Ekisaka Nikyaka Omurro

Musa akaikara omu Midiani habw’emyaka 40. Akaswera kandi yazaara abaana. Kiro kimu obwakaba naliisa entaama haihi n’Orusozi Sinai, akarora ekintu ekirukuhuniriza. Omurro gukaba nigwaka omu kisaka baitu kitarukuhya! Musa obu yairiire haihi kurora ekintu kinu ekirukuhuniriza, akahurra iraka niriruga omu kisaka eki nirigamba: ‘Musa! Oteyongera kwirra haihi. Juramu enkaito zaawe habwokuba ekiikaro eky’oyemeriireho kiri ekirukwera.’ Yahwe nuwe akaba n’akozesa maraika kubaliza omu kisaka eki.

Musa akatiina muno yasweka amaiso ge. Iraka likagamba liti: ‘Mboine omulingo Abaisareri barukubonabona. Ninyija kubajuna kubaiha omu Misiri mbaleete omu nsi enungi. Niiwe arukwija kwebembera abantu bange kuruga Misiri.’ Torukutekereza ngu ekintu kinu kikahuniriza Musa?

Musa akamukaguza ati: ‘Abantu obu barankaguza noha antumire, mbagambire ki?’ Ruhanga akagarukamu ati: ‘Bagambire ngu Yahwe, Ruhanga wa Iburahimu, Isaaka, kandi Ruhanga wa Yakobo nuwe akutumire.’ Musa nauwe yayongera yamukaguza: ‘Baitu kandi, kakuba abantu banga kunyikiririzaamu?’ Yahwe akaha Musa ekintu eky’amunanwire ngu akaba n’agenda kumukonyera. Akaragira Musa kunaga omwigo gwe ha nsi kandi gwafooka njoka! Musa obuyakwasire enjoka enu omukira, ekagaruka yafooka mwigo. Yahwe akamugambira ati: ‘Obworakora eky’amahano kinu, abantu nibaija kumanya ngu ninyowe nkutumire.’

Musa amugambira ati: ‘Timanyire kubaza kurungi.’ Yahwe akamuraganiza ati: ‘Ninyowe arukwija kukugambira eky’okubaza, kandi ninyija kutuma mugenzi wawe Aroni kukukonyera.’ Musa obuyamanyire ngu Yahwe akaba n’agenda kumukonyera, Musa akatwara mukazi we n’abatabani be yagaruka omu ihanga lya Misiri.