Yesu Obu Akaba Akyali Muto Mu Yekaru

DORA omwojo omuto arukubaza n’abasaija banu abakuru. Begesa ab’omu yekaru ya Ruhanga omu Yerusalemu. Omwojo onu niwe Yesu. Akuzire. Hati ali w’emyaka 12 ey’obukuru.

Abegesa bahunirire muno habwokuba Yesu amanyire bingi ebirukukwata hali Ruhanga n’ebihandikirwe mu Baibuli. Baitu habwaki Yusufu na Malyamu nabo batali hanu? Bakaba bali nkaha? Ka tukyetegereze.

Buli mwaka Yusufu yaletaga ob’omuka ye Yerusalemu kukuza ekiro eky’embaganiza ekirukwetwa Okuhingurwaho. Orugendo ruraira kuruga Nazalesi kuhika Yerusalemu. Busaho anyakwina motoka, kandi tiharoho egaali z’omwika. Binu bikaba bitaroho mu busumi obu. Abantu abakukira obwingi barubataga, kandi kyabatwarraga ebiro bisatu kuhika Yerusalemu.

Mu kasumi kanu, Yusufu aina abantu baingi mu maka ge. Kale haroho bato ba Yesu abasemire kurolererwa. Kale mwaka gunu, Yusufu na Malyamu bali mu muhanda oguraira n’abaana babu nibagaruka Nazalesi. Nibatekereza ngu Yesu narubata n’abantu abandi. Baitu obu bahumwire rwebagyo, Yesu batamurore. Bamuserra mubanyabuzale n’abanywani, baitu akaba atali nabo! Kale bagaruka Yerusalemu nuho kumuserurra.

Hanyuma bazoora Yesu ali hanu n’abegesa. Nabahuliriza kandi nabakaguza ebikaguzo. Kandi abantu boona nibahunirra habw’amagezi Yesu againe. Baitu Malyamu amugamba: ‘Mwana waitu, habwaki otukozere kinu? So nanye tubaire tweralikiriire muno, nitukuserra.’

‘Habwaki mubaire nimunserra?’ Yesu amukaguza. ‘Mubaire mutarukukimanya ngu nsemerire kuba mu nju ya ise nyowe?’

Mali, Yesu nagonza kuba nambere asobora kwega hali Ruhanga. Ekyo tinikyo twakugondeze? Obu yagarukire Nazalesi, yagendaga mu nso’rokano z’okuramya buli wiiki. Habwokuba yahulirizaga kurungi, yayegaga ebintu bingi kuruga omu Baibuli. Tube nka Yesu, tuhondere eky’okurorraho kye.