Akasumi ak’Omu Maiso Akarungi Muno

Sitaani na badaimoni be tibarukwija kugumizaamu nibabiihabiha abantu. Yahwe amazire ira kubabinga omu iguru. (Okusuku’rwa 12:9) Omu kasumi akatali ka hara, naija kwongera agire ekiyakora Sitaani na badaimoni be. Omu kwolekwa kuruga hali Ruhanga, omukwenda Yohana akagamba ati: “Kandi nkarora maraika nasirimuka okuruga omu iguru, ayina ebisumuruzo ebyekiina ekitanyina hokugarukira, norujegere orukoto omu mukonogwe. Yakwata ekijoka, enjoka eyaira, nuwe Diabolo kandi Setani, yamuboha okuhikya emyaka rukumi, yamunaga omu kiina ekitanyina hokugarukira, yakigarra, yakitaho emanyikirizo, aleke okubihabiha amahanga okuhikya emyaka rukumi obwerikahwaho.” (Okusuku’rwa 20:1-3) Hanyuma y’eki, Sitaani na badaimoni be nibaija kuhwerekerezebwa ebiro n’ebiro.—Okusuku’rwa 20:10.

Abantu ababi nabo nibaija kuhwerekerezebwa.—Zabuli 37:9, 10; Luka 13:5.

Abafu Balyongera Babe Abomeezi!

Hanyuma ya Sitaani na badaimoni be kwihwaho, Yahwe alireeta emigisa nyingi hali abantu. Noijuka ngu abafiire tibaine bwomeezi, kandi tibaroho. Yesu akalengesaniza kufa n’oturo—oturo otwamaani otutarumu okuroota. (Yohana 11:11-14) Akakikora ati habwokuba akaba akimanyire ngu akaire nikaija kuhika nambere abo boona ababyamire omu kufa balisisimurwa babe bomeezi. Akagamba ati: “Akasumi nikaija, bona abali omu bituro . . . balirugamu.”—Yohana 5:28, 29; lengesaniza na Engeso Ezabakwenda 24:15.

Balihumbuurwa hanu omu nsi. Omu kiikaro ky’ebirango eby’okubika, nihaija kubaho amakuru ag’okusemererwa habw’abo abahumbuukire! Kakuliba kusemererwa kwingi, kutangirra abagonzebwa baitu abafiire kuruga omu bituuro!