Kunihira Ki Habwa Abagonzebwa Abafire?

“Omuntu obwafa aligaruka okuba omwomezi?” nikwo omusaija Yobu yakagwize ira muno. (Yobu 14:14, King James Version) Obundi naiwe, kino okyekaguza. Wakuhulire ota kakuba omanya ngu okwikara hamu n’abagonzebwa bawe abo nikisoboka hanu omunsi omunyikara erukusingayo oburungi?

Kale, nu Baibuli eraganiza eti: “Abafu bawe baliba bomezi; emitumbi . . . eriimuka.” Ego Kandi Baibuli eraganiza eti: “Abahikirire baligwetwa ensi, baragikaramuga ebiro nebiro.”—Isaya 26:19; Zabuli 37:29.

Okuba n’obwesigwa obw’amazima omubiraganizo nk’ebyo, nitwetaga kugarukamu ebikaguzo ebimu ebikuru: Habwaki abantu bafa? Abafire balinkaha? Nitusobora tuta okukigumya ngu nibasobora okugaruka okuba abomezi?

Okufa, n’Ekyo Ekibaho Obutufa

Baibuli ekyoleka kurungi nkoku Ruhanga okubanza atakigenderre abantu kufa. Akahanga abantu ababiri ababandize Adamu na Haawa, yabateka omu rungonjo rwa Ruhanga orw’omu nsi orwayetwaga Adeni, kandi yabaragira okuzara kandi n’okugazihya amaka gabu ag’Orugonjo rwa Ruhanga okuraranga ensi yona. Bakufire kakuba bajeemire ebiragiro bye.—Okubanza 1:28; 2:15-17.

Habw’obutasima ekisa kya Ruhanga, Adamu na Haawa bakajeema kandi bahikibwaho ekifubiro ekyabasalirwe. “Oligaruka omu itaka,” nikwo atyo Ruhanga yagambire Adamu, “baitu omu numwo waihirwe: baitu oli cucu, kandi omu cucu numwo oligaruka.” (Okubanza 3:19) Atakahangirwe Adamu akaba ataroho; akaba ali cucu. Habw’obutahurra bwe, rundi habwa ekibi kye, Adamu akahebwa ekifubiro ky’okugaruka omu cucu, omunyikara ey’obutabaho.

Nikwo kityo okufa nikwo kutaba n’abwomezi. Baibuli elengesanisa eti: “Empera ey’ekibi kufa; baitu ekisembo kyembabazi ekya Ruhanga [nibwo] bwomezi obutahwawo.” (Abarumi 6:23, italikisi zaitu.) N’eyoleka nkoku okufa eri enyikara ey’okuba otaina ky’orukumanya, Baibuli egamba eti: “Baitu abomezi bamanyire balifa: baitu abafire tibamannyire kigambo nekimu.” (Omugambizi 9:5, italikisi zaitu.) Baibuli esoborra eti Omuntu bwafa: “Orwoyarwe rurugamu, agaruka hali itakalye; omukiro eki ebitekerezobye nubwo bihwaho.”—Zabuli 146:3, 4, italikisi zaitu.

Baitu, nkoku kiri ngu Adamu na Haawa bonka nibo bajeemira ekiragiro eky’omu Adeni, habwaki itwena tufa? Habwokuba itwena tukazarwa hanyuma y’okujeema kwa Adamu, nikwo kityo itwena twagwetwa ekibi n’okufa okuruga hali we. Nkoku Baibuli esoborra eti: “Nukwo, nkekibi okukyatahire omu nsi obw’omuntu omu [Adamu], kandi nokufa obwekibi; nukwo nokufa kwahikire kuti ha bantu bona.”—Abarumi 5:12; Yobu 14:4.

Baitu omuntu asobora kukaguza ati: ‘Abantu tibaina obwomezi obutafa obukira okufa?’ Baingi begesa eki, nibagamba n’okugamba ngu okufa mulyango ogukutaha mu bwomezi obundi. Kyonka entekereza egyo teruga omu Baibuli. Okwihaho, Ekigambo kya Ruhanga kyegesa ngu oli bwomezi, obwomezi niwe wenyini otwaliremu n’emiringo yawe n’ebitekerezo byawe byona. (Okubanza 2:7; Yeremiya 2:34; Enfumo 2:10) Kandi Baibuli egamba eti: “Obwomezi oburukusisa nubwo bulifa.” (Ezekieli 18:4) Tiharoho Baibuli h’egambira ngu omuntu aina obwomezi obutafa obukira okufa kw’omubiri.

Abantu Nkoku Basobora Okugaruka Okuba Abomezi

Hanyuma y’ekibi n’okufa okutaha omu nsi, Ruhanga akoleka nkoku kyali kigendererwa kye ngu abafu bagarurweho omu bwomezi okuraba omu kuhumbuka. Nikwo eti Baibuli esoborra ngu: “Iburahimu, . . . obuyatekerize ngu Ruhanga nasobora okuhumbura [omwana we Isaaka] kuruga mu bafu.” (Abaheburaniya 11:17-19, New World Translation) Okwesiga kwa Iburahimu kutatarangane, habwokuba Baibuli egamba hali ogu Owobusozi bwona eti: “Tali Ruhanga wa bafu, baitu wa bomezi baitu bona: bomiire habwe.”—Luka 20:37, 38.

