Okwesiga Obukonyezi Bwa Ruhanga

ABANTU nka 50,000 bakwasire omuhanda kuruga Baburoni kugenda Yerusalemu. Baitu obu bahikire Yerusalemu bakasanga esisikaire. Tiharimu muntu weena. Nukwo Abaisareri bakaba baine kwombeka buli kintu buhyaka.

Ekibabandize kwombeka kikaba ekyoto. Hanu nuho bahongeraga Yahwe ebihongwa. Emyezi mike mumaiso, Abaisareri bakatandika kwombeka yekaru. Baitu abanyanzigwa abakaba nibaikara mu nsi za haihi bakaba batarukugoza Abaisareri bagyombeke. Bakalengaho kubatiinisiriza nukwo bagireke. Hanyuma, abanyanzigwa banu bakaletera omukama omuhyaka owa Peresi okutekaho ekiragiro eky’okwemereza omulimu gw’okwombeka.

Obusumi bukarabaho. Hati giri myaka 17 kuruga Abaisareri baruga Baburoni. Yahwe atuma abarangi be Hagai na Zekaliya kugambira abantu kugaruka kutandika kwombeka. Abantu besiga Yahwe okubaha okukonyezi, kandi bahuliriza abarangi. Bagarukamu kwombeka n’obukiraba ekiragiro kyabaire nikibatanga.

Omukungu omu ow’Abaperesi ayayetwaga Tatenayi aija akaguza Abaisareri ayabaikiriize okwombeka yekaru. Abaisareri bamugambira ngu obu bakaba bali omu Baburoni, omukama Kuro akabagamba ati: ‘Mugende hati Yerusalemu kandi mwombeke yekaru ya Yahwe Ruhanga wanyu.’

Tatenayi ahandika ebbaruha agitweka Baburoni akaguze mali Kuro ayabaire afiire, obwaraba nukwo yagambire. Mukaanya kake ebbaruha kuruga hali omukama omuhyaka ow’Abaperesi eija. Egamba nti nukwo Kuro yagambire. Kandi omukama ahandiika ati: ‘Leka Abaisareri bombeke yekaru ya Ruhanga wabu. Kandi ninkuragira kubaha obukonyezi.’ Mu myaka ena, yekaru ekamalirizibwa, kandi Abaisareri basemererwa muno.

Emyaka nyingi ekahinguraho. Hati haihi myaka 48 kuruga yekaru emalirizibwa. Abantu mu Yerusalemu baseege, kandi ekibuga na yekaru ya Ruhanga tibirukusisana kurungi. Mu Baburoni, Omuisareri arukwetwa Ezera atunga okumanyisibwa nti yekaru ya Ruhanga esemerire kusemezebwa. Nomanya eki yakozere?

Ezera agenda kurora Atakisakisi, omukama wa Peresi. Kandi omukama onu omurungi akaha Ezera ebisembo bingi ebyokutwara Yerusalemu. Nukwo Ezera kugambira Abaisareri abakaba mu Baburoni kumukonyera kutwara ebisembo binu Yerusalemu. Abantu 6,000 bagamba nti nibaija kugenda. Baina efeeza n’ezabbu nyingi n’ebintu ebindi ebyomuhendo bingi ebibaina kutwara.

Ezera ayeralikirra habwokuba abasaija ababi bali mumuhanda. Abasaija banu basobora kubatwaraho feeza n’ezabbu yabu kandi babaite. Ezera ayeta abantu baije hamu, nkoku orukurora mukisisani. Hati basaba Yahwe okubalinda omu rugendo oruraira okugaruka Yerusalemu.

Yahwe abalinda. Hanyuma y’emwezi enna murugendo, baahika Yerusalemu mubusinge. Kinu tikirukwoleka ngu Yahwe nasobora kulinda abo abamwesiga?