Amadiini Goona Nigasisana? Goona Nigahikya Hali Ruhanga?

Eky’okugarukamu kuruga omu Baibuli

Nangwa, amadiini goona tigarukusisana. Omu Baibuli harumu ebyokurorraho eby’amadiini maingi agatarukusemeza Ruhanga. Ganu gali omu miringo ebiri.

Omulingo 1: Kuramya baruhanga ab’ebisuba

Baibuli eyeta okuramya baruhanga ab’ebisuba ‘obutarumu,’ “ebisuba kwonka,” na ‘ebitarumu omugaso.’ (Yeremiya 10:3-5; 16:19, 20) Yahwea Ruhanga akaragira ihanga lya Isaleri eya kara ati: “Otaliba na baruhanga abandi kunu nyowe ndoho.” (Okuruga 20:3, 23; 23:24) Abaisaleri obubaramyaga baruhanga abandi, Yahwe yakwatwaga ekiniga.—Okubara 25:3; Ebyabalevi 20:2; Ekyabacwi 2:13, 14.

Ruhanga akyaine entekereza niyo emu ha kuramya “abarukwetwa baruhanga.” (1 Abakolinso 8:5, 6; Abagaratiya 4:8) N’aragira abo abarukugonza kumuheereza kwecweraho kimu abali omu kuramya okw’ebisuba, nagamba ati: “Muruge omulibo hagati, kandi [mubebaganizeeho].” (2 Abakolinso 6:14-17) Ediini zoona obuziraaba nizisisana kandi zoona nizihikya abantu hali Ruhanga, habwaki Ruhanga ahaire ekiragiro kinu?

Omulingo 2: Kuramya Ruhanga omu mulingo ogw’atarukusiima

Obwire obumu, Abaisaleri obubaabaga nibaramya Ruhanga, omu kuramya kwabu bataburamuga enyikiriza n’ebikorwa ebibakopere omu kuramya kw’abaruhanga ab’ebisuba. Baitu Yahwe atabaikirize kutabura okuramya okw’amananu n’okw’ebisuba. (Okuruga 32:8; Ekyebiragiro 12:2-4) Yesu akajumirra abebembezi b’amadiini ab’omu busumi bwe habw’omulingo baramyamuga Ruhanga. Haiguru bayefooraga ngu banyadiini kwo kandi kunu bakaba bali bagobya ‘nibalekaho ebigambo eby’ebiragiro ebikuru, nk’okucwa omusango ogw’obulyo, embabazi, n’okwikiriza.’—Matayo 23:23.

N’omu kasumi kanu, ediini ey’erukusigikirra ha mananu niyo yonka ehikya abantu hali Ruhanga. Amananu ganu nigasangwa omu Baibuli. (Yohana 4:24; 17:17; 2 Timoseo 3:16, 17) Amadiini agegesa ebintu ebitali omu Baibuli gaahukaniza abantu hali Ruhanga. Enyegesa nyingi abantu ezibatekereza ngu ziruga omu Baibuli, nk’enyegesa ey’obusatu, omwoyo ogutafa, n’omurro ogutaraara, zoona zikaruga hali abo abaaramyaga baruhanga ab’ebisuba. Okuramya okurukusagika enyegesa nka zinu nikuba kuli kwa “busa,” rundi kutaina omugaso, habwokuba omu kiikaro ky’okwegesa Ruhanga ebyarukugonza nikwegesa emigenzo ey’amadiini.—Marako 7:7, 8.

Ruhanga anobera kimu obugobya bw’amadiini. (Tito 1:16) Kusobora kukonyera abantu kwirra haihi na Ruhanga, amadiini gasemeriire kwegesa ebintu ebirakonyera abantu omu bwomeezi bwabo obwa buli kiro hatali emigenzo. Ekyokurorraho, Baibuli egamba ngu: “Omuntu wena obwayetekereza okuba wedini, obwatatanga orulimirwe, baitu nayebiha omutimagwe, edini yogu ya busa. Edini esemiire etaroho okusisikara omu maiso ga Ruhanga waitu kandi Isitwe niyo enu, okusura enfuzi nabafakati omu buhito gwabu, nokwerindaga okutabaho akamogo omu nsi.” (Yakobo 1:26, 27) Ebigambo “ediini eyetaine kamogo” nibimanyisa okuramya okurukwera kandi okutarumu obugobya.