Abakaiso ba Yahwe Bahindwire Baibuli Nukwo Ehikaane n’Enyegesa Zaabo?
Nangwa. Oihireho, obutukizoora ngu zimu ha nyikiriza zaitu tizirukuhikaana na Baibuli, tuzihinduramu.
Omu 1950, tutakaturukize Baibuli eya New World Translation of the Holy Scriptures tukabanza kukora okuseruliiriza. Tukakozesa empindura eya Baibuli ey’ekaba eroho nitusigikirra ha nyikiriza zaitu. Leka tubazeeho zimu ha nyikiriza zaitu ezikaireho zitahindukire kandi orole obuziraaba nizihikaana na Baibuli ekyeyegesa.
Twikiriza ngu: Ruhanga tali kicweka ky’obusatu. Omu Julaayi 1882, magaziini eya Zion’s Watch Tower ekagamba eti: “Abasoma ebitabu byaitu bakimanyire ngu twikiririza omuli Yahwe, Yesu hamu n’omwoyo ogurukwera, baitu titwikiririza omu nyegesa eyetarukusigikirra ha Baibuli erukugamba ngu Ruhanga omu, arumu ba Ruhanga basatu nk’oku abandi beegesa.”
“Haroho Ruhanga omu Isitwe, nambere haruga byona, kandi naitwe tuli haluwe: na Mukama waitu omu Yesu Kristo, kandi aikazaho byona, kandi aikazaho naitwe.” (1 Abakolinso 8:6) Yesu wenyini akagamba ati: “Isenyowe nankira obukuru.”—Yohana 14:28.
Twikiriza ngu: Busayo kubonabonesebwa omu murro ogutaraara. Magaziini eya Zion’s Watch Tower eya Juuni 1882, ekaba ine omutwe ogurukusigikirra ha Abarumi 6:23 ogurukugamba ngu “Empera Eyekibi Kufa.” Ekagamba eti: “Ebigambo binu byanguhire kwetegerezebwa kurungi. Mali nikihuniiriza kurora ngu baingi abagamba ngu nibaikiriza Baibuli nk’Ekigambo kya Ruhanga, bahakaniza ebigambo ebi obu nibagamba ngu Baibuli eyegesa ngu empera eyekibi nukwo kubonabonesebwa omu murro ogutaraara ebiro n’ebiro.”
Ekifubiro eky’okumalirra ekyabo abarukuhakaniza Ruhanga, tikiri eky’okubonabonesebwa ebiro n’ebiro baitu “kuhwerekerra ebiro nebiro.”—2 Abasesalonika 1:9.
Twikiriza ngu: Obukama bwa Ruhanga eri gavumenti ey’eroho kwo hatali enyehurra eri omu mutima. Magaziini eya Zion’s Watch Tower eya Desemba 1881, ekabazaaho Obukama bwa Ruhanga eti: “Kurora Obukama bwa Ruhanga bwatandika kulema, nibwija kubanza kuhwerekereza obukama obw’omu nsi bwona.”
Abakaiso ba Yahwe basigikirra ha empindura eya New World Translation kusagika enyikiriza zaabo?
Nangwa, tukozesa empindura ezindi nyingi eza Baibuli omu mulimo gwaitu ogw’okutebeza. Obutuba nitwegesa abantu Baibuli tubaha Baibuli eya New World Translation hataroho kusasura sente kandi kitusemeza kwegesa n’abantu abagonza kukozesa Baibuli ezaabo.