Yesu Ali Mwomezi

NOMANYA omukazi n’abasaija babiri banu nibo baaha? Omukazi nuwe Malyamu Magadalena munywani wa Yesu. Kandi abasaija mungoye ezirukwera bamaraika. Kanu akasiika Malyamu akakuroramu nuho bakaba bataire omutumbi gwa Yesu hanyuma y’okufa. Nikyetwa ekituuro. Baitu hati omutumbi tigulimu! N’oha yagutwaire? Katurole.

Hanyuma y’okufa kwa Yesu, abanyakatagara bakagamba Pirato: ‘Yesu obwakaba akyali mwomezi akagamba ngu naija kuhumbuurwa hanyuma y’ebiro bisatu. Kale ragira ekituuro kirindwe. Nukwo abegeswa be baleke kwija n’okwiba omutumbi gwe kandi bagambe ngu ahumbwirwe okuruga mubafu!’ Pirato yagamba abanyakatagara kutuma abaserikale kulinda ekituuro.

Baitu nyenkya kara muno ha kiro kyakasatu hanyuma y’okufa kwa Yesu, maraika wa Yahwe akaija ahonaho. Akasindika ibaale kuruga ha kituuro. Abaserikale bakatiinira kimu tibasobora n’okwetengesaho. Hanyuma obubarora mu kituro munda, omutumbi tigulimu! Abamu h’abaserikale bagenda mu rubuga kandi bagambira banyakatagara. Omanyire abanyakatagara banu ababi ekibakora? Basasura abaserikale kubiiha. Babagambira bati: ‘Mugambe ngu abegesebwa be baizire ekiro obu tubaire tubwamire baiba omutumbi.’

Binu obu bikaba nibibaho, abamu h’abakazi abakaba bali banywani ba Yesu babungira ekituuro. Bakahunirra kusanga ekituro kitalimu kintu! Mubwangu bamaraika babiri mubijwaro birikwangasana baija. Babakaguza bati: ‘Habwaki nimuserra Yesu hanu? Ahumbwirwe. Mugende bwangu mugambire abegeswa be.’ Abakazi bairuka bwangu! Baitu bakaba bakyali mu muhanda omusaija yabemereza. Omanyire noha? Ni Yesu! Abagambira ati: ‘Mugende mugambire abegeswa bange.’

Abakazi obu bagambiire abegeswa ngu Yesu mwomezi kandi ngu bamurozere, abegesebwa kikabagumira kwikiriza kinu. Petero na Yohana bairuka kugenda ha kituuro kwerorra, baitu basanga ekituuro kitarimu kintu! Petero na Yohana obu barugireyo, Malyamu Magadalena asigarayo. Nubwo yarozere mukituuro kandi akarora bamaraika babiri.

Omanyire kiki ekyahikire ha mutumbi gwa Yesu? Ruhanga akagubuzaho. Ruhanga atahumbule Yesu mu mubiri ogw’enyama ogu yafeeriiremu. Akaha Yesu omubiri ogw’omwoyo omuhyaka, nk’abamaraika omwiguru ogu baine. Baitu habw’okwoleka abegesebwa be ngu ali mwomezi, Yesu yayetekahoga omubiri ogw’abantu ogu basoboraga kurora nkoku turarora.