N’osobora Kucwamu nk’Oku Orukugonza Obusumi Bwawe obw’Omumaiso Kuba

Haihi nk’emyaka 3,500 enyuma, Yahwe Ruhanga akagambira abantu abakaba nibamuramya ekibasemeriire kukora obubaraaba nibagonza kuba n’obusumi bw’omumaiso oburungi. Akabagambira ati: “[Ntaireho] omu maiso gawe obwomeezi nokufa, ebyomugisa nebyokukyenwa: nukwo oyegomboze obwomeezi, oikalege oli mwomeezi, iwe nabaijukuru bawe.”—Ekyebiragiro 30:19.

Kusobora kuba n’obusumi bw’omumaiso oburungi, abantu abo baali baine kukora encwamu ey’ehikire. Naitwe kasumi kanu nikyo tusemeriire kukora. Baibuli etugambira omulingo tusobora kuba n’obusumi bw’omumaiso oburungi. N’egamba ngu tusemeriire; ‘Kugonzaaga Yahwe Ruhanga, n’okuhurraga iraka lye.’—Ekyebiragiro 30:20.

NITUSOBORA TUTA KUGONZA YAHWE TUKAHURRA IRAKA LYE?

YEGA BAIBULI: Kusobora kugonza Yahwe, osemeriire kubanza kumwegaho kuraba omu Baibuli. Obworakikora, noija kukimanya ngu ali Ruhanga ow’okugonza kandi nagonza obe n’obwomeezi oburungi. Nakuraaliza kumusaba habwokuba “nabitaho omutima ebigambo [byawe].” (1 Petero 5:7) Baibuli n’etugambira ngu kakuba tulengaho kumwirra haihi, ‘nauwe alitwirra haihi.’​—Yakobo 4:8.

TEEKA OMU NKORA EBYORUKWEGA: Kuhuliiriza Ruhanga nikimanyisa kuhondera obuhabuzi oburukusangwa omu Baibuli. Obworakikora, “nubwo oliterekereza omuhanda gwawe, kandi nubwo olibona omugisa.”—Yosuha 1:8.