Yesu Aija Nk’omukama

HANYUMA obu yamazire kukiza abasabiriza babiri abakaba bakihimbaara, Yesu yaija ha kaaro akali haihi na Yerusalemu. Yagambira babiri h’abegeswabe: ‘Mugende mukyaro ekyo kandi murasanga enkaina ento. Mugisumurre, mugindetere.’

Enkaina obu yaleserwe hali we, Yesu agikarraho. Agigenderaho kuhika Yerusalemu orugendo orukaba rugufu. Obu yahikire haihi n’orubuga, ekitebe ky’abantu baingi kyaija kumutangana. Baingi halibo bejuura eminagiro yabu bagyarra mu muhanda. Abandi batema amataagi g’emiti y’emikindo. Nago bagarra mu muhanda kandi bakungira haiguru bati: ‘Ruhanga ahe omugisa omukama arukwizira mwibara lya Yahwe!’

Mubusumi bwakara mu Isareri abakama abahyaka bagenderaga ha nkaina ento kutaaha mu Yerusalemu nukwo beyoleke abantu. Kinu nikyo Yesu arukukora. Kandi abantu banu niboleka ngu nibagonza Yesu kuba mukama wabu. Baitu tibali boona abakumugonza. Nitwetegereza kinu kuruga ha byabaireho Yesu obu yagenzire mu yekaru.

Mu Yekaru, Yesu akiza bakihimbaara n’abalema. Abaana abato obu barozire binu, batokera haiguru nibahaisaniza Yesu. Baitu kinu kiretera banyakatagara kubihirwa kandi bagamba Yesu bati: ‘Nohurra abaana ebibarukugamba?’

Yesu abagarukamu ati: ‘Ego nimbihurra. Timukasomaga mu byahandikirwe nambere harukugamba: Omukanwa k’abaana abato Ruhanga naija kuleta okukugiza?’ Kale abaana beyongera kukugiza omukama ayatairweho Ruhanga.

Twakugondeze kuba nk’abaana abo, tinukwo? Abantu abamu basobora kulengaho okututanga kutebeza ha bukama bwa Ruhanga. Baitu nitwija kweyongera kutebeza abandi ha bintu ebirungi Yesu ebyarukwija kukorra abantu.

Yesu obu akaba ali hansi hanu, obwire bw’okutandika kulema nk’omukama bukaba butakahikire. Obwire bunu bulihika di? Abegeswa ba Yesu nibagonza kumanya. Nitwija kusoma ha kinu mubikugarukaho.