Ego, Ruhanga Owobusozi bwona taina busobozi bwonka baitu n’okugonza okuhumbura abantu baraba asimire. Yesu Kristo wonyini akagamba ati: “Mutahuni’ra eki baitu akasumi nikaija bona abali omu bituro akabalihuli’ramu iraka lye, kandi balirugamu.”—Yohana 5:28, 29; Engeso ezabakwenda 24:15.

Hatahweho kasumi kakoto hanyuma y’okugamba ati, Yesu yasanga abali nibagenda okuzika nibaruga omu rubuga rwa Isareri orwa Naini. Omusigazi ayali afire nuwe yali mwana wenka ow’omufakati. Obu yaboine obujune bwe obwamani, Yesu yamusasira. Nikwo atyo yaragira omutumbi ati: “Omwojo, ninkugambira nti imuka!” Omwojo yaika’ra kandi Yesu yamukwasa nyina.—Luka 7:11-17.

Nkoku kyali hali omufakati ogu, hakabaho n’okusemererwa kwamani Yesu obu yabungire amaka ga Yairo, omukuru w’isorokaniro erye Kiyudaya. Muhara we ow’emyaka 12 akaba afire. Kyonka Yesu obuyahikire omu maka ga Yairo, akagenda ahali omwana afire yagamba ati: “Omuisiki imuka.” Kandi yaimuka!—Luka 8:40-56.

Hanyuma, munywani wa Yesu Lazaro akafa. Yesu obu yahikiire omu maka ga Lazaro, akaba amazire ebiro bbina afire. Nobwaraba yali nasinda, munyanya we Maliza akoleka okunihira, nagamba ati: “Manyire alihumbuka ha kuhumbuka okwekiro kya hampero.” Baitu Yesu akagenda ha kituro yaragira baiheho ibale, yayeta: “Lazaro turuka oije.” Kandi yaturuka!—Yohana 11:11-44.

Hati tekereza hali eki: Lazaro akaba ali mu mulingo ki omu biro ebyo bbina ebi yamazire afire? Lazaro taina ki yagambire ha kuba omu iguru omukusemererwa rundi omukubonabona, okwomumurro ogutarara, omu mananu eki yakukozire kakuba yali niho ali. Nangwa, Lazaro akaba ataina kyarukumanya omu kufa kandi nikwo atyo yakwikaire okuhikya “ha kuhumbuka okwehakiro ky’empero” kakuba Yesu ataramugarwire okuba omwomezi.

Ky’amananu ngu eby’amahano binu ebya Yesu omugaso gwabyo gukaba gw’akasumi kake, habwokuba abo abayahumbwire bakagaruka baafa. Baitu akaha obwa kaiso emyaka 1,900 enyakuhingwireho, nti habwa amani ga Ruhanga, omu mazima abafu nibasobora okugaruka okuba abomezi! Habwa eby’amahano Yesu ebiyakozire nikwo atyo Yesu akoleka mu mulingo omuke ebyo ebikugenda okubaho omu nsi hansi y’Obukama bwa Ruhanga.

Omugonzebwa Bwa’fa

Omunyanzigwa kufa bwaija obujune bwawe busobora kuba bwingi, ngonze oina okunihira omu kuhumbuka. Iburahimu akaba aina okunihira ngu mukaziwe akaba w’okuba omwomezi omurundi ogundi, baitu tusoma ngu “Iburahimu yaija okugaraga’ra Sara n’oku’ra habwe.” (Okubanza 23:2) Kandi we Yesu? Lazaro obu yafire “yasinda omu mutima natuntura,” kandi hanyuma akake “ya’ra amaizi.” (Yohana 11:33, 35) Nikwo kityo omuntu w’orukugonza bwafa, tikikwoleka obuceke okurra.

Omwana bwafa, kaba kasumi kazibu muno hali nyina. Nikwo etyo Baibuli egamba habujune nyina w’omwana bwa banabwo. (2 Ekyabakama 4:27) Omu mananu, kandi kiba kizibu hali ise w’omufu. “Kakuba ninye nfire mukikaro kyawe,” nikwo atyo Omukama Daudi yalizire omwana we Abusalomu obu yafire.—2 Samwiri 18:33, NW.

Baitu, habwokuba oina okwesiga omu kuhumbuka, okuganya kwawe tikwiija kuhingurana. Nkoku Baibuli egamba, “[toija] kuganya nkabandi abataina kunihira.” (1 Abasesalonika 4:13) Okwihaho oija kusemberra hali Ruhanga omu kusaba, kandi Baibuli eraganiza eti “uwe arakusagika.”—Zabuli 55:22.

Kwihaho kyolekerwe kundi, ebyokujurra byona birugire mu Baibuli y’Orutoro eya 1965.