Yesu w’Amaani Kukira Badaimoni

NOIJUKA habwaki malaika wa Ruhanga omu yafookere Sitaani Diabolo?— Okwegomba kwe okw’okugonza kuramibwa nukwo kwamuletiire kwehindukirra Ruhanga. Bamalaika abandi nabo bakafooka bahondezi ba Sitaani?— Ego nukwo baakozere. Babuli ebeeta ‘bamalaika ba Sitaani,’ rundi badaimoni.​—Okusuku’rwa 12:9.

Bamalaika banu ababi rundi badaimoni baikiririza omuli Ruhanga?— Baibuli egamba ngu ‘Badaimoni baikiriza ngu Ruhanga aroho,’ Baitu nibatiina. (Yakobo 2:19) Kinu kiri kiti habwokuba bakimanyire ngu Ruhanga naija kubafubira habw’ebintu ebibi ebibakozere. Kiki ekibakozere?—

Baibuli egamba ngu bakalekaho eka yabo enungi omu iguru baija omu nsi kwomeera nk’abantu. Kinu bakakiro habwokuba bakagonza kuterana n’abakazi abarungi omu nsi. (Okubanza 6:1, 2; Yuda 6) Kiki eky’omanyire ha kuterana?—

Okuterana nuko akasumi omusaija n’omukazi obubabyama hamuirrangana haihi omu mulingo ogw’embaganiza muno. Hanyuma, omwana n’akurra omu nda ya nyina. Baitu kibi bamalaika kuterana. Ruhanga n’agonza omusaija na mukazi we abali omu buswere bonka nubo baterane. Omu mulingo ogu, omwana kakuba azaarwa, omusaija na mukazi we nibamurolerra.

Bamalaika obubaajwaire omubiri gw’abantu kandi baaterana n’abakazi omu nsi, abaana baabo bakakura bafooka bantu bakooto muno. Baali bantu babi muno kandi baakoraga kubi abantu abandi. Nahabweki Ruhanga akaleeta okusandaara kw’amaizi kuhwerekereza abantu abo abakooto muno hamu n’abantu abandi ababi. Baitu akagambira Nuha kwombeka eryato erikooto nukwo ajune abantu abake abaali nibakora ebihikire. Omwegesa Omukuru akagamba ngu kikuru muno kwijuka ekyabaireho ha Kusandaara kw’Amaizi.​—Okubanza 6:3, 4, 13, 14; Luka 17:26, 27.

Okusandaara kw’Amaizi obukwaizire, n’omanya kiki ekyahikire hali bamalaika ababi?— Bakaleka kukozesa emibiri y’abantu eibaali bajwaire kandi bagarukayo omu iguru. Baitu bakaba batakyasobora kuba ­bamalaika ba Ruhanga, nahabweki bakafooka bamalaika ba Sitaani rundi badaimoni. Kiki ekyahikire h’abaana baabo abaali bakooto muno?— Bakafeera omu Kusandaara kw’Amaizi. Kandi n’abantu abandi abaali batarukworobera Ruhanga nabo bakafa.

Kurugira kimu omu kasumi k’Okusandaara kw’Amaizi, Ruhanga taikiriize badaimoni kwongera ­kufooka bantu. Baitu n’obukiraaba ngu titusobora kubarora, badaimoni balengaho kuleetera abantu kukora ebintu ebibi muno. Hati nibaletaho akabi kukira na kara. Kinu kiri kiti habwokuba babingirwe omu iguru baija omu nsi.

N’omanya habwaki tutasobora kurora badaimoni?— Habwokuba tibarukurorwa. Baitu nitukigumya ngu baroho. Baibuli egamba ngu Sitaani ‘n’abiihabiiha abantu omu nsi yoona,’ kandi badaimoni be nibamukonyera.​—Okusuku’rwa 12:9, 12.

Diabolo na badaimoni be, naitwe nibasobora kutubiihabiiha?— Ego, nibasobora kutubiihabiiha kakuba tutegendereza. Baitu titusemeriire kutiina. Omwegesa Omukuru akagamba ati: ‘Diabolo tandoho kigambo.’ Kakuba twikara haihi na Ruhanga, naija kutulinda hali Diabolo na ­badaimoni be.​—Yohana 14:30.

