Abantu Ba Ruhanga Baruga Mu Baburoni

HAHINGWIREHO emyaka nk’ebiri okuruga obu Abamedi n’Abaperesi bahamba Baburoni. Dora ebirukubaho hati! Abaisareri nibaruga omu Baburoni. Bakacungurwa bata? Noha abaikirize kugenda?

Kuro, omukama wa Peresi nuwe akikozere. Kara muno, Kuro atakazairwe, Yahwe akakozesa omurangi we Isaya kumuhandikaho ati: ‘Oija kukora ekinkwenda okole. Enyigi ziija kulekwa zikingwirwe osobole kukwata ekibuga.’ Mali Kuro akebembera kukwata orubuga rwa Baburoni. Abamedi n’Abaperesi bakataaha mu rubuga ekiro nibaraba mu nyigi azalekerwe zikingwirwe.

Baitu omurangi wa Yahwe Isaya akaba ayongire yagamba ngu Kuro akaba nagenda kuragira Yerusalemu na yekaru byombekwe buhyaka. Kuro akaha ekiragiro kinu? Mali akakiha. Kinu nikyo Kuro yagambiire Abaisareri: ‘Mugende hati Yerusalemu kandi mwombeke yekaru ya Yahwe, Ruhanga wanyu.’ Nikyo Abaisareri banu barukugenda kukora.

Kyonka Abaisareri boona batasobole kukwata orugendo oruraira okugaruka Yerusalemu. Rugendo ruraira orwa mailo nka 500 kandi baingi baali bakuzire muno rundi barwaire, batakusobora kugenda hara. Kandi haroho n’ensonga ezindi ezalemeseze abandi kugenda. Baitu Kuro agambira abo abatarukugarukayo: ‘Muhe effeza n’ezabbu n’ebisembo abo abarukugarukayo kwombeka Yerusalemu na yekaru.’

Ebisembo bingi bihebwa Abaisareri banu abarukugenda Yerusalemu. Na Kuro abaha ebikopo n’ebibindi ebyabaga munju ya Yahwe omukama Nebukadeneza ebyakaba aihire mu yekaru ya Yahwe obu yahwerekereza Yerusalemu. Abantu baali baina ebintu bingi eby’okwetweka obu bakaba nibagarukayo.

Hanyuma y’emwezi ena nibagenda, Abaisareri bakahika Yerusalemu mu bwire bwenyini. Gikaba myaka 70 kuruga obu orubuga rwahwerekerezebwa kandi ensi ekaba esigaire matongo. Baitu nobukiraba kiri nti Abaisareri bagarukire omu nsi yabo, bakaba nibagenda kutunga emihito nkoku turukugenda kumanya.