Ekihandiiko ha Kisiika

Hanyuma y’akasumi, Berisaza akafooka mukama wa Baburoni. Kiro kimu, akaraaliza abantu ab’ekitinisa boona kwija ha bugenyi. Kandi yaragira abaheereza be kuleeta ebikopo eby’ezaabu Omukama Nabukadeneza eby’akaba aihire omu Yekaru ya Yahwe. Omukama Berisaza hamu n’abagenyi be bakanywera omu bikopo binu kandi bakugiza baruhanga baabo. Obu bakaba nibalya, aho naho, engaro ez’omusaija zikarorwa ha kisiika kandi zatandika kuhandiika ha kisiika ebigambo ebitarukwetegerezebwa.

Omukama Berisaza akatiina muno. Akeeta abarogo be kandi yabaraganiza ati: ‘Omuntu wena arasobora kunsoborra amakuru g’ebigambo binu, ninyija kumufoora wakasatu omu busobozi omu Baburoni.’ Boona bakalengaho kumusoborra amakuru g’ebigambo binu, baitu bakalemwa. Omugo w’Omukama Berisaza akaija yamugambira ati: ‘Haroho omusaija arukwetwa Danieri, nuwe yasoborraga Omukama Nebukadeneza amakuru g’ebintu. Nasobora kukusobororra amakuru g’ebigambo binu.’

Danieri akaija hali omukama. Omukama Berisaza akamugambira ati: ‘Obworaaba n’osobora kusoma kandi okansoborra ebigambo binu, ninyija kukuha orukwanzi orukozerwe omu zaabu orw’omu bikya kandi nkufoole mulemi owa kasatu omu bukama bwa Baburoni.’ Danieri akamugarukamu ati: ‘Tindukugonza ebisembo byawe, baitu ninyija kukugambira amakuru g’ebigambo binu. So Nebukadeneza akaba ali musaija w’emyehembo baitu Yahwe akamubundaaza. Omanyire buli kimu kyona ekyamubaireho, baitu hati iwe orabizeemu Yahwe amaiso wanywera omu bikopo eby’ezaabu ebyaihirwe omu yekaru ye. Nahabweki, Ruhanga nikyo ahandikiire ebigambo binu ati: Mene, Mene, Tekeli, Ufasini. Ebigambo binu nibimanyisa ngu Abamedi hamu n’Abaperesi nibaija kusingura Baburoni kandi nuho obukama bwawe buragarukira.’

Busaho n’omu ayatekerezaaga ngu Baburoni n’esobora kusingurwa habwokuba orubuga runu rukaba rwine ekisiika ekikooto kandi rwetoroirwe ekyambu ky’amaani. Baitu ekiro eki kyonyini, omu bwire bw’ekiro, Abamedi hamu n’Abaperesi bakaija kurwanisa Baburoni. Omukama w’Abaperesi arukwetwa Kuro akahugura amaizi g’ekyambu nukwo abaserikale be basobole kuhika ha nyigi z’orubuga. Obu bahikire ha nyigi, bakasanga zikingwirwe! Abamahe bakataaha omu rubuga barukwata kandi baita n’omukama, hanyuma Kuro nuwe yafookere mukama wa Baburoni.

Omu mwaka gumu gwonka, Kuro akarangirra ati: ‘Yahwe angambiire mwombekere yekaru ye omu Yerusalemu. Omuntu wena arukugonza kwija kukonyera naikirizibwa.’ Nk’oku Yahwe yali araganiize, Abayudaya baingi bakagarukayo owabo hanyuma y’emyaka 70 Yerusalemu ehwerekereziibwe. Kuro akagarrayo ebikopo ebikozerwe omu zaabu hamu n’efeeza hamu n’ebintu ebindi Omukama Nebukadeneza eby’akaba aihire omu yekaru. Norora omulingo Yahwe yakozeseze Kuro kujuna abantu be?