Sente Nikyo Ekikoro ky’Obubi?

Eky’okugarukamu Kuruga omu Baibuli

Nangwa. Baibuli tegamba ngu sente mbi, rundi ngu sente nizo zirugirraho ebintu ebibi byona. Ebigambo “sente nikyo kikoro ky’obubi” ebimanyirwe muno biri kicweka kyorukarra orutahoireyo kandi nibihabisa. Ebigambo ebihikire Baibuli eby’ekozesa nibigamba ngu “okwegomba erupiya nikyo kikoro ekyobubi bwona.”a—1 Timoseo 6:10.

• Baibuli egamba ki ha sente?

• Habwaki Baibuli etuhabura ha kugonza sente?

• Obuhabuzi bwa Baibuli oburukukwata ha sente nibusobora kutugasira buta?

• Enkarra za Baibuli ezirukubazaaho sente

Baibuli egamba ki ha sente?

Baibuli eyoleka ngu kakuba tukokozesa sente omu mulingo ogw’amagezi, nizisobora kutukonyera, kandi nizitulinda ‘nk’orukomero.’ (Omugambizi 7:12) Ekindi, Baibuli ebazaaho kurungi abo aboleka abandi amakune, ekisobora nokutwarramu n’okugaba obukonyezi bwa sente.—Enfumo 11:25.

Baitu kandi, Baibuli etutererra kutamarra obwomeezi bwaitu ha kuserra sente. Egamba eti: “Omu kutekereza kwanyu muleke okwegomba erupiya; ebimunyinabyo nibyo bibamale.” (Abaheburaniya 13:5) Isomo liri ngu tusemeriire kurora sente omu mulingo ogusemeriire n’okutaserra eby’obuguuda. Oihireho, tusemeriire kumarwa ebintu ebiturukwetaaga nk’ebyokulya, ebijwaro, n’oburaaro.—1 Timoseo 6:8.

Habwaki Baibuli etuhabura ha kugonza sente?

Omuntu ow’omururu rundi ow’omukoijo tarukwija kutunga obwomeezi obutahwaho. (Abefeso 5:5) Habwokuba, omururu mulingo gw’okuramya ebisisani, rundi kuramya okw’ebisuba. (Abakolosai 3:5) Habw’okugonza kuhikiriza okwegomba kwabo, abantu ab’omururu baleka n’okuhondera emisingi ey’erukukwata ha kuba n’engeso enungi. Enfumo 28:20 nihagamba ngu: “Anyakurahuka okutunga talikira okubonabonesebwa.” Nibasobora n’okwohebwa kukora emisango nk’okutiinisiriza abandi, kunyaakura, kulya enguzi, kuhamba, n’okwita abandi.

N’obukiraaba ngu kugonza sente nikisobora kutaletera omuntu kukora engeso embi, nikisobora n’okurugamu ebintu ebindi ebibi. Baibuli egamba eti: ‘Abanyakugonza kutunga itungo bagwa omu kwohebwa n’omutego n’okwegomba kwingi okw’obutami okwakabi.’—1 Timoseo 6:9.

Obuhabuzi bwa Baibuli oburukukwata ha sente nibusobora kutugasira buta?

Kakuba tuhondera emisingi ya Baibuli ey’erukukwata ha sente nitwija kwikara n’ekitiinisa kyaitu, kandi na Ruhanga atusagike. Ruhanga n’araganiza abo abarukulengaho kumusemeza ati: “Tindikuleka na kake, kunu tindikuhemukira na kake.” (Abaheburaniya 13:5, 6) Ekindi, Yahwe ayongera atugumya nagamba ati: Omuntu owokwesiga aliba nomugisa mwingi.”—Enfumo 28:20.