ISOMO 16
Abahereza Baina Bujunanizibwa Ki?
Myanmar
Aina ekicweka omu ruso’rokano
N’ayebembera oruso’rokano rw’okutebeza
Nibasemeza Ekyombeko ky’Obukama
Baibuli ebaza h’aboruganda ab’emiringo ebiri abatwara obujunanizibwa bw’okurolerra ekitebe Ekikristaayo, ‘abarolerezi n’abahereza.’ (Abafiripi 1:1) Buli kitebe kigira abahereza n’abagurusi. Abahereza batukonyera bata omu kitebe?
Bakonyera Abagurusi. Abahereza basobora kuba basigazi rundi basaija bakuru, abakurakuranize enkoragana enungi na Ruhanga, nibesigwa, kandi nibafaayo kuhikiriza obujunanizibwa bwabu kurungi. Bakora emirimo ey’enyahukana eyeba ebahairwe omu kitebe, kinu nikisobozesa abagurusi kwemarra ha mulimo gw’okwegesa n’okuliisa igana lya Ruhanga.
Emirimo eyibakora egasira ekitebe. Abahereza abamu baba n’obujunanizibwa obw’okutangirra boona ababa baizire omu nso’rokano. Abandi bakora ha by’amaraka, abandi bagabira ab’oruganda ebitabu, abandi bakora ha by’embalirira y’ekitebe, kandi abandi bagabira ab’oruganda ebicweka nambere baratebeza. Bakonyera n’omukurolerra ekiikaro nambere tuso’rokanira. Abagurusi basobora kubasaba kukonyera abo abakuzire omu myaka. Abahereza banu bahikiriza kurungi obujunanizibwa obuba bubahairwe, ekintu ekiretera ab’oruganda kubatamu ekitiinisa.—1 Timoseo 3:13.
Batuteraho ekyokurorraho ekirungi. Abahereza bakomwa habwokuba engeso zaabu zihikaana n’Ebyahandiikirwe. Ebicweka ebi babanabyo omu nso’rokano bigumya okwikiriza kwaitu. Ekyokurorraho ekirungi eki batuteraho omu mulimo gw’okutebeza naitwe kitukonyera kwekamba kutebeza n’amaani. Enkoragana yaabu enungi n’abagurusi erugamu okusemererwa n’obumu. (Abefeso 4:16) Obu beyongera kukurakurana nabo basobora kufooka abagurusi.
Abahereza bahikiriza bujunanizibwa ki?
Bakora mirimo ki ey’esobozesa ekitebe kwirukanizibwa kurungi?