Habwaki Musa Yairukire

DORA Musa nairuka kuruga omu Misiri. Norora n’abasaija abarukumuhambya? Nomanya habwaki nibenda kumwita? Katurole obuturaba turakizora.

Musa akakurra mu maka ga Faraho, omulemi wa Misiri. Musa akafooka musaija w’amagezi kandi w’omugaso muno. Musa akamanya kurungi ngu akaba atali Mumisiri, n’abazaire be benyini bakaba Baisareri.

Kiro kimu, obwakaba ahikize emyaka 40 ey’obukuru, akagenda kuramburaho abantu be nkoku bakaba bali. Kikaba nikisaliza muno kurora nkoku bakaba nibatwarwa kubi muno. Akarora Omumisiri nateera muno omwiru Omuisareri. Musa akamagamaga, obu yaboine hataroho muntu ondi weena arukumurora, akateera Omumisiri, yamwita. Hanyuma Musa akasereka omurambo gwe omu musenyu.

Ekiro ekyakurasireho, akagarukayo kurambura abantu be. Akatekereza ngu naija kubakonyera kulekeraho kuba abairu rubale. Kyonka akarora Abaisareri babiri nibarwana nukwo Musa kukaguza ogu akaba ali mu nsobi ati: ‘Habwaki n’orwana na mugenzi wawe?’

Nukwo omusaija kumugarukamu ati: ‘Noha yakufoire kuba mukuru n’okuba mucwi w’emisango? Noyenda kunyita nkoku oisire Omumisiri?’

Musa akatiina muno. Akakimanya kurungi nti abantu boona bakaba bamanyire eki akozire Omumisiri. Na Faraho akakimanya, nukwo kutuma abasaija abo kwija kwita Musa. Enu niyo nsonga habwaki Musa akaba aine kwiruka kuruga omu Misiri.

Musa obu yairukire kuruga omu Misiri, akagenda hara muno omu nsi y’Abamidiani. Oku niho yatangatanganire amaka ga Yesero n’okuswera omu h’abahara be ayayetwaga Zipora. Musa akafooka muliisa w’entaama za Yesero. Akamara emyaka 40 mu nsi ya Midiani. Hati akaba ahikize emyaka 80 ey’obukuru. Baitu kiro kimu Musa bwakaba naliisa entaama za Yesero, ekintu kyokuhuniriza kikabaho ekyahindwireho obwomezi bwe bwoona. Sukura orupapura nukwo turole ekintu ekyokuhuniriza ekyabaireho.