Habwaki Abakaiso ba Yahwe Bateeta Ekiikaro Nambere Basorrokanira Ekanisa?

Omu Baibuli, ekigambo ky’Oruyonaani ekihindurwa nka “ekanisa,” obwire obumu kimanyisa ekitebe ky’abantu abaramiza hamu hatali ekyombeko nambere basorrokanira.

Wetegereze ekyokurorraho kinu: Paulo obuyahandiikiire Abakristaayo ab’omu Rooma ebbaruha, akaramukya Akura na Pirisika. Kandi akongera yagamba ati: “Muramukye nekanisa eyomu nju yabu.” (Abarumi 16:5) Hanu, Paulo akaba atarukumanyisa ngu baramukye ekyombeko. Oihireho akaba namanyisa ngu baramukye abantu abaasorrokaniraga omu ka egi.a

Nahabweki, omu kiikaro ky’okweta ekiikaro nambere tusorrokanira ekanisa, tukyeta “Kingdom Hall” rundi “Ekyombeko ky’Obukama.”

Habwaki tukyeta “Ekyombeko ky’Obukama Eky’Abakaiso ba Yahwe”?

Habw’ensonga zinu ezoolekerwe hansi:

• Kiri kyombeko rundi ekiikaro nambere tusorrokanira.

• Nuho tusorrokanira kuramya Yahwe Ruhanga, kumuheera obwakaiso, n’okwega ebirukumukwataho.—Zabuli 83:18; Isaya 43:12.

• Ekindi, nuho tusorrokanira kwega ebirukukwata ha Bukama bwa Ruhanga, Yesu obuyabalizeeho muno omu kwegesa kwe.—Matayo 6:9, 10; 24:14; Luka 4:43.

Nitukusaba kugenda ha Kyombeko ky’Obukama ekiri haihi naiwe oyerorre wenka omulingo Abakaiso ba Yahwe batungamu ensorrokano zaabo.