Yesu Yakiza Abarwaire

YESU obwagenda mu nsi egi yoona, akiza abarwaire. Amakuru g’ebyamahano binu garanganwa mubyaro n’omubibuga okwehinguliriza. Nahabwekyo abantu bamuletera abalema, bakihimbara, bakiifa-matu kandi n’abandi baingi abakaba barwaire. Yesu abakiza boona.

Emyaka esatu ehingwireho okuruga obu Yohana abatiza Yesu. Kandi Yesu agambira abakwenda be ngu akasumi kali haihi uwe naija kugenda Yerusalemu, h’alitirwa, kandi amale ahumbuuke kuruga mu bafu. Binu bitakabaireho, Yesu ayeyongera kukiza abarwaire.

Kiro kimu, Yesu akaba nayegesa ha Sabiiti. Sabiiti kiro ky’okuhumu’raho hali Abayudaya. Omukazi ow’okurora hanu abaire murwaire muno. Kumara emyaka 18 abaire agongobaire, atasobora kwemerra kurungi. Nahabwekyo, Yesu amutekaho omukono gwe kandi atandika kwemerra. Akizire!

Kinu kiretera abakuru b’ediini kubihirwa. Omu halibo agamba natoka hali ekitebe ky’abantu: ‘Haroho ebiro mukaaga kukorramu emirimo. Ebi nibyo ebiro mwizirehoga kukizibwa, baitu hatali ha kya Sabiiti!’

Baitu Yesu amugarukamu ati: ‘Inywe abasaija ababi. Buli omu halinywe nasumurra endogoyi ye nagitwara ha maizi kunywa ha Sabiiti. Kale nu tikisemerire omukazi onu anyakubaire murwaire kumara emyaka 18 kukizibwa ha Sabiiti?’ Okugarukamu kunu okwa Yesu kuletera abasaija banu ababi kuswaara.

Hanyuma Yesu n’abakwenda be barubata nibagenda Yerusalemu. Obu bahikire aheru y’orubuga rwa Yeriko, bakihimbaara babiri abaasabirizaga baahu’ra ngu narabaho. Nubwo batoka: ‘Yesu, tukonyere!’

Yesu ayeta abasaija banu bakihimbaara mumaiso kwija nambere ali, kandi abakaguza: ‘Nimwenda mbakorre ki?’ Bagamba: ‘Mukama, amaiso gaitu garole.’ Yesu akwata ha maiso gaabo kandi ahonaho batandika kurora! Nomanya habwaki Yesu nakora ebyamahano binu byoona ebirungi? Habwokuba nagonza abantu, kandi nagonza bamwikiririzemu. Kandi naitwe tusobora kukigumya ngu obwaliba nalema nk’Omukama, busaho n’omu hansi aliba murwaire obundi.