Yesu Ahumbuuka

Yesu obuyamazire kufa, omusaija omuguuda arukwetwa Yusufu akasaba Pirato nukwo amwikirize kwiha omutumbi gwa Yesu ha muti. Yusufu akakuba omutumbi gwa Yesu omu suuka kandi yamusiiga ebirukuboya hanyuma yamutwara omu kituuro. Hanyuma akateeka ibaale erikooto ha mulyango gw’ekituuro. Banyakatagara abakuru bakagenda bagambira Pirato bati: ‘Abamu ha begeswa ba Yesu nibasobora kwija bakaiha Yesu omu kituuro kandi bakagamba ngu Yesu ahumbuukire.’ Pirato akabagarukamu ati: ‘Mwigarre ekituuro kandi mukirinde.’

Hanyuma y’ebiro bisatu, obwire bwa nyenkyakara, abakazi bakagenda ha kituuro nambere baziikire Yesu basanga ibaale liihirwe ha kituuro. Maraika akagambira abakazi ati: ‘Mutatiina. Yesu ahumbuukire. Mugende mugambire abegeswa be ngu bamusange Galiraya.’

Malyamu Magadalene akairuka kuserra Petero na Yohana. Obuyabarozere akabagambira ati: ‘Haroho omuntu atwaire omutumbi gwa Yesu!’ Petero na Yohana bakarahuka bagenda ha kituuro nambere Yesu yaziikirwe. Obu bahikireyo bakasanga kiri kwonka, nubwo buli omu yagaruka omu ka ye.

Malyamu obu yagarukire ha kituuro, akarora abamaraika babiri bali omu kituuro kandi yabagambira ati: ‘Timanyire nambere batwaire Mukama wange.’ Hanyuma akarora omusaija yatekereza ngu mulinzi w’orugonjo kandi yamugambira ati: ‘Taata, caali ngambira nambere omutwaire.’ Baitu omusaija onu obu yagambiire ati, “Malyamu!” aho n’aho akamanya ngu nuwe Yesu. Malyamu akarra nagamba ati: “Mwegesa!” kandi yamukwataho. Yesu akamugambira ati: ‘Genda ogambire bagenzi bange nk’oku ondozere.’ Aho n’aho, Malyamu akairuka yagenda hali abegeswa yabagambira ngu arozere Yesu.

Omu kiro eki kyoni, abegeswa babiri bakaba nibarubata kuruga Yerusalemu nibagenda Emau. Omusaija akaija yatandika kurubata nabo hanyuma yabakaguza ekibakaba nibabazaaho. Bakamugarukamu bati: ‘Tokahuliire amakuru? Ebiro bisatu enyumaho, banyakatagara bakaitisa Yesu. Abakazi abamu hati nibagamba ngu ahumbuukire.’ Omusaija akabakaguza ati: ‘Timurukwikiririza omu banabbi? Bakagamba ngu Kristo yakufiire kandi yakuhumbuukire.’ Akagumizaamu n’abasoborra Ebyahandiikirwe. Obu bahikire Emau, abegeswa bakasaba omusaija ogu agende nabo nambere bakaba nibagenda kurara. Obu baali nibagenda kulya eky’ekiro, omusaija akasabira omugaati, hanyuma y’okusaba bakakyetegereza ngu akaba nuwe Yesu. Obuyamazire kusaba, Yesu akaburaho.

Abegeswa babiri banu bakanguha bwangu bagaruka Yerusalemu nambere abakwenda bakaba bali kandi babagambira byona ebikaba bibaireho. Obu bakaba bakyali aho omu nju, Yesu akaija omuli bo. Ha kubanza, abakwenda batakiikirize ngu akaba ali Yesu. Nukwo Yesu yabagambira ati: ‘Murole engaro zange; munkwateho. Kikahandiikwa ngu Kristo yakuhumbuukire kuruga omu bafu.’