Kikuru kumanya ebintu ebibi badaimoni ebibasobora kulengaho kutuletera kukora. Nahabweki kitekerezeeho. Bintu ki ebibi badaimoni ebibaakozere obubaizire omu nsi?— Okusandaara kw’Amaizi kutakaizire, bakaterana n’abakazi ekintu ekikaba kitahikire kukorwa bamalaika. Kasumi kanu badaimoni kibasemeza abantu obubatoorobera ekiragiro kya Ruhanga ekirukukwata ha kuterana. Leka nkukaguze, nibaha abasemeriire kuterana?— Ohikire, abali omu buswere bonka.

Kasumi kanu aboojo abato hamu n’abaisiki baterana, baitu eki kibi. Baibuli ebazaaho ebicweka by’ensoni, eky’omusaija n’eky’omukazi. (Ekyebiragiro 23:1) Yahwe akahanga ebicweka binu habw’ekigendererwa eky’embaganiza kandi abaswerangaine bonka nubo basemeriire kukyegondezaamu. Badaimoni basemererwa abantu obubakora ebintu Yahwe ­ebyarukutanga. Nk’ekyokurorraho, kibasemeza obubarora omwojo n’omwisiki abakyali bato nibazaanisa ebicweka byabo eby’ensoni. Titurukugonza kusemeza badaimoni, tunukwo?—

Haroho ekintu ekindi badaimoni ekibagonza baitu Yahwe eky’anoba. Omanyire kintu ki?— Okurwana. (Zabuli 11:5) Okurwana kubaho abantu obubabiihirwa kandi bakorangana kubi. Oijuke ngu eki nikyo abantu abakooto muno abaana ba badaimoni baakozere.

Ekindi, badaimoni bagonza kutiinisa abantu. Obwire obumu befoora nk’abantu abaafiire. Nibasobora n’okukopa amaraka g’abantu abaafiire. Omu mulingo gunu badaimoni babuzabuza abantu baingi kandi babaletera kwikiriza ngu abantu abaafiire bakyaliyo, kandi ngu nibasobora kubaza n’abomeezi. Ego, badaimoni nibasobora kuleetera abantu baingi kwikiririza omu mizimu.

Nahabweki tusemeriire kwikara tuli bulindaara nukwo Sitaani na badaimoni be batatubuzabuza. Baibuli n’etutererra ngu: ‘Sitaani alengaho kwefoora malaika omurungi kandi n’abaheereza be nabo bakora ekintu nikyo kimu.’ (2 Abakolinso 11:14, 15) Baitu amananu gali ngu badaimoni babi. Leka turole omulingo basobora kulengaho kutuletera kuba nkabo.

Ninkaha nambere abantu bakira kwegera kurwana, kuterana bakyali bato, kwegaho emyoyo emibi n’emizimu?— Babyega obubarora puroguraamu ezimu ha tivi na filimu, obubazaana emizaano ya vidiyo ha kompyuta, obubagenda ha intaneeti n’okusoma ebitabu ebirumu ebintu ebirukusekesa? Kukora ebintu binu kyeyongera kutwiriza haihi na Ruhanga rundi haihi na Sitaani na badaimoni be? Iwe n’otekereza ki?—

N’otekereza nooha arukugonza tuhuliirize kandi turole ebintu ebibi?— Ego, ni Sitaani na badaimoni be. Nahabweki, iwe na nyowe tusemeriire kukora ki?— Tusemeriire kusoma, kuhuliiriza n’okurora ebintu ebirungi kandi ebiratukonyera kuheereza Yahwe. N’osobora kutekerezaaho bimu ha bintu ebirungi ebitusemeriire kukora?—

Kakuba tukora ebirungi, nihaba hatakyaroho nsonga habwaki tusemeriire kutiina badaimoni. Yesu nabakira amaani kandi nibamutiina. Kiro kimu badaimoni bakalirirra Yesu nibagamba ngu: “Oizire okutuhwerekereza?” (Marako 1:24) Mali tikirukwija kutusemeza akasumi obukalihika Yesu akahwerekereza badaimoni?— Kasumi kanu, nitusobora kukigumya ngu Yesu naija kutulinda hali badaimoni kakuba twikara haihi nauwe hamu na Ise ow’omu iguru.