ISOMO 15

Abagurusi Bakonyera Bata Ekitebe?

Omugurusi ow’ekitebe n’abaza n’ab’oruganda omu kitebe — Finland

Omugurusi ow’ekitebe n’ayegesa omu kitebe — N’ayegesa

Abagurusi b’ekitebe nibagarramu ab’oruganda amaani — Babungiire ab’oruganda

Omugurusi ow’ekitebe ali mubuheereza — Nibatebeza

Titwine abebembezi b’ediini abasasurwa omusaara baitu nkoku kyabaire omu kitebe ky’Abakristaayo ababandize, ab’oruganda abaina engeso ezirukuhikaana kurungi n’Ebyahandiikirwe hali abagarusi, bakomwa ‘kuliisa ekitebe kya Ruhanga.’ (Engeso 20:28) Abagurusi banu abebembera ekitebe baba b’oruganda abakuzire omu by’omwoyo kandi nibaliisa igana lya Ruhanga, habw’okugonza hatali habw’okuhambirizibwa, n’obukwakuba okwegomba ensagi ey’obugobya baitu habw’okugonza kuhereza. (1 Petero 5:1-3) Bakonyera bata ekitebe?

Baturolerra kandi batufaaho. Abagurusi bebembera kandi balinda ekitebe nibakonyera abantu kwikara n’enkoragana enungi na Ruhanga. Barolerra abantu ba Ruhanga omu mulingo omurungi nibaijuka ngu nuwe abahaire obujunanizibwa obu obw’amaani. (2 Abakolinso 1:24) Nkoku omuliisa afaayo ha buli emu ha ntaama ze, abagurusi nabo bafaayo kurora ngu buli omu omu kitebe bamumanyire kurungi.—Enfumo 27:23.

Batwegesa kukora ebya Ruhanga agonza. Abagurusi batwebembera tuli omu nso’rokano buli wiiki kusobora kugumya okwikiriza kwaitu. (Engeso 15:32) Batwebembera n’omu mulimo gw’okutebeza nibatutendeka kuba abatebezi abarungi.

Batugarramu amaani. Kusobora kukonyera buli omu kusigara aina enkoragana enungi na Yahwe, abagurusi batubungira omu maka gaitu, rundi babaza naitwe tugenzere omu nso’rokano nibatugumya nibakozesa Ebyahandiikirwe.—Yakobo 5:14, 15.

Oihireho emirimo y’ekitebe, baba n’ebintu ebindi ebibaina kutungira obwire nk’emirimo yaabu eyibakora kweyemerezaho, n’obujunanizibwa obundi obw’amaka. Ab’oruganda banu basemerire kuheebwa ekitiinisa habw’obwire n’amaani gaabu ebibamara nibatufaaho.—1 Abasesalonika 5:12, 13.

Abagurusi baina bujunanizibwa ki omu kitebe?
Abagurusi boleka bata ngu batufaaho?