Abarongo Abaabaire B’embaganiza

ABOOJO banu baali b’embaganiza, tinukwo? Nomanya amabara gabu? Omuhiigi akaba nuwe Esau, kandi ogu owakaba narolera entaama akaba nuwe Yakobo.

Esau na Yakobo baali barongo, baana ba Isaka na Rebeka. Isebo, Isaka akaaba nagonza muno Esau, habwokuba akaba ali muhiigi murungi ayaleteeraga ab’omuka ebyokulya. Baitu Rebeka yagonzaga Yakobo muno habwokuba akaba ali muculeezi kandi mwana murungi.

Isenkuru bo Iburahimu akaba akyaali mwomezi, kitekerezeho Yakobo nkoku yagonzaga muno kumuhuliriza n’okumugambira ebigambo bya Yahwe. Iburahimu akafa ahikiize emyaka 175 ey’obukuru, obu abarongo baali baine emyaka 15 ey’obukuru.

Esau obu yahikiize emyaka 40 ey’obukuru akaswera abakazi babiri ab’omunsi ya Kanani. Kinu kikabiihiza muno Isaka na Rebeka habwokuba abakazi banu baali tibarukuramya Yahwe.

Baitu kiro kimu, hakabaho ekintu ekyaletiire Esau kubihirirwa muno mugenzi we Yakobo. Obwire bukahika obwa Isaka okuha mutabani we omukuru omugisa. Nkoku akaba ali mukuru wa Yakobo, akaba nanihira kugutunga. Baitu Esau akaba agulize Yakobo obukuru bwe bw’okutunga omugisa nk’omwana omukuru. Baitu abaana banu ababiri obu bazairwe, Ruhanga akagamba ngu Yakobo nuwe yakutungire omugisa. Kandi kinu nikyo kyabaireho. Isaka akaha mutabani we Yakobo omugisa.

Obu Esau yamanyire ebyabaireho, nukwo kubihirirwa Yakobo. Akabihirwa muno n’okugamba ngu nagenda kwita Yakobo. Rebeka obu yabihuliire bikamweralikiriza muno. Rebeka akagambira iba, Isaka ati: ‘Nikijja kuba kibi muno kakuba Yakobo asweera abakazi abomu Kanani.’

Isaka akeeta Yakobo, mutabani we, yamugambira ati: ‘Otaliswera omukazi kuruga omu nsi ya Kanani. Hakiri ogende munju eyaswenkuru iwe, Besueri omu Harani. Oswere omu h’abahara ba Labani, mutabani we.’

Yakobo akahuliriza ise n’okugenderaho Harani omu banyabuzaale be.