Kujumbira Okurukuhaisa Yahwe Ekitiinisa

1-2. Abantu abamu behurra bata ha kujumbira?

AKASUMI ak’okujumbira nikasobora kuba kasumi ak’okwegondezaamu kandi akarukuleeta okusemererwa. Obworaaba oliyo nojumbira hataroho kugurukyagurukya nogonza kwegondeza omu kasumi ako. Kandi abarukujumbirangana baingi bakegondizeemu. Munyaanya itwe arukwetwa Tsion,a kuruga Ethiopia, nagamba ati: “Bumu ha busumi nayegondizeemu nubwo nyowe na iba nyowe obutukaba tujumbiirengana. Twabazaahoga ensonga enkuru baitu kandi tusemererwa hamu. Nkasemererwa obunatungire omuntu oundukugonza kandi nauwe nangonza.”

² Baitu ow’oruganda arukwetwa Alessio, kuruga omu Netherlands, nagamba ati: “Nkegondeza omu kumanya mukazi wange obutukaba tukyajumbiirengana, baitu omu kasumi nuko kamu tukatunga emitalibaine.” Omu kicweka kinu nitwija kubazaaho emitalibaine abarukujumbirangana eibasobora kutangatangana n’emisingi ya Baibuli ey’esobora kubakonyera kugisingura. Ekindi, nitwija kubazaaho omulingo abandi omu kitebe basobora kukonyera abajumbiirengana.

EKIGENDERERWA KY’OKUJUMBIRA

3. Kujumbira kwine kigendererwa ki? (Enfumo 20:25)

³ N’obukiraaba ngu abantu abamu nibasobora kwegondeza omu kujumbirangana, kiri kintu ekikuru ekisobora kubakonyera kutaaha obuswere. Ha kiro ky’okugaitwa abarukutaaha obuswere barahira omu maiso ga Yahwe ngu nibaija kugonzangana kandi bateekemungana ekitiinisa obwomeezi bwabo bwona. Omu nyikara eza buli kiro, otakakozere ekirahiro kyona, osemeriire kubanza kukitekerezaaho muno. (Soma Enfumo 20:25.) Eki nukwo kiri obukirukuhika ha kirahiro eky’okutaaha obuswere. Kujumbira kukonyera abarukugonza kutaaha obuswere kumanyangana kurungi n’okukora encwamu enungi. Obwire obumu encwamu egi enungi eba y’okutaaha obuswere; kandi obwire obundi encwamu egi eba y’okuleka kujumbirangana. Obubacwamu kuleka kujumbirangana tikimanyisa ngu ekibakozere kibi. Oihireho kujumbira kuba kubakonyiire kumanya obubaraaba nibasobora kutaaha hamu omu buswere rundi nangwa.

4. Habwaki tusemeriire kuba n’entekereza ehikire ha kujumbira?

⁴ Habwaki kikuru kuba n’entekereza ey’ehikire obukirukuhika ha kujumbira? Abakristaayo abatali omu buswere obubaba n’entereza ey’ehikire ha kujumbira kibakonyera kwetantara kujumbira omuntu oubatarukugonza kutaaha nauwe obuswere. Baitu tibali nubo bonka abasemeriire kuba n’entekereza ey’ehikire ha kujumbira. Itwena nk’Abakristaayo tusemeriire kuba n’entekereza ey’ehikire ha kujumbira. Ekyokurorraho, abamu batekereza ngu ow’oruganda hamu na munyaanya itwe obubaraaba bajumbirengana basemeriire kutaaha obuswere. Entekereza enu ekwataho eta Abakristaayo abatali omu buswere? Munyaanya itwe Melissa owatali omu buswere, kuruga omu United States, nagamba ati: “Abakaiso ba Yahwe abajumbirengana batunga okusindikirizibwa okw’amaani. Ekirugamu abamu bagumizaamu nibajumbirangana n’obukiraaba ngu baba batasemeriirengana. Kandi abandi abatali omu buswere betantarra kimu kujumbira. Kandi eki kibaletera kwetuntura muno.”

