Isomo 2
Ruhanga Nuwe Oha?
Ruhanga ow’amananu nuwe oha, kandi ibaralye nuwe oha? (1, 2)
Aina omubiri gwa mulingo ki? (3)
Emiringo ye erukukira obukuru niyo eraha? (4)
ATwakukozeseze ebisisani n’obwokurorraho nitumuramya? (5)
Miringo ki ebiri eyitu kusobora kwegeramu ebikukwata hali Ruhanga? (6)
1. Abantu baramya ebintu bingi. Baitu Baibuli n’etugambira ngu haroho Ruhanga omu wenka ow’AMANANU. Akahanga buli kintu kyona ekiri omu iguru na hansi. Habwokuba nuwe yatuhaire obwomezi, Nuwe wenka tusemerire kuramya.—1 Abakolinso 8:5, 6; Okusuku’rwa 4:11.
2. Ruhanga aina ebitinisa bingi kyonka anyina ibara limu lyonka. Ibara eryo niryo YAHWE. Omu Baibuli ezikukira obwingi, ibara lya Ruhanga likaihibwamu kandi omukikaro kyalyo hatekebwamu ebitinisa, MUKAMA rundi RUHANGA. Kyonka Baibuli obuyahandiikirwe, ibara Yahwe lyalimu emirundi nka 7,000!—Okuruga 3:15; Zabuli 83:18.
3. Yahwe aina omubiri, kyonka tiguli nk’ogwaitu. “Ruhanga mwoyo,” Baibuli nukwo egamba. (Yohana 4:24) Omwoyo mulingo gw’obwomezi bwa haiguru muno kukira obutwina. Busaho muntu yali arozere Ruhanga. Yahwe aikara omu iguru, kyonka asobora kurora ebintu byona. (Zabuli 11:4, 5; Yohana 1:18) Baitu, omwoyo ogurukwera nikyo kiki? Tiguli muntu nka Ruhanga. Kyonka nigo mani ga Ruhanga agakora.—Zabuli 104:30.
4. Baibuli etumanyisa emiringo ya Yahwe. Eyoleka ngu emiringo ye ekukira obukuru niyo okugonza, obwinganiza, amagezi n’obusobozi. (Ekyebiragiro 32:4, NW; Yobu 12:13; Isaya 40:26; 1 Yohana 4:8) Baibuli etugambira ngu w’ekisa, w’embabazi, muganyizi, mugabi kandi mugumisiriza. Itwe nkabana abakuhurra twina kulengaho kumwesisaniriza.—Abefeso 5:1, 2.
5. Twakwinamiire rundi twakusabire ebisisani rundi oburorraho omukuramya kwaitu? Nangwa! (Okuruga 20:4, 5) Yahwe agamba ngu twina kuramya we wenka. Tagenda kubagana kitinisa kye n’ondi wena rundi ekintu ekindi kyona. Ebisisani tibiina mani g’okutukonyera.—Zabuli 115:4-8; Isaya 42:8.
6. Tusobora tuta kumanya Ruhanga kukiraho? Omulingo ogumu nukwo kwetegereza ebintu ebiyahangire n’okubitekerezaho ekibikutumanyisa. Ebihangwa bya Ruhanga bitwoleka ngu aina amaani n’amagezi maingi muno. Turora okugonza kwe omu byona eby’akozire. (Zabuli 19:1-6; Abarumi 1:20) Omulingo ogundi hali twegera Ruhanga nuho omukwega Baibuli. Omuyo atugambira ebikukiraho okwoleka uwe Ruhanga w’amulingo ki. Kandi atugambira ebikukwata ha bigendererwa bye n’ebyagonza tukole.—Amosi 3:7; 2 Timoseo 3:16, 17.
[Ebisisani ebiri ha rupapura 5]
Twega hali Ruhanga kuruga habihangwa n’okuruga omu Baibuli