Heereza Yahwe, Hatali Sitaani

Itwena twine kwekorra encwamu. Ey’okuheereza Yahwe rundi Sitaani na badaimoni be. Titusobora kubaheereza boona. Kakyamagezi kuheereza Yahwe!

Yahwe Murungi

Nk’oku turozere, badaimoni begondeza omu kukora kubi abantu n’okubabiihabiiha. Yahwe tinukwo ali. Agonza abantu nk’oku taata agonza abaana be. Nuwe Mugabi ‘w’ekisembo kyona ekirungi n’ekisembo kyona ekihikiriire.’ (Yakobo 1:17) Taima abantu ekintu kyona ekirungi, n’obukiba ky’omuhendo mwingi haluwe.—Abefeso 2:4-7.

Yesu akoleka abantu okugonza kurabira omu kukiza abafu b’amaiso, abafu b’eminwa hamu n’okuhumburra abafu — Yesu, Omwana wa Ruhanga, akooleka abantu embabazi obu n’akiza endwaire zaabu

Teekerezaaho ebintu Yesu, Omwana wa Ruhanga ebiyakozere omu nsi. Abafu b’eminwa bakabaza kandi abafu b’amaiso bakarora. Akakiza abagenge n’abalema. Akabingamu abantu emyoyo emibi kandi yakiza buli kika ky’endwaire zoona.—Matayo 9:32-35; 15:30, 31; Luka 7:11-15.

Mukiikaro ky’okutugambira ebisuba kutuhabisa, Ruhanga abaza amananu gonka. Tabiiha muntu wena.—Okubara 23:19.

Wetantale Ebikorwa Ebitasemiire

Nk’oku ekiju kye nyamambubi kikwata ensohera, obukaikuru n’obukaikuru bwa bantu bakwasirwe ebisuba hamu n’emigenzo. Batiina abafu. Batiina badaimoni. Beralikirra emikyeno, ebisirani, amarogo, ekibaletera kwikara bajwire ehirizi hamu n’ebintu ebindi. Baikara babohiirwe omu nyikiriza hamu n’obuhangwa oburukusigikirra ha bisuba bya Sitaani Diabolo. Abaheereza ba Ruhanga tiboohebwa ebintu nka binu.

Yahwe nasingira hara Sitaani amaani. Obworamuheereza, naija kukulinda hali badaimoni. (Yakobo 4:7) Amarogo tigarukwija kukukwata. Ekyokurorraho, omu Nigeria, abafumu b’amaani basatu bakasindikira Abakaiso ba Yahwe amarogo nukwo gabaite habwokuba bakanga kuruga omu tawuni. Amarogo obugayangire kubaita, omu ha bafumu akatiina muno, yagenda yabasaba ekiganyiro.

Abefeso nibokya ebitabu byabu ebya amasano — Abefeso bakokya ebitabu byabu ebya masano

Kakuba Abadaimoni bakubonabonesa, kunga ibara lya Yahwe kandi naija kukulinda. (Enfumo 18:10) Baitu Yahwe kusobora kukulinda, osemeriire kuba oyecweriireho kimu ebintu byona ebiine akakwate n’oburaguzi hamu n’okuramya abadaimoni. Abaheereza ba Ruhanga omu Efeso eya kara nikyo bakozere. Bakasoroza ebitabu byabu byona ebya masano babyokya. (Engeso Ezabakwenda 19:19, 20) Abaheereza ba Yahwe kasumi kanu basemeriire kukora ekintu nikyo kimu. Weihireho kimu amarogo, ehirizi hamu n’ebintu ebindi ebiine akakwate n’oburaguzi.

Wejumbire omu Kuramywa kwa Mananu

Obworaba nogonza kusemeza Yahwe, tikirukumara kuleka okuramya okw’ebisuba n’okuleka kukora ebintu ebibi . Osemeriire kwejumbira omu kuramya kw’amananu. Baibuli n’eyoleka ekitusemeriire kukora:

Okuramya okw’amananu nikutwarramu kugenda munsorokano z’Ekikristaayo hamu n’okusoma Baibuli — Genda munsorrokano ez’Ekikristaayo.—Abaheburaniya 10:24, 25

Yega Baibuli.—Yohana 17:3

Okuramya kw’amananu nikutwarramu kutebeza abandi, kusaba hali Yahwe n’okubatizibwa — Tebeza abandi.—Matayo 24:14

Saba hali Yahwe.—Abafiripi 4:6, 7

Batizibwa.—Engeso Ezabakwenda 2:41

Koragana n’Abakaiso ba Yahwe

Sitaani na badaimoni baine abantu baabu omu nsi abegesa kandi bakakora ebintu ebibi. Baitu Yahwe nauwe aine abantu be. Banu nubo Abakaiso ba Yahwe. (Isaya 43:10) Okwetorora ensi yoona, harumu Abakaiso ba Yahwe abarukuhingura omu bukaikuru munana. Boona bekamba okukora ebintu ebirungi kandi n’okwegesa abantu amananu. Omu nsi ezirukukira obwingi n’osobora kubasanga ha Kyombeko ky’Obukama rundi Kingdom Hall, kandi nibaija kukutangirra n’okusemererwa.

Omulimo gwabu gw’okonyera abandi kuheereza Ruhanga. Nibaija kukwegesa Baibuli omu ka yawe, kandi bakukonyere kwega mulingo oguhikire ogw’okuramyamu Yahwe. Kinu torukwija kukisasurra. Kisemeza Abakaiso ba Yahwe kwegesa amananu habwokuba bagonza abantu kandi bagonza Yahwe Ruhanga.

Abakaiso ba Yahwe nibatangirra abantu ha Kyombeko ky’Obukama rundi Kingdom Hall kandi beegesa Baibuli — Abakaiso ba Yahwe nibaija kukukonyera kuheereza Ruhanga