Yakobo Akatunga Obugwetwa

Isaka akaba aine emyaka 40 obu yaswire Rebeka. Yamugonzaga muno kandi obwire bukahika bazara abaana boojo babiri abarongo.

Omwojo omukuru bamwetaga Esau, kandi omuto bamwetaga Yakobo. Esau yagonzaga kwikara omu kisaka habwokuba akaba amanyire kuhiiga. Baitu Yakobo uwe yagonzaga kwikara omu ka.

Omu kasumi ako, omwana omwojo omukuru bamuhaga itaka likooto hamu na sente ise obu yafaga. Obu nubwo bayetaga obugwetwa. Omu ka ya Isaka, obugwetwa bunu bukaba nibutwarramu Yahwe ebyakaba araganiize Iburahimu. Esau atafeho emirago enu, baitu Yakobo uwe akamanya obukuru bwayo.

Kiro kimu, Esau akagaruka omu ka ajwahire muno habwokuba akaba amazire ekiro kyona nahiiga. Akaboyerwa eby’okulya ebirungi ebi Yakobo akaba nacumba. Akamugambira ati: ‘Enjara endi kubi! Mpaho ha by’okulya eby’ocumbire!’ Yakobo akamugarukamu ati: ‘Ningenda kukuhaho, baitu banza ondaganize ngu naiwe nogenda kumpa obugwetwa bwawe.’ Esau yamugarukamu ati: ‘Nyowe eby’obugwetwa tibiri nibyo ndoho! Butwale. Nyowe ningoza eby’okulya byonka.’ Nonihra Esau eki yakozere kikaba ky’amagezi? Nangwa. Esau akagaba ekintu eky’omuhendo mwingi muno habw’eby’okulya byonka.

Isaka obu yakuzire muno, akagonza kuha mutabani we omukuru omugisa. Baitu Rebeka akakonyera Yakobo omutabani omuto nuwe atunge omugisa gunu. Esau obu yakyetegeriize, akakwatwa ekiniga kingi yagonza kwita mugenzi we. Isaka na Rebeka batagonze Yakobo kutunga akabi koona, nahabweki bakamugamba ngu: ‘Genda oikale na nyokoromi, Labani, kuhikya ekiniga kya Esau obu kirihwa.’ Yakobo akahuliiriza abazaire be yagenda nukwo batamwita.