ISOMO 20
Omulingo Ekitebe Kitekanizibwemu
Yahwe tali Ruhanga w’akavuyo. (1 Abakolinso 14:33) Nahaweki, abantu be nabo basemeriire kuba batekaniziibwe kurungi. Ekitebe Ekikristaayo kitekaniziibwe kita? Nitusobora tuta kwongera ha businguzi bwakyo?
1. Nooha arukwebembera ekitebe?
‘Kristo nuwe mutwe gw’ekitebe’ (Abefeso 5:23) Nayebembera emirimo y’abantu ba Yahwe omu nsi yoona obu ali omu iguru. Yesu akatekaho “omwiru omwesigwa kandi ow’amagezi”—enu eri guruupu entaito ey’abagurusi ey’erukumanywa nka Akatebe Akalemi. (Soma Matayo 24:45-47.) Kusisanaho n’abakwenda hamu n’abagurusi ab’omu kyasa eky’okubanza omu Yerusalemu, Akatebe akalemi kaha oburagirizi hali ekitebe eky’ensi yoona. (Engeso Ezabakwenda 15:2) Baitu abasaija banu tibali bebembezi b’ekitebe kyaitu. Baserra obuhabuzi kuruga hali Yahwe n’Ekigambo kye, kandi bahondera oburagirizi bwa Yesu.
2. Abagurusi nubo baha kandi bakora mulimo ki?
Abagurusi bali basaija Abakristaayo abakuzire omu by’omwoyo abakozesa Ebyahandiikirwe kwegesa kandi balinda abantu ba Yahwe kurabira omu kubakonyera n’okubagarramu amaani. Tibasasurwa habw’omulimo bakora. Oihireho, baheereza “begondiize omu maiso ga Ruhanga, hatali habw’okwegomba amagoba, baitu habw’okugonza kuheereza.” (1 Petero 5:1, 2, NWT) Abagurusi bakonyerwa abaheereza, kandi hanyuma y’akasumi nabo nibasobora kukurakurana bakafooka abagurusi.
Akatebe akalemi kakoma abagurusi abamu kufooka abarolerezi b’ebicweka. Babungira ebitebe ebirukwahukana kuha oburagirizi n’okubigarramu amaani. Bataho abagurusi n’abaheereza, nibasigikirra ha buragirizi obuli omu Baibuli.—1 Timoseo 3:1-10, 12; Tito 1:5-9.
3. Buli omu ha Bakaiso ba Yahwe aine bujunanizibwa ki?
Boona abali omu kitebe ‘bakugiza ibara lya Yahwe’ kurabira omu kwejumbira omu nsorrokano ez’ekitebe hamu n’okwejumbira omu buheereza kusigikirra ha nyikara zabo.—Soma Zabuli 148:12, 13.
YEGA EBIRUKUKIRAHO
Manya Yesu mwebembezi wa mulingo ki, omulingo abagurusi balengaho kuhondera ekyokurorraho kye, n’omulingo tusobora kukorra hamu na Yesu n’abagurusi.
4. Yesu mwebembezi ow’embabazi
Yesu naturaaliza kwija hansi y’obwebembezi bwe. Musome Matayo 11:28-30, hanyuma mubazeeho ekikaguzo kinu:
Abantu abali hansi y’obwobembezi bwa Yesu behurra bata?
Abagurusi bahondera bata ekyokurorraho kya Yesu? Mutekeho VIDIYO.
Baibuli eyoleka omulingo abagurusi basemeriire kukoramu emirimo yabo.
Musome Isaya 32:2 na 1 Petero 5:1-3, hanyuma mubazeeho ebikaguzo binu:
Nikikuletera kwehurra ota kumanya ngu nka Yesu, abagurusi bakora ekirukusoboka kutwaza abandi omu mulingo ogw’embabazi?
Miringo ki endi abagurusi eyibolekamu ngu nibahondera ekyokurorraho kya Yesu?
5. Abagurusi bateekaho ekyokurorraho ekirungi
Yesu nagonza abagurusi barole bata omulimo gwabo? Mutekeho VIDIYO.
Yesu akooleka abo abarukwebembera omulingo basemeriire kwebemberamu. Musome Matayo 23:8-12, hanyuma mubazeeho ekikaguzo kinu:
Ndengo ki eza Baibuli abagurusi ezibahondera? Notekereza abebembezi b’amadiini bahondera Baibuli eky’egamba?
Abagurusi baikaza enkoragana yabo na Yahwe egumire kandi bakonyera n’amaka gabo kukora ekