Sulemani Omukama Ow’amagezi

SULEMANI akaba akyaali musigazi obu yafookere omukama. Nagonza muno Yahwe nokukuratira okuhabura Daudi oku yamuhaire. Yahwe nasiima muno Sulemani, nahabwekyo kiro kimu omu kiro, akamugambira omu kirooto ati: ‘Sulemani wakugondeze nkuhe ki?’

Sulemani nubwo kumugarukamu ati: ‘Yahwe Ruhanga wange, nkyali muto muno kandi tindukumanya kurungi kulema. Nahabwekyo ompe amagezi okulema abantu bawe mumulingo omurungi.’

Yahwe akasiima muno Sulemani eki yasabire. Nukwo kumugambira ati: ‘Habwokuba osabire amagezi hatali obwomezi oburungi rundi itungo, n’ahabwekyo ninyija kukuha amagezi maingi kukira omuntu wena eyali abaireho. Kandi ninyija n’okukuha nebyo ebyotasabire, ekitiinisa hamu n’itungo.’

Hakarabaho akaanya kake haija abakazi babiri n’ensonga yabu eyekaba egumire. Omukazi omu akasoborra ati: ‘Omukazi onu twikara omunju emu. Nkazaara omwana mwojo hanyuma y’okurabaho ebiro bibiri, nawe yazaara omwana ow’obwojo. Baitu mukiro ekimu, omwana we akafa. Baitu obu nkaba ngwijagire, akaleta omufu we yamunta haihi nukwo kutwara owange. Obu nasisimukire kandi nkarora omurambo gw’omwana, nketegereza ngu akaba atali wange.’

Hanyuma omukazi ondi akagamba: ‘Nangwa! Omwomezi nuwe wange, omufu nuwe owaawe!’ Omukazi ow’okubanza nukwo kugarukamu ati: ‘Nangwa! Omufu nuwe owaawe, omwomezi nuwe owange!’ Oku nukwo abakazi bagumire nibagamba bati. Hati Sulemani yakukozire ki?

Akatuma ngu bamuletere busitama, kandi obu bagiresere akaragira ati: ‘Saramu omwana omwomezi ebicweka bibiri. Buli mukazi omuhe ekicweka.’

Nyina w’omwana wenyine akarra nagira ati: ‘Nangwa! Otakikora. Mumumuhe amutwale!’ Baitu omukazi oli ondi akagamba ati: ‘Busaho nomu aine kumutwara; genda mumaiso omusalemu ebicweka bibiri.’

Hampero, Sulemani akagamba ati: ‘Otaita omwana! Muhe omukazi ow’okubanza. Nuwe nyina wenyini.’ Sulemani akamanya ngu nyina wenyini akaba nagonza muno omwana we, kandi akaba nasobora n’okumuha omukazi oli amutwale mukiikaro ky’okumwita. Abantu obu bahuliire nkoku Sulemani ajanguruire ensonga egyo, bakasemererwa muno kuba n’omukama ow’amagezi atyo.

Omubulemi bwa Sulemani, Ruhanga akaha abantu emigisa nyingi nukwo ensi ekeeza muno engano na sayiri, emizabibu n’emizaituni hamu n’ebyokulya ebindi. Abantu bajwaraga engoye enungi nokwikara omu maju amarungi. Buli muntu akaba n’ebintu ebirungi bingi.