Gasirwa Omu Kihongwa Kya Yesu
Omurundi gumu buli mwaka, Abakiso ba Yahwe n’abantu baingi besorooza hamu omu nsi yoona kwijuka okufa kwa Yesu nk’oku yaragiire. (Luka 22:19) Omukoro gukutukonyera kwoleka okusiima habw’ekintu ekikuru muno Yesu ekiyatukoliire obuyahaireyo obwomeezi bwe habw’abantu. Ekindi, kyoleka omulingo ekihongwa kya Yesu kisobora kutugasira hati n’omu kasumi ak’omumaiso.—Yohana 3:16.
Obworaaba wabaireho ha Kiijukyo ky’omwaka gunu rundi nangwa, n’osobora ota kugasirwa omu kufa kwa Yesu? Yesu akooleka ngu tusemeriire kukora ebintu bibiri ebikuru:
1. Kwega ebirukukwata hali Ruhanga na Yesu. Obwakaba nasaba Ise ow’omu iguru, Yesu akagamba ati: “Bunu nubwo bwomezi obutahwaho, okumanya iwe Ruhanga omu owanananu, nogu ouwatumire, Yesu Kristo.”—Yohana 17:3.
2. Kuteeka omu nkora eby’orukwega. Yesu akooleka ngu kikuru muno kuteeka omu nkora enyegesa ze. Ekyokurorraho, obwakaba namalirra Okwegesa kwe okwa ha Rusozi, akasiima abo boona ‘abahurra ebigambo bye, bakabikora.’ (Luka 6:46-48) Na ha murundi ogundi akagamba ati: “Muraba mumanyire ebi, munyina omugisa obumubikora.”—Yohana 13:17.
Wakugondeze kwega ebirukukiraho hali Ruhanga na Yesu? Wakugondeze kumanya omulingo osobora kuteeka omu nkora ebyorukwega? Haroho ebintu ebisobora kukukonyera.
Kwegesebwa Baibuli
Entekaniza enu ey’okwegesa abantu Baibuli hataroho kusasura sente, ekonyiire baingi kwega Baibuli n’okuteeka omu nkora ebibarukwega.
Genda ha mukura gwaitu oserre ekicweka Kwega Baibuli n’Okonyerwa Omuntu Ondi kumanya ebirukukiraho ha ntekaniza enu.
Rora vidiyo Webale Kutandika Kwega Baibuli kurora omulingo Abakaiso ba Yahwe beegesa abantu Baibuli.
Ensorrokano z’Abakaiso ba Yahwe
Buli wiiki, Abakaiso ba Yahwe basorrokana emirundi ebiri omu kiikaro nambere baramiza ekirukumanywa nk’Ekyombeko ky’Obukama rundi Kingdom Hall. Omu nsorrokano zinu, babazaaho Baibuli n’omulingo basobora kuteeka omu nkora ebibarukwega.
Buli omu natangirirwa omu nsorrokano zaitu. Kusigikirra ha nyikara y’ekicweka eky’orumu n’osobora kuzibamu maiso ha maiso rundi kuzibamu n’okozesa videoconferencing.
Rora vidiyo Biki Ebikolebwa omu Kingdom Hall? kumanya ebiba omu nsorrokano.
Kumanya ekitebe ekikuli haihi genda ha mukura gwaitu oserre nambere hali ekicweka Enso’rokano ez’Omu Kitebe ez’Abakaiso ba Yahwe.
Ebicweka ebiri ha mukura na vidiyo
Omukura gunu guroho ebicweka bingi na vidiyo nyingi ebirakukonyera kweyongera kumanya enyegesa za Yesu n’obukuru bw’okufa kwe.
Ekyokurorraho, kumanya omulingo okufa kw’omuntu omu kugasira abantu baingi muno, soma ebicweka binu. “Yesu Ajuna—Omu Mulingo Ki?” na “Habwaki Yesu yabonaboine Kandi Yafa?” rundi rora vidiyo Habwaki Yesu Yafiire?