Omulingo Osobora Kuba Munywani Omurungi
WAKEHURRAGA ngu oine ekizibu baitu okesanga ngu busaho muntu ow’asobora kukukonyera? Tuli omu ‘biro eby’akabi kaingi’ ebisobora kutuleetera kuhwamu amaani n’okwehurra tuli itwenka. (2 Tim. 3:1) Baitu, tikirukutwetaagisa kugumira ebizibu habwaitu itwenka. Baibuli ebazaaho omugaso gw’okuba n’abanywani abarungi omu ‘kasumi ak’obujune.’—Nfu. 17:17.
OMULINGO ABANYWANI ABARUNGI BASOBORA KUKONYERA
N’obu kiraaba ngu Paulo akaba atarukwikirizibwa kuruga omu nju, akasobora kuhikiiriza obuheereza bwe habw’obukonyezi bw’abanywani be abesigwa
Omukwenda Paulo akagasirwa omu banywani abaakaba aine omu rugendo rwe orw’obumiisani. (Bak. 4:7-11) Paulo obuyasibirwe omu Rooma, banywani be bakakora emirimo Paulo ey’akaba atasobora kwekorra wenka. Ekyokurorraho, Epaforodito akaha Paulo ebintu ebi akaba naayetaaga, ab’oruganda na banyaanya itwe ab’omu Firipi ebi baasindikire. (Baf. 4:18) Tukiko yatwaraga ebbaruha za Paulo omu bitebe ebirukwahukana. (Bak. 4:7; see study note.) Habw’obukonyezi kuruga omu banywani be, Paulo akasobora kuhikiriza obuheereza bwe n’obu kiraaba ngu akaba asibiirwe omu ka rundi ali wenka omu nkomo. N’osobora ota kuba munywani omurungi kasumi kanu?
Ebyokurorraho eby’akasumi kanu nibyoleka obukuru obw’okuba n’omunywani omurungi. Tekerezaaho ekyokurorraho kya munyaanya itwe ayayolekere ngu munywani murungi hali Elisabet, ow’arukuheereza nka payoniya ow’akasumi koona omu Spain. Nyina obu yasangirwemu oburwairwe bw’ekookoro, munyaanya itwe akasindikira Elisabet obutumwa oburumu enkarra za Baibuli ezirukugarramu amaani. Elisabet naagamba ati: “Obutumwa bunu bwankonyeraga kugumira ekizibu ekinkaba nindabamu buli kiro ntehuliire ngu ndi nyenka.”—Nfu. 18:24.
Nitusobora kugumya obunywani bwaitu n’aboruganda na banyaanya itwe kuraba omu kubakonyera omu mirimo y’ekitebe. Ekyokurorraho, obu turukuba twine ekiiruka, nitusobora kutwaraho ow’oruganda rundi munyaanya itwe ow’akuzire omu myaka omu nsorrokano rundi omu buheereza. Obu orakikora noija kwegondeza omu kugarramungana amaani. (Bar. 1:12) Baitu nabwo, Abakristaayo abamu tibarukusobora kuruga omu maka gaabo. Nitusobora tuta kuba banywani abarungi hali bo?
BA MUNYWANI OMURUNGI HALI ABO ABATASOBORA KURUGA OMU MAKA GAABO
Bamu h’Abakristaayo bagenzi baitu baine oburwaire obw’amaani rundi enyikara ezindi ebibalemesa kugenda omu nsorrokano maiso h’amaiso. Tekerezaaho ekyokurorraho kya David, ayasangirwemu oburwaire bw’ekookoro. Akamara emyezi mukaaga ali ha bujanjabi bw’ekookoro. Omu bwire obu bwona, David na mukazi we, Lidia, baatungiraga ensorrokano omuka.
Busagiki bwa mulingo ki obu baatungire kuruga omu banywani baabo omu kitebe? Buli hanyuma y’orusorrokano, bamu hali abo abaabaga ha Kyombeko ky’Obukama baatungaga obwire bwokubaza na David na Lidia nibakozesa videoconference. Kwongerraho, David na Lidia obubahayoga ebyokugarukamu byabo, baatungaga obutumwa oburukubagarramu amaani kuruga omu Bakristaayo bagenzi baabo hanyuma y’ensorrokano. Kiki ekyarugiremu? David na Lidia batehurre ngu bali bonka.
Tunga obwire obw’okutebeza n’ab’oruganda na banyaanya itwe abatasobora kuruga omu maka gaabo
Obundi nitusobora kukora enteekaniza ez’okutebeza n’ab’oruganda rundi banyaanya itwe abatasobora kuruga omu maka gaabo? Kuraba omu kukora empindahinduka nke nukwo tusobole kukora na bo omu buheereza, nitusobora kubooleka ngu titubeeberwe. (Nfu. 3:27) Nosobora kutunga obwire nukwo obe na bo nimuhandiika amabbaruha rundi kutebeza nimukozesa esimu. Abo abatasobora kuruga omu maka gaabo, nibasobora kutweteranizaaho omu nsorrokano ez’obuheereza nibakozesa videoconference. David na Lidia bakasiima enteekaniza egi. David naagamba ati, “Kuba n’ab’oruganda na banyaanya itwe abaizire ha guruupu ey’erukugenda kutebeza, tukahurra ebi barukubazaaho hamu n’esaara kyatugarramuga amaani.” Ekindi, kaguza ow’oruganda rundi munyaanya itwe ow’atasobora kuruga omuka obu araaba naagonza tuleete omwegi waitu wa Baibuli omuka ye nuho twegerege.
Obu turakorra hamu n’ab’oruganda na banyaanya itwe abatasobora kuruga omu maka gaabo kandi tukamanya kurungi emiringo yabo enungi, nitwija kufooka banywani baabo nfenanfe. Ekyokurorraho, obu okora na bo omu buheereza kandi okarora omulingo barukukozesaamu Ekigambo kya Ruhanga kuhika ha mutima gw’omuntu, hataroho kugurukyagurukya noija kweyongera kwirra haihi na bo. Obu orasagika Abakristaayo bagenzi baawe omu by’omwoyo, noija kutunga abanywani abandi abahyaka.—2 Kol. 6:13.
Paulo akatunga okuhuumuzibwa habw’okuba na munywani we Tito. (2 Kol. 7:5-7) Ekyokurrorraho kyabo nikitwijukya ngu nitusobora kuhuumuza abo abali omu bwetaago hatali omu bigambo byaitu kyonka baitu n’okumara na bo obwire n’okubakorra emirimo.—1 Yoh. 3:18.
BA MUNYWANI OMURUNGI OMU BWIRE BW’OKUHIIGANIZIBWA
Ab’oruganda na banyaanya itwe omu Russia batuteriireho ekyokurorraho ekirungi eky’okusagikangana. Tekerezaaho ekyokurorraho kya Sergey na mukazi we Tatyana. Hanyuma y’abaserikale kwaza enju yabo, bakabatwara kukagulirizibwa. Tatyana nuwe yabandize kulekerwa kandi yagaruka omuka. Sergey naagamba ati: “Ahonaaho [Tatyana] obu yahikire omuka, munyaanya itwe omumanzi akaija kumubungira. Ab’oruganda na banyaanya itwe abandi bakaija kutukonyera kuteekaniza enju yaitu.”
Sergey ayongera agamba ati: “Ngonza muno Enfumo 17:17, nambere hagamba ngu: “Enganjani negonza obusumi bwona, mugenziwe ayazairwe habwobujune.” Nyeyongiire kurorra kimu amakuru g’ebigambo binu omu kasumi ak’okuhiiganizibwa nambere mbaire ntasobora kukagumira habwange nyenka. Yahwe ampaire abanywani abaine obumanzi kandi abankonyiire.”a
Nk’oku enyikara ziriyo nizeyongera kuguma muno, nitwetaaga abanywani abaratusagika kandi bakatugarramu amaani. Nitwija kubetaaga nokukiraho omu kasumi ak’omuhito omwingi. Nahabweki, leka tukole kyona eki turukusobora kuba omunywani omurungi kasumi kanu!—1 Pet. 4:7, 8.
a Rora ha jw.org ekicweka “Yahwe Ampaire Abanywani Abamanzi.”