Habwaki Abakaiso ba Yahwe batajaguza Krisimasi?
Ebintu ebitahikire ebikira kubazibwaho
Ekitahikire: Abakaiso ba Yahwe tibajaguza Krisimasi habwokuba tibaikiririza omuli Yesu.
Ekihikire: Tuli Bakristaayo. Twikiriza ngu Yesu Kristo nuwe wenka aratujuna.—Engeso Ezabakwenda 4:12.
Ekitahikire: Muleetera ab’omu maka kwebaganizaamu habwokuba nimubegesa kutajaguza Krisimasi.
Ekihikire: Tufaayo muno h’amaka g’abantu boona niyo ensonga habwaki tukozesa Baibuli kubakonyera kuba n’amaka agarumu okusemererwa.
Ekitahikire: Mufeerwa okusemererwa okuleetwa kugaba ebisembo ha Krisimasi, obusinge obubaho, hamu n’okugondeza abandi ebirungi.
Ekihikire: Buli kiro, tulengaho kuba bantu abagabi kandi ab’obusinge. (Enfumo 11:25; Abarumi 12:18) Ekyokurorraho, omulingo twetwazaamu omu nsorrokano n’omu kutebeza, nibihikaana n’obuhabuzi bwa Yesu oburukugamba ngu: “Mukahebwa kwonka muhege kwonka.” (Matayo 10:8) Ekindi, tuteeka omutima ha Bukama bwa Ruhanga habwokuba nubwo bwonka obuliretaho obusinge omu nsi.—Matayo 10:7.
Habwaki Abakaiso ba Yahwe tibajaguza Krisimasi?
Yesu akaturagira ngu twijukege okufa kwe hatali amazaarwa ge.—Luka 22:19, 20.
Abakwenda ba Yesu hamu n’abegeswa be abaabandize batajaguze Krisimasi. Ekitabu ekirukwetwa New Catholic Encyclopedia nikigamba ngu “kujaguza amazaarwa ga Yesu kukatandika omu mwaka 243 [Yesu Amazire Kuzaarwa],” harabireho emyaka nka kikumi hanyuma y’omukwenda ow’okumalirra amazire kufa.
Busaho bwakaiso oburukwoleka ngu Yesu akazaarwa Desemba 25, Baibuli tetugambira ekiro ekiyazaliirwemu.
Tukimanyire ngu Krisimasi terukusiimwa Ruhanga habwokuba endugirro yayo y’ekikafiire.—2 Abakolinso 6:17.
Habwaki mutamara gajaguza Krisimasi?
N’obukiraaba ngu baingi bakimanyire ngu endugirro ya Krisimasi y’ekikafiire, kandi Baibuli tegisagika, bagumizaamu nibagijaguza. Abantu nk’abo nibasobora kwekaguza: Habwaki Abakristaayo basemeriire kuleka kugijaguza? Habwaki batamara gajaguza?
Baibuli etututererra kukozesa obusobozi bwaitu obwokutekereza. (Abarumi 12:1, 2) Etwegesa kutwara amananu nk’ag’omuhendo. (Yohana 4:23, 24) Nahabweki n’obukiraaba ngu tufaaho omulingo abantu baturoramu, tulengaho kuhondera emisingi ya Baibuli abantu n’obubatatugonza.
N’obukiraaba ngu tucwamu kutajaguza Krisimasi, tukimanyire ngu buli muntu aine obugabe bw’okwecweramu kujaguza rundi kutajaguza Krisimasi. Titulemesa abandi kujaguza Krisimasi.