MWEYONGERE KUMANYANGANA KURUNGI

5-6. Bintu ki abajumbiirengana ebibasemeriire kumanyahongana? (1 Petero 3:4)

⁵ Obumuraaba mujumbiirengana, kiki ekirabakonyera kucwamu kutaaha obuswere rundi nangwa? Mumanyangane kurungi. Nosobora kuba oine ebintu ebyomanyireho omuntu ogu otakatandikire kumujumbira. Baitu obwotandika kumujumbira, otunga omugisa ogw’okumanya ‘omuntu ow’omunda, omu mutima.’ (Soma 1 Petero 3:4.) Eki kitwarramu kumanya obwaraaba ali muntu ow’ebyomwoyo, engeso ze, hamu n’entekereza ye. Hanyuma y’akasumi osemeriire kuba n’osobora kuba n’ogarukamu ebikaguzo binu: ‘Omuntu onu araaba murungi ow’okutaaha nauwe obuswere?’ (Nfu. 31:​26, 27, 30; Bef. 5:33; 1 Tim. 5:8) ‘Ndamwoleka okugonza kandi ndamufaaho nk’oku kirukwetagisa? Kandi nauwe arakora nikyo kimu? Turasobora kugumisirizangana obukirukuhika ha butahikirra bwaitu?’b (Bar. 3:23) Obumuraaba nimulengaho kumanyangana, mwijuke ngu ekirukukira obukuru: Tibiri bintu ebimurukusisaniza baitu kuli kurora obumuraaba nimusobora kugumisirizangana obukirukuhika ha kutahikirra.

⁶ Bintu ki ebindi eby’osemeriire kumanya ha muntu obumurukuba mujumbiirengana? Otakatungire enyehurra ez’amaani ha muntu ogu, musemeriire kubanza kubazaaho ebintu ebikuru, nk’ebigendererwa ebyaine. Baitu kandi obukirukuhika ha nsonga ezirukukwata ha bwomeezi, ebizibu omu byentahya, n’ebintu ebibi omuntu ebiyarabiremu? Tikirukwetagisa kubazaaho ebintu binu byona ha kutandika kw’okujumbirangana. (Lengesaniza na Yohana 16:12.) Obworaaba noyehurra ngu tiwakugondeze kugarukamu ebikaguzo ebimu kasumi ako, nosobora kumugambira omulingo orukwehurra. Baitu hanyuma y’akasumi nikisobora kumwetaagisa kumanya ebintu ebi nukwo akole encwamu enungi. Nahabweki akasumi nikaija kuhika mubazeeho ebintu ebi.

7. Abajumbiirengana nibasobora bata kweyongera kumanyangana? (Rora akasanduuko “Kujumbirangana n’Omuntu ow’Ali Hara.”) (Rora n’ebisisani.)

⁷ Nosobora ota kumanya omuntu ogu ekyali omu mutima? Gumu ha miringo musobora kukikoramu nukwo kubalizangana mutarukuserekangana, kukaguzangana ebikaguzo n’okuhulirizangana kurungi. (Nfu. 20:5; Yak. 1:19) Obundi nimusobora kukora hamu ebintu ebirabaleetera kubaza hamu, nk’okuliira hamu, kurubata hamu, n’okukora hamu omu buheereza. Ekindi, nimusobora kweyongera kumanyangana kuraba omu kumara hamu obwire n’abanywani hamu n’abanyabuzaale. Ekindi, mukole entekaniza eziraabakonyera kumanya omulingo buli omu halinywe arukwetwaza omu nyikara ezirukwahukana n’obwarukuba ali n’abantu abarukwahukana. Wetegereze Aschwin, kuruga Netherlands ekiyalengereho kukora uwe na Alicia obubakaba bajumbiirengana, nagamba ati: “Twakoraga hamu ebintu ebyatukonyeraga kweyongera kumanyangana. Obwire oburukukira obwingi byabaga bintu bya buli kiro, nk’okucumba hamu n’okukorra hamu emirimo endi. Obutwabaga nitukorra hamu ebintu binu kyatukonyeraga kumanya kurungi emiringo yaitu enungi n’obutahikirra bwaitu.”

8. Abarukujumbiragana nibasobora kugasirwa bata kakuba besomesa hamu?

⁸ Ekindi, nimusobora kwongera kumunyangana kuraba omu kwesomesaaho ebintu eby’omwoyo. Obumurataaha obuswere nikiija kubetaagisa kutunga obwire obw’okuramya okw’eka, nukwo Ruhanga abe kicweka ekikuru eky’obuswere bwanyu. (Mug. 4:12) Nahabweki mutunge obwire obw’okwesomesa hamu obumurukuba mujumbiirengana. Ky’amananu ngu obumurukuba mujumbiirengana nimuba mutakafookere eka emu kandi ow’oruganda naaba atakafookere mutwe gwa munyaanya itwe. Baitu obumutunga obwire bw’okwesomesa hamu, kibakonyera kumanya omulingo buli omu atwaramu enkoragana ye na Yahwe. Eki kikakonyera muno Max na Laysa, abarukuruga omu United States. Max nagamba ati: “Obutukaba tutandikire kujumbirangana tukatandika kwesomesaaho ebitabu ebirukukwata ha kujumbirangana, obuswere, rundi eka. Eki kikatukonyera kubazaaho ensonga enkuru ezitukaba tutasobora kubazaaho kuba twali tutarukwesomesa hamu.”

EBINTU EBINDI EBY’OKUTEEKEREZAAHO

9. Bintu ki abajumbiirengana ebibasobora kusigikirraho kucwamu noha oubaragambira ngu bajumbiirengana?

⁹ Nibaha abumusemeriire kugambiraho ngu mujumbiirengana? Egi eri ncwamu yanyu, obumurukuba mwakatandika kujumbirangana nimusobora kucwamu kugambiraho abantu bake. (Nfu. 17:27) Eki nikisobora kubakonyera kwetantara kusindikirizibwa n’ebikaguzo ebihinguraine. Baitu kakuba mutagambiraho omuntu wena nimusobora kwikara nimwesoroora habwokuba timurukugonza omuntu wena kukimanya. Kandi kwikara nimwesoroora nikisobora kuba ky’akabi. Nahabweki kyamagezi kugambiraho abantu abamu abamurukumanya ngu nibasobora kubakonyera. (Nfu. 15:22) Nimusobora kugambiraho abanyabuzaale, abanywani abakuzire omu by’omwoyo, rundi abagurusi omu kitebe.

10. Abajumbiirengana nibasobora bata kwikaza okujumbirangana kwabo kuli kw’ekitiinisa? (Enfumo 22:3)

¹⁰ Kujumbirangana kwanyu nikusobora kuta kuba kw’ekitiinisa? Enyehurra zanyu obuziragenda nizeyongera nimwija kwirrangana haihi. Kiki ekirabakonyera kwetantara kukora ekintu ekirabiihiza Yahwe? (1 Kol. 6:18) Mwetantale kubazaaho ebintu ebitasemiire n’okunywa amarwa maingi. (Bef. 5:3) Ebintu binu nibisobora kubaleetera okwegomba okw’amaani kandi kibaleetere kukora encwamu ezitahikire. Habwaki mutabazaaho ebintu ebimusobora kukora kusobora kwikaza kujumbirangana kwanyu kuli kw’ekitiinisa? (Soma Enfumo 22:3.) Wetegereze ekyakonyiire Dawit na Almaz abarukuruga omu Ethiopia. Nibagamba bati: “Twamaraga hamu obwire omu biikaro nambere habaga abantu baingi rundi abanywani. Titwabaga itwenka omu motoka rundi omu nju. Eki kikatuleetera kwetantara enyikara ezakutuletiire kwohebwa.”

11. Bintu ki abajumbiirengana ebibasobora kutekerezaaho obukirukuhika ha bikorwa eby’okwolekangana okugonza?

¹¹ Abajumbiirengana basemeriire kukora ebikorwa eby’okwolekangana okugonza? Obu mweyongera kugonzangana nimusobora kucwamu kwolekangana okugonza omu miringo erukwahukana. Baitu kakuba okwegomba kwanyu okw’okuterana kweyongera, nikisobora kubagumira kukora encwamu enungi. (Kiz. 1:2; 2:6) Ekindi, kweyongera kwejumbira omu bikorwa eby’okwolekangana okugonza nikisobora kubagumira kwetanga kandi nimusobora kumalirra nimukora ekintu ekitarukusemeza Yahwe. (Nfu. 6:27) Nahabweki, kikuru kubazaaho nambere muragarukira mukyatandikire kujumbirangana obu nimusigikirra ha misingi ya Baibuli.c (1 Bas. 4:​3-7) Nk’abajumbiirengana mwekaguze: ‘Abantu ab’omu kiikaro kyaitu bararora bata ebikorwa eby’okwolekangana okugonza? Ebikorwa ebi biraimukya enyehurra zaitu ez’okuterana?’

12. Kiki abajumbiirengana ekibasemeriire kumanya obukirukuhika ha bizibu?

¹² Nimusobora muta kumaraho obutetegerezangana? Kakuba mutunga obutetegerezangana nikimanyisa ngu timusemeriirengana? Nangwa; habwokuba abagonzangaine boona batunga obutetegerezangana. Obuswere obugumire bukorwa abantu babiri abakorra hamu kumaraho obutetegerezangana. Nahabweki omulingo mumaraho obutetegerezangana kasumi kanu nigwija kwoleka obuswere bwanyu obuburaaba nibwija kubamu okusemererwa. Mwekaguze: ‘nitusobora kubazaaho ensonga omu mulingo ogutekaine kandi ogw’ekitiinisa? Twikiriza ensobi zaitu kandi tulengaho kusemezaamu? Twanguha kwitira eriiso ensonga ezimu, tusaba ekiganyiro rundi tuganyira?’ (Bef. 4:​31, 32) Baitu obumuraaba mutakira kwikiranganiza kandi nimukungana, enyikara terukwija kuhinduka n’obumurataaha obuswere. Kakuba okyetegereza ngu ow’ojumbiire tali nuwe wakugondeze kutaaha nauwe obuswere, kuleka kujumbirangana niija kuba eri encwamu eyerukukirayo oburungi eyeragasira inywena babiri.d

13. Kiki ekisemeriire kukonyera abajumbiirengana kumanya obwire obubasemeriire kumara nibajumbirangana?

¹³ Kujumbirangana kusemeriire kumara kasumi ki? Obwire oburukukira obwingi obutwanguhiriza kukora encwamu harugamu ebintu ebibi. (Nfu. 21:5) Nahabweki musemeriire kutwara obwire oburukumara kumanyangana kurungi. Baitu nabwo timusemeriire kumara obwire buraihire nimujumbirangana kukira nk’oku kisemeriire. Baibuli negamba ngu: “Okunihira okurukuikaraho gususunura omutima.” (Nfu. 13:12) Ekindi obumurayeyongera kumara hamu obwire nikiija kweyongera kubagumira kwangirra ekyohyo eky’okuterana. (1 Kol. 7:9) Omu kiikaro kyokuta omutima ha kasumi mumazire mujumbiirengana, wekaguze, ‘Kiki ekindi ekindukwetaaga kumanya ha muntu onu nukwo nsobole kukora encwamu?’

OMULINGO ABANDI BASOBORA KUKONYERA ABARUKUJUMBIRANGANA

14. Abandi nibasobora bata kukonyera abajumbiirengana? (Rora n’ekisisani.)

¹⁴ Obworaaba oine abantu ab’omanyire abajumbiirengana, n’osobora ota kubakonyera? Nitusobora kubaraaliza kulya hamu naitwe ekiihuro, rundi kuba naitwe omu kuramya okw’eka rundi kwesemezaamu. (Bar. 12:13) Eki nikisobora kubakonyera kweyongera kumanyangana kurungi. Nibetaaga omuntu ondi ow’okugenda nauwe rundi nibetaaga obukonyezi omu by’endubata rundi nibetaaga ekiikaro ekyokubalizaamu? Obukiraaba nukwo kiri, n’osobora kubakonyera? (Bag. 6:10) Alicia, outusangirwe tubalizeeho atugambira uwe na Aschwin ekyakizire kubasemeza. Alicia nagamba ngu: “Kikatusemeza muno ab’oruganda abamu obubaatugambiire ngu nitusobora kubabungira obuturukuba nitugonza ekiikaro ekyokubalizaamu tuli hamu.” Kakuba osabwa kusendekereza abajumbiirengana, gutwale nk’omugisa ogw’amaani. Wegendereze kutabaleka bali bonka, baitu nabwo kozesa okwetegereza obubaraaba nibetaaga obwire obw’okubaza hamu bali bonka.—Baf. 2:4.

15. Bintu ki ebindi abanywani ebibasobora kukora kukonyera abajumbiirengana? (Enfumo 12:18)

¹⁵ Ekindi, nitusobora kukonyera abajumbiirengana kuraba omu kumanya ebitusemeriire kubaza n’ebitutasemeriire kubaza. Kandi obwire obumu nikisobora kutwetagisa kwetanga. (Soma Enfumo 12:18.) Ekyokurorraho, nitusobora kuba twine ekihika eky’okugambira abandi ngu abantu banu batandikire kujumbirangana, baitu ijuka ngu abajumbiirengana nibasobora kuba nibagonza kubegambirra bonka. Baitu titusemeriire kurarangya ebirukukwata h’abajumbiirengana rundi kubacwera omusango ha nsonga ezirukukwata ha bwomeezi bwabo. (Nfu. 20:19; Bar. 14:10; 1 Bas. 4:11) Ekindi, titusemeriire kubaza ebintu rundi kubakaguza ebikaguzo ebirabaleetera kusindikirizibwa kutaaha obuswere. Munyaanya itwe arukwetwa Elise hamu na iba nibagamba bati, “Kyatuleeteraga kuswara abantu obubatukaguzaaga ha ntekaniza z’obugenyi ezitukaba tutakabalizeeho.”

16. Tusemeriire kwetwaza tuta kakuba abajumbiirengana baleka kujumbirangana?

¹⁶ Kiki ekitusemeriire kukora kakuba abajumbiirengana bacwamu kuleka kujumbirangana? Tusemeriire kwetantara kwetaahya omu nsonga zaabo. (1 Pet. 4:15) Munyaanya itwe arukwetwa Lea n’agamba ati: “Nkahurra abantu nibateebereza ensonga eyaletiire nyowe n’ow’oruganda kuleka kujumbirangana. Kikansaasa muno.” Nk’oku tusangirwe turozere, kucwamu kuleka kujumbirangana tikirukumanyisa ngu abaali bajumbiirengana bakakora encwamu embi. Eki kyoleka ngu ekigendererwa ky’okujumbirangana kikahikirra kandi kikakonyera abajumbiirengana kukora encwamu enungi. Baitu nabwo encwamu egi n’esobora kuba yabaletiire kwehurra kubi n’okuhurra amasu. Nahabweki tusemeriire kuserra omulingo turabakonyeramu.—Nfu. 17:17.

17. Kiki abajumbiirengana ekibasemeriire kugumizaamu nibakora?

¹⁷ Nk’oku turozere, abajumbiirengana nibasobora kutunga emitalibaine baitu nabwo nibasobora kukwegondezaamu. Jessica n’agamba ati: “Amananu gali ngu kujumbirangana kutwarramu ebintu bingi. Baitu kikansemeza ngu tukakozesa obwire n’amaani kumanyangana kurungi.” Obumuraaba mujumbiirengana, mugumizeemu kumanyangana kurungi. Obumurakora eki, nimwija kuba n’okujumbirangana okurungi kandi okurabakonyera kukora encwamu enungi.