Sulemani Ayombeka Yekaru

DAUDI obwakaba atakafiire, akaha Sulemani entegeka yoona kuruga hali Ruhanga ey’okwombeka yekaru ya Yahwe. Omu mwaka gwa kana gw’obulemi bwe, Sulemani akatandika kwombeka Yekaru kandi ekatwara emyaka musanju n’ekicweka kumalirizibwa. Abakozi nkumi n’enkumi bakakozesebwa mukwombeka Yekaru kandi ekyombeko kikatwara sente nyingi muno. Kinu kikaba kiti habwokuba bakakozesa ezabbu hamu n’efeeza mu kwombeka.

Yekaru ekaba ine ebisiika bibiri nkoku ehema ekaba eri. Baitu ebisiika binu bikaba bikooto emirundi ebiri okukira ebyabaire mu hema. Sulemani akateeka esanduuko y’endagano mukisiika eky’omunda mu yekaru, kandi ebintu ebindi ebikaba biri mu hema akabita mukisiika ekindi.

Yekaru obu yahoire, hakabaho omukoro gw’amaani. Sulemani akateza maju omumaiso ga yekaru, nkoku orukurora omukisisani. Yaagambira Yahwe ati: ‘N’iguru lyoona tosobora kuligyamu. Yahwe kirisura ki enju enu ei nyombekere iwe okugihikamu? Baitu, iwe Ai Ruhanga wange, oteho omutima ha kusaba kw’abantu bawe obu bakusabire omukiikaro kinu.’

Sulemani obu yamazire okusaba, omurro gukaruga omu iguru gwayokya ebihongwa byoona eby’ebisoro. Kandi ekyererezi ky’amaani kuruga hali Yahwe kikaijura mu yekaru. Kinu kikooleka ngu Yahwe akaba ahulirize, kandi asimire yekaru eyekaba eyombekerwe hamu n’okusaba kwa Sulemani. Hati yekaru ekafooka kiikaro kyokuramizamu mukiikaro ky’ehema.

Sulemani akamara omwanya muraira nalema abantu omu mulingo ogw’amagezi n’abantu baali nibakisiima. Baitu Sulemani akaswera abakazi baingi kuruga mu mahanga agakaba gatarukuramya Yahwe. Norora omu nkoku arukuramya ekisisani? Hampero, abakazi be bakasendasenda Sulemani nawe kuramya baruhanga abandi. Nomanya ekyabaireho obu Sulemani yakozire ati? Akaba atakyatwara abantu n’ekisa. Akafooka mulemi mubi muno n’abantu bakaba bataine kusemererwa nakake.

Nahabwekyo, Yahwe akabihirirwa muno Sulemani kandi akamugambira ati: ‘Ndikwaka obukama ndibuha omwiru wawe. Baitu tindikikora omu biro byawe, baitu mubiro by’obulemi bwa mutabani wawe. Baitu tindiihaho abantu boona kuruga ha mwana wawe.’ Leka turole nkoku kinu kyabaireho.