibyo batwara kuba bikuru. Obworaaba n’ogonza muno Yahwe, abaana baawe nibaija kukirora. Nk’ekyokurorraho, nibaija kukirora ngu kusoma Baibuli hamu n’okwesomesa bikuru haliiwe. Nibaija kukyetegereza ngu oyebembeza Obukama omu bwomeezi bwawe. (Matayo 6:33) Kuba omu nsorrokano butoosa hamu n’okwejumbira omu mulimo gw’okutebeza, nikiija kubooleka ngu kuheereza Yahwe nikyo kirukukirrayo kimu obukuru hali iwe.—Matayo 28:19, 20; Abaheburaniya 10:24, 25.
w05-E 6/15 21 ¶14
Abazaire Muhikyeho Amaka Gaanyu Ebyetaago Byago
Nk’oku omu Ekyebiragiro 6:7 harukwoleka, haroho enyikara nyingi nambere inywe abazaire musobora kubazaaho ebintu eby’omwoyo n’abaana bantu. Kamube muli mu rugendo, nimukora hamu emirimo omu ka rundi muhumwireho, nimusobora kukozesa emigisa egi kugambiraho abaana banyu ebintu eby’omwoyo. Ky’amananu ngu obworukuba n’obegesa amananu ag’omu Baibuli tosemeriire kwikara n’obaragiraburagira ekibasemeriire kukora. Baitu kurabira omu kubaza omu mulingo omurungi kandi ogurukwombeka, n’osobora kubagambiraho ebintu eby’omwoyo. Nk’ekyokurorraho, magazini eya Awake! erumu ebicweka bingi ebirukubazaaho ensonga ezirukwahukana. Ebicweka nk’ebi nibisobora kubakonyera kubazaaho ebintu Yahwe ebiyahangire nk’ebisoro, ebiikaro ebirungi ebyetoroire ensi, hamu n’obuhangwa bw’abantu oburukwahukana. Ebintu nk’ebi nibisobora kuletera abato kweyongera kugonza kusoma ebitabu ebituhebwa omwiru omwesigwa kandi ow’amagezi.—Matayo 24:45-47.
Eby’Omuhendo Kuruga Omu Baibuli
Okugonza n’Obwinganiza omu Isaleri eya Kara
Ebiturukwega: Yahwe tarora enzoka y’omuntu ey’aheru yonka. Arora eki kyonyini ekiri omu mutima. (1 Sam. 16:7) Tiharoho ekitekerezo, enyehurra rundi ekikorwa ekitusobora kumusereka. Aserra ebirungi ebitwine kandi nibyo atwekambisa kukora. Baitu n’agonza twekebere turole ebitekerezo ebibi ebitwine kandi tubirwanise bitakafookere ebikorwa ebibi.—2 Byom. 16:9; Mat. 5:27-30.
JUUNI 21-27
EBITURUKWEGA KURUGA OMU BAIBULI | EKYEBIRAGIRO 7-8
“Otaliswerana Nabo”
w12-E 7/1 29 ¶2
Habwaki Yahwe Yagonzaaga Abaheereza Be Baswere Abantu Abarukumuramya Bonka?
Yahwe akaba akimanyire ngu Sitaani akaba n’agonza kusiisa abantu be obu nabahabya kubatwara omu kuramya ba ruhanga ab’ebisuba. Nahabweki Ruhanga akagumizaamu n’atererra abantu be ngu abantu abatarukumuramya bakaba nibaija ‘kuhindura batabani baabo baleke okumukuratira, baheereze ba ruhanga abandi.’ Mali gunu gukaba mutego gw’amaani. Kakuba Abaisaleri baagwire omu mutego ogw’okuramya ba ruhanga ab’ebisuba, Ruhanga yakubaihireho obulinzi bwe kandi abanyanzigwa baabo bakubahwerekeriize. Hati, ihanga lyakurugirwemu lita Masiya? Nitukirorra kimu ngu Sitaani akaba aine ensonga habwaki yalengereho kusoonasoona Abaisaleri kutaaha omu buswere n’abantu abatarukuramya Yahwe.
w15-E 3/15 30-31
Omu Kasumi Kanu Kikyali ky’Amagezi Kuswera Rundi Kuswerwa “omu Mukama Waitu” Honka?
Baitu nabwo, omu Kigambo kye, Yahwe naturagira kuswera rundi kuswerwa omu Mukama waitu honka. Habwaki? Habwokuba nagondeza abaheereza be ebirungi byonka. Nagonza batahikwaho ebizibu ebiruga omu kukora encwamu ezitahikire kandi batunge okusemererwa. Omu kasumi ka Nehemiya Abayudaaya baingi obubaali nibataaha omu buswere n’abanyamahanga abaali batarukuramya Yahwe, Nehemiya akabaijukya ekyokurorraho ekya Sulemani. N’obukiraaba ngu Sulemani “akagonzebwa Ruhanga we, . . . abakazi abanyaihanga bakamusisisa.” (Neh. 13:23-26) Habwokuba Ruhanga nagondeza abaheereza be ebirungi, niyo ensonga habwaki abahaire ekiragiro eky’okutaaha omu buswere n’omuntu arukumuramya omu mananu wenka. (Zab. 19:7-10; Is. 48:17, 18) Abakristaayo ab’amananu basiima muno Ruhanga habw’okubafaaho kandi besigira kimu oburagirizi bwe. Bakimanyire ngu Mulemi w’Obuhangwa Bwona kandi bamworobera nk’Omulemi wabo.—Nfu. 1:5.
w15-E 8/15 26 ¶12
Wegendereza Abanywani Aborukutunga omu Biro Binu Ebya ha Mpero
Kukira muno, Abakristaayo abatali omu buswere baitu abarukugonza kubutaaha basemeriire kwegendereza muno abanywani barukutunga. Ekigambo kya Ruhanga kitutererra kiti: “Mutetaba nabatarukuikiriza okutainganaingana: Baitu okuhikirra kuyina omugabo ki nobwemi? rundi omusana nuguterana guta nomuirima?” (2 Kol. 6:14) Baibuli etererra abaheereza ba Ruhanga abarukugonza kutaaha obuswere, kuswera rundi kuswerwa “omu Mukama waitu” honka, ekirukumanyisa ngu basemeriire kutaaha omu buswere n’omuntu ayayehaireyo hali Yahwe, yabatizibwa kandi arukuhondera emisingi ya Baibuli omu bwomeezi bwe. (1 Kol. 7:39) Omukristaayo obwaswera rundi akaswerwa omuntu ow’arukuheereza Yahwe, bakonyerangana kwikara bali besigwa hali Yahwe.
Eby’Omuhendo Kuruga Omu Baibuli
w04-E 2/1 13 ¶4
Yahwe Atuha Ebyetaago Byaitu Ebya Buli Kiro
Omu saara zaitu, obuturukuba nitusaba ebyokulya ebya buli kiro, kisemeriire kutwijukya ngu nitwetaaga n’ebyokulya eby’omwoyo. Sitaani obuyayoheze Yesu kufoora ibaale omugaati, ataikirize n’obukiraaba ngu akaba n’arumwa enjara hanyuma y’okumara akasumu akaraihire asiibire. Yesu akagamba ati: “Kikahandikwa ngu Omuntu taba mwomezi nebyokulya byonka, baitu nekigambo kyona ekiruga omu kanwa ka Ruhanga.” (Matayo 4:4) Hanu, Yesu akaba najuliza ebigamba bya Musa ayagambiire Abaisaleri ati: “[Yahwe] akakubundaza, yakuletera enjara, yakulisa emanu eyotaramanyire, nabaswenkuru batagimanye; akumanyise ngu omuntu taba mwomezi nebyokulya byonka baitu nekigambo kyona ekiruga omu kwanwa ka [Yahwe] nukwo omuntu aba mwomezi ati.” (Ekyebiragiro 8:3) Omulingo Yahwe yagabiireemu Abaisaleri emanu, kitabaletere kutunga ebyokulya eby’omubiri byonka baitu kikabegesa n’amasomo omu by’omwoyo. Ekyokurorraho, bakaba basemeriire “okusoroza bukyabukya omugabo ogwizoba limu.” Obubasoroize nyingi erukuhinguza ha y’ekiro kimu, eyasagireho ekatandika kunuunka kandi yaijwamu enzito. (Okuruga 16:4, 20) Baitu kinu kitabeho ha kiro kyamukaaga, obubaasoroize ey’ebiro bibiri, otwaliiremu n’ey’okukozesa ha kiro kya Sabbiiti. (Okuruga 16:5, 23, 24) Nahabweki emanu yabaijukyaga ngu baine kworobera Yahwe kandi ngu obwomeezi bwabo tibwasigikirraga ha byokulya byonka baitu ha ‘kigambo kyona ekiruga omu kanwa ka Yahwe.’
JUUNI 28–JULAAYI 4
EBITURUKWEGA KURUGA OMU BAIBULI | EKYEBIRAGIRO 9-10
“[Yahwe] Ruhanga Wawe Nakugonzaho Ki?”
w09-E 10/1 10 ¶3-4
Yahwe n’Akusaba Ki?
Kiki ekisobora kutwekambisa kworobera Ruhanga twegondiize? Musa akabazaaho ekintu kimu obuyagambire ngu: “Otiinege Yahwe Ruhanga wawe.” (Orukarra 12, NW) Kunu tikuli kutiina okw’okuhikwaho akabi, baitu kuli kutiina kubiihiza Ruhanga hamu n’okutamu ekitiinisa ebiragiro bye. Obuturaaba twine okutiina kwa mulingo gunu, nikiija kutukonyera kwerinda kukora ebintu ebirukumubiihiza.
Baitu nsonga ki enkuru ey’esemeriire kutwekambisa kworobera Ruhanga? Musa n’atugambira ati: “Omugonzege [Yahwe], okorrege Mukama Ruhanga wawe nomutima gwawe gwona nobwomezi bwawe bwona.” (Orukarra 12) Okugonza Ruhanga teri nyehurra kwonka. Okuseruliriza kumu nikwoleka ngu: “Ekigambo eky’Oruheburaniya nambere ekigambo enyehurra kyaihirwe haroho obukimanyisa ebikorwa omuntu ebyakora kwoleka enyehurra ye.” Okuseruliza nukwo kumu nikwoleka ngu kugonza Ruhanga nikimanyisa “kukora ebintu ebirukwoleka ngu nitumugonza.” Eki nikimanyisa ngu, mali obuturukuba nitugonza Ruhanga nitwija kukora ebintu ebiturukumanya ngu nibimusemeza.—Enfumo 27:11.
w09-E 10/1 10 ¶6
Yahwe n’Akusaba Ki?
Kworobera Yahwe twegondiize kirugamu emigisa nyingi. Musa akahandiika ati: ‘Okwatege ebiragiro . . . ebindukukuragira hati habw’omugisa gwawe.’ (Orukarra 13) Mali ebiragiro bya Yahwe hamu n’ebintu byona eby’atusaba kukora, bigasira itwe nk’abantu. Habwaki nitugamba tuti? Habwokuba Baibuli egamba ngu “Ruhanga nukwo kugonza.” (1 Yohana 4:8) Nahabweki atuhaire ebiragiro bye nukwo bitugasire ebiro byona. (Isaya 48:17) Kukora byona Yahwe ebyarukutwetagisa nikiija kutukonyera kwetantara kuhikwaho ebizibu bingi hati kandi omu kasumi k’omu maiso tutunge emigisa ey’etalihwaho hansi y’Obukama bwe.
cl-E 16 ¶2
Mali n’Osobora ‘Kwirra Haihi Ruhanga’?
Iburahimu ali omu h’abantu abayegondiize omu kuba n’enkoragana enungi muno na Ruhanga. Yahwe akabazaaho omuheereza we onu ngu “enganjani yange.” (Isaya 41:8) Ego, Yahwe akatwara Iburahimu kuba enganjaniye nfe na nfe. Iburahimu akasobora kuba n’enkoragana nk’egi habwokuba “akaikiririza omuli Yahwe.” (Yakobo 2:23, NW) Na kasumi kanu, Yahwe aserra ensonga ez’asobora kusigikirraho “kwirra haihi” abo abarukumuhereza habwokuba nibamugonza. (Ekyebiragiro 10:15) Ekigambo kya Ruhanga nikitwesengereza ngu: “Muirre haihi Ruhanga, nauwe alibairra haihi.” (Yakobo 4:8) Omu bigambo binu niturora ngu harumu okuraaliza hamu n’omurago.
Eby’Omuhendo Kuruga Omu Baibuli
it-1-E 103
Anakimu
Oruganda rw’abantu abakaba bali bakooto muno kandi abaikaraga omu bicweka eby’ensozi omu nsi ya Kanaani hamu n’omu bicweka ebiri ha mwaro kukira muno eby’Omumasirimu g’ekiikaro eki. Haroho akasumi abasaija basatu abakaba bali ba ruranganwa kandi batabani ba Anakimu obubaikaraga Heburoni, banu nubo , Ahimani, Sesai, na Talimai. (Kubar 13:22) Oku nuho entasi 12 Abaheburaniya baroliire Abanakimu omurundi gwabo ogw’okubanza, kandi entasi 10 ubo bakaija nibagamba ebigambo ebirukutiinisa ha bintu ebibaarozere. Bakagamba ngu abasaija banu bakaba bali baijukuru ba Nefirimu abaabaireho Okusandaara kw’Amaizi kutakabaireho kandi ngu Abaheburaniya bakaba nibasisana nk’ensenene omu maiso gaabo. (Kubar 13:28-33; Bir 1:28) Ekyemerro kyabo kikongera kyakozesebwa kulengengesaniza n’abantu abandi abaraihire kandi abakooto aba Emimu na Refaimu. Nikisobora kuba ngu habw’amaani gaabo hakarugamu n’orufumu orurukugamba ngu: “Noha asobora okwemerra omu maiso gabana ba Anaki?”—Bir 2:10, 11, 20, 21; 9:1-3.