Ensuhuuki—Obukaikuru bw’Abantu Baruga omu Ukraine

Ihanga lya Russia likatahirra erya Ukraine omu Febwali 24, 2022, kinu kikaletaho enyikara ey’egumangaine eyaletiire abantu baingi kucwamu kuruga omu ihanga lya Ukraine omu bwangu.a

“Hakateera bbomu nyingi. Enyikara ekaba n’etiinisa kandi tinsobora kugisoborra omu bigambo. Obutwakimanyire ngu haroho egaali z’omwika ezirukufurra abantu, tukacwamu kugenda. Ebintu byaitu byona tukabisigayo kandi twatwara ensaho entaito zonka. Tukatwara ebihandiiko ebirukutubazaaho, emibazi, amaizi hamu n’ebyokulya ebitarukusiisikara bwangu. Tukasigaho buli kimu kyona kandi twagenda ha gaali y’omwika obu bbomu nizihulika.”—Nataliia, kuruga Kharkiv, Ukraine.

“Tukaba tutarukutekereza ngu nihaija kubaho obulemu. Nkahurra bbomu nizihulika omu bicweka ebimu eby’orubuga kandi amadirisa gaali nigecikya. Nkacwamu kugenda kandi natwara ebintu ebirukwetaagisa byonka. Nkaruga omu ka saaha ibiri za nyenkyakara, natemba egaali y’omwika yampikya Lviv kandi hanyuma nkatemba bbaasi nagenda Poland.”—Nadija, kuruga Kharkiv, Ukraine.

Ebiri omu kicweka kinu

• Kiki ekiretiire abantu kweyongera kusuhuuka?

• Ensuhuuki nibasobora kwiha nkaha okunihira?

• Baibuli n’esobora kukonyera ensuhuuki kasumi kanu?

Kiki ekiretiire abantu kweyongera kusuhuuka?

Abantu ab’omu Ukraine bakatandika kusuhuuka amahe ga Russia obugaatahiriire ihanga eri. Baitu, Baibuli n’eyoleka ensonga enkuru eziretiire abantu kweyongera kusuhuuka:

• Gavumenti z’abantu tizisoboire kuhikyaho abantu ebibarukwetaaga. Abo abarukulema omu gavumenti, bakozesa obusobozi bwabo kumigiiriza n’okukora kubi abantu.—Omugambizi 4:1; 8:9.

• Sitaani Diabbolo, anyakuli omulemi w’ensi aletera abantu kukora ebintu ebibi kandi enu niyo ensonga habwaki Baibuli egamba ngu: ‘Ensi yoona ikaire omu mubi.’—Yohana 14:30; 1 Yohana 5:19.

• Oihireho ebizibu ebikaire nibitalibaniza abantu kumara emyaka nyingi, hati tuli omu kasumi akarangirweho omu bunabbi bwa Baibuli ngu: “Omu biro bya hanyuma ebiro ebyakabi kaingi biriija.” (2 Timoseo 3:1) Ekindi, ebiro ebi twakubiroliire ha bulemu, ebigwererezi, ibura ly’ebyokulya hamu n’endwara ez’amaani, kandi ebintu binu byakuletiire abantu kusuhuuka.—Luka 21:10, 11.

Ensuhuuki nibasobora kwiha nkaha okunihira?

Baibuli eyoleka ngu Omuhangi waitu Yahwe,b ali Ruhanga ow’agonza kandi ow’asaalirirwa ensuhuuki hamu n’abantu boona abahambiriziibwe kuruga omu maka gaabo. (Ekyebiragiro 10:18) Naraganiza ngu naija kumarraho kimu ebizibu byona ebihika ha nsuhuuki nakozesa gavumenti ye ey’omu iguru, erukumanywa nk’Obukama bwa Ruhanga, erukwija kugaruka omu kiikaro kya gavumenti ez’abantu. (Danieri 2:44; Matayo 6:10) Yahwe alikozesa Obukama bwe kwihaho Sitaani Diabbolo. (Abarumi 16:20) Obukama obu niija kuba gavumenti emu ey’erirema ensi yoona, kandi kinu kiriihaho okwebaganizaamu okuletwaho emitaano y’amahanga. Abantu omu nsi yoona baliba eka emu enyakuli omu bumu. Busaho muntu wena alyongera kuhambirizibwa kuruga omu ka ye habwokuba Baibuli eraganiza eti: “Baliikara omuntu wena hansi yomuzabibugwe, nomuntu wena hansi yomutinigwe; kunu tihalibaho alibatinisa: baitu akanwa ka [Yahwe] wamahe kagambire eki.”—Mika 4:4.

Obukama bwa Ruhanga nubwo bwonka obusobora kumarraho kimu kweyongera kw’ensuuhuki okuroho kasumi kanu. Yahwe naija kukozesa Obukama bwe kumarraho kimu ebizibu ebihambiriza abantu kuruga omu maka gaabo bakafooka ensuhuuki. Ekyokurorraho:

• Obulemu. “[Yahwe] amaraho obulemu kuhika ha mpero zensi.” (Zabuli 46:9) Kumanya omulingo Ruhanga aramarraho kimu obulemu soma ekicweka “Obusinge omu Nsi—Burabaho Buta?”

• Okumigiirizibwa n’obutabanguko. “[Yahwe] alicungura obwomezi bwabu omu kwenderezebwa nitima.” (Zabuli 72:14) Kumanya omulingo abantu basoboire kuhindura entekereza n’enyetwaza ebibaikaire nabyo kumara akasumi, soma ebicweka ebiri hansi y’omutwe “Omulingo Tusobora Kusingura Enobi.”

• Obunaku. “[Yahwe] alijuna omunaku obwakunga.” (Zabuli 72:12) Kumanya omulingo Ruhanga aramaraho endugirro y’obunaku, soma ekicweka “Nikisoboka Abantu Boona Kuba ha Rulengo Rumu omu by’Entaahya?”

• Ibura ly’ebyokulya. “Halibaho omweru [gwoburo] omu nsi.” (Zabuli 72:16) Kumanya omulingo Ruhanga arasobozesa abantu boona kutunga ebyokulya, soma ekicweka “Ensi Etarumu Enjara.”

Baibuli n’esobora kukonyera ensuhuuki kasumi kanu?

Ego. Oihireho kuha ensuhuuki okunihira okw’omu busumi obw’omu maiso, Baibuli n’esobora kubakonyera kuraba omu bizibu ebibarukutunga kasumi kanu.

Omusingi gwa Baibuli: “Mutatuntura na kake, baitu omu kusaba kwona nokwesengereza hamu nokusima mumanyisege ebimuserra hali Ruhanga. Kandi nobusinge bwa Ruhanga oburukukira okumanywa kwona kulirinda emitima yanyu nebitekerezo byanyu.”—Abafiripi 4:6, 7.

Ekigurukumanyisa: Omu nyikara yoona eyorayesangamu, saba Ruhanga akuhe obusinge omu bitekerezo n’omu mutima. Rora ekicweka “Abafiripi 4:6, 7—‘Mutatuntura na Kake.’”