Abakristaayo Basemeriire Kwetwaza Bata?—Baibuli Ekibazaaho Ki?

Kasumi kanu, abantu baingi omu nsi kibasemeza kweyeta bahondezi ba Yesu; baitu kandi beetwaza omu mulingo ogurukusaaliza abandi. Abamu nibeefaaho bonka, tibali beesigwa kandi tibaine mbabazi. Abandi nibasobora kugobeza ou bali na uwe omu buswere obu nibasiihana. Enyetwaza ya mulingo ogu neesobora kuleetera abantu abamu kwekaguza: ‘Mali Omukristaayo asemeriire kwetwaza ata?’

Mali Omukristaayo asemeriire kwetwaza ata?

Kyanguhire omuntu kugamba ngu Mukristaayo. Baitu eki tikirukumara. Kusigikirra ha Baibuli, Omukristaayo ali muntu ow’arukuhondera Yesu Kristo. (Ebikorwa by’Abakwenda 11:26) Yesu wenyini akagamba ati: “Obu muraikara omu kigambo kyange, nubwo murukwija kuba beegeswa bange mali.” (Yohaana 8:31) Kyamananu ngu busaho muntu asobora kworobera ebigambo bya Yesu binu kikumi ha kindi, baitu Omukristaayo ow’amananu asemeriire kuta omu nkora Yesu ebi yayegeseze kandi eki akyoleka kuraba omu ncwamu ezi akora omu bwomeezi bwe obwa buli kiro. Ekyokurorraho.

Abakristaayo baba n’okugonza

Yesu akagamba ati: “Nimbaha ekiragiro ekihyaka ngu, mugonzanganege nkooku na nyowe mbagondeze, na inywe nukwo mugonzanganege. Boona nuho balimanyira ngu muli beegeswa bange, obu muraagonzanganaga.”—Yohaana 13:34, 35.

Yesu eki yakozere: Akooleka abantu boona ngu naabagonza, atarukusigikirra ha sente ezi bakaba baine, obu ha kiikaro nambere barukuruga rundi baraaba bali rurangaanwa rundi nangwa. Akakiza abantu abakaba barwaire, yaliisa abakaba baine enjara, kandi yahayo obwomeezi bwe habwabo.—Matayo 14:14-21; 20:28.

Omulingo Abakristaayo basemeriire kwetwaza: Basemeriire kwoleka abandi okugonza kuraba omu kuba bantu abagabi, abatarukusoroora kandi abarukuganyira. Bakoonyera abantu abali omu bwetaago kandi baba beeteekaniize kwefeereza habw’abantu abandi.—1 Yohaana 3:16.

Abakristaayo basemeriire kuba beesigwa

Yesu akagamba ati: “Niinyowe . . . amananu.”—Yohaana 14:6.

Yesu eki yakozere: Akaba ali mwesigwa omu bintu ebi yabazaaga n’ebi yakoraga. Atakozese orugezigezi kuleetera abandi kukora ebi arukugonza rundi kubaleetera kwikiriza ekintu ekitahikire. Akaba amanyirwe nk’omuntu omwesigwa noobu kyakumuleetiire kuhiiganizibwa.—Matayo 22:16; 26:63-67.

Omulingo Abakristaayo basemeriire kwetwaza: Abakristaayo tibasemeriire kubiiha. Basemeriire kusasura emisoro, tibasemeriire kwiba kandi obu baba ha mirimo yabo, beekamba kukora nkooku baikirraniize n’abakama baabo. (Abarooma 13:5-7; Abefeeso 4:28) Tibagobeza abandi, tibaiba ebirengeso noobu kwakuba kubiiha rundi kugingirra ebihandiiko, otwaliiremu n’ebyokusaba emirimo.—Abahebburaniya 13:18.

Abakristaayo baba bantu b’embabazi

Yesu akagamba ati: “Mwije nambere ndi, inywena abajwahire muno n’abalemeriirwe, kandi ndaabahuumuza. Mwetweke ekikoligo kyange kandi munyegereho, habwokuba ndi muculeezi kandi ndi mwebundaazi omu mutima, kandi nimwija kutunga okuhuumura. Habwokuba ekikoligo kyange kyanguhire kuhimba, kandi n’omugugu gwange tigurukulemeera.”—Matayo 11:28-30.

Yesu eki yakozere: Yesu akaba ali muntu w’embabazi kandi akaleetera abantu kugonza kumwirra haihi. Yatangirraga abaana nambere ali, yahuumuzaaga abaabaga beetuntwire kandi yatwazaaga abandi omu mulingo ogw’ekitiinisa.—Marako 10:13-15; Luka 9:11.

Omulingo Abakristaayo basemeriire kwetwaza: Abakristaayo basemeriire kubaza n’abandi omu mulingo ogw’embabazi; tibakayuuka kandi tibajuma. (Abefeeso 4:29, 31, 32) Bafaaho abantu abandi kandi baserra omulingo baraabakoonyera.—Abagaratiya 6:10.

Abakristaayo baikara bali beesigwa hali ogu ou bali na uwe omu buswere

Yesu akagamba ati: “Ruhanga eki ateeraniize hamu, omuntu weena atalikibaganizaamu.”—Marako 10:9.

Yesu eki yakozere: Noobu kiraaba ngu Yesu atataahe obuswere, akateererra ababurumu kwikara bali beesigwa, buli omu hali mutaahi we. (Matayo 19:9) Ekindi, akabateererra kwetantara ebintu ebisobora kuleetera omuntu kusiihana, akasiisa enkoragana ei aine n’ou ali na uwe omu buswere.—Matayo 5:28.

Omulingo Abakristaayo basemeriire kwetwaza: Abakristaayo beetantara engeso ezirukumaramu obuswere ekitiinisa. (Abahebburaniya 13:4) Abali omu buswere basemeriire kutwazangana omu mulingo ogw’okugonza kandi ogw’ekitiinisa.—Abefeeso 5:28, 33.