Baibuli Egamba Ki ha Kwegonza Wenka?
Eky’okugarukamu kuruga omu Baibuli
Baibuli eyoleka ngu kihikire, kandi nikyetaagisa omuntu kwegonza kuhika ha rulengo orusemeriire. Okwegonza nk’oku nikutwarramu kwefaaho, kwetekamu ekitiinisa, n’okwerora nk’ow’omuhendo. (Matayo 10:31) Omu kiikaro ky’okukurakuraniza okwegondeza wenka, Baibuli eteeka okwegonza wenka omu kiikaro ekikusemeriire.
Nooha outusemeriire kubanza kugonza?
1. Okugonza Ruhanga nukwo kusemeriire kuba omu kiikaro eky’okubanza omu mitima yaitu. Baibuli eyegesa ngu ekiragiro ekirukukirrayo kimu nikyo: “Ogenzege [Yahwe] Ruhanga wawe nomutima gwawe gwona.”—Marako 12:28-30; Ekyebiragiro 6:5.
2. Ekiragiro ekyakabiri nikyo: “Gonza mutahi wawe nkokwoyegonza wenka.”—Marako 12:31; Ebyabalevi 19:18.
3. Nobukiraaba ngu omu Baibuli busamu kiragiro ekirukubalizaaho kimu okwegonza wenka, ekiragiro ekirukugamba “gonza mutahi wawe nkokwoyegonza wenka nikyoleka ngu tikiri kibi kandi ky’omugaso kuba n’orulengo orusemeriire orw’okwegonza wenka, n’okwetekamu ekitiinisa.
Yesu akabanza kugonza oha?
Yesu akooleka omulingo tusemeriire kumanya okugonza okutwiniire Ruhanga, omutaahi, n’okwaitu itwenka, kandi akegesa abegeswa be kuhondera ekyokurorraho kye.—Yohana 13:34, 35.
1. Akateeka okugonza okwainiire Yahwe omu kiikaro eky’okubanza n’okuhikiiriza omulimo Gwe. Egi niyo ensonga yagambire ati, “Baitu ensi emanye ningonza Isenyowe, kandi nka Isenyowe okuyandagiire, nukwo nkora nti.”—Yohana 14:31.
2. Yesu yagonzaaga omutaahi, kuraba omu kufaaho ebyetaago by’abandi kuhika ha rulengo rw’okuhayo obwomeezi bwe.—Matayo 20:28.
3. Nauwe akooleka ngu n’ayegonza kuraba omu kutunga obwire obw’okuhumuraho, kulya, hamu n’okwegondeza omu kumara obwire n’abahondezi be hamu naabo abaakufokere begeswa be.—Marako 6:31, 32; Luka 5:29; Yohana 2:1, 2; 12:2.
Kugonza abandi kukira nk’okwoyegonza wenka kirakehya ha kusemererwa kwawe n’okwetekamu ekitiinisa?
Nangwa, habwokuba tukahangwa omu kisisani kya Ruhanga, anyakwine omulingo omukuru ogw’okutegondeza wenka. (Okubanza 1:27; 1 Yohana 4:8) Kinu nikimanyisa ngu tukahangwa omu mulingo ngu tusemeriire kwoleka abandi okugonza. Kwegonza itwenka kwine obugarukiro, baitu nabwo tusemererwa muno obutugonza Ruhanga kukira ekintu ekindi kyona n’obututeeka omutima ha kukorra abandi ebirungi. Egi niyo ensonga habwaki Baibuli egamba ngu, “okugaba kwomugisa okukira okuhebwa.”—Engeso Ezabakwenda 20:35.
Kasumi kanu, abantu baingi bagamba ngu okusemererwa kuruga omu kwebembeza okwegonza wenka. Hali bo, “okwegonza wenka” kukagaruka omu kiikaro kya “gonza mutaahi waawe.” Baitu, ebyokurorraho kasumi kanu nibikigumya ngu abantu abaine obwomeezi oburungi n’okusemererwa nubo abo abahondera obuhabuzi bwa Baibuli obw’amagezi oburukugamba ngu: “Omuntu wena aleke okuserra ebye wenka, baitu aserre ebyabandi.”—1 Abakolinso 10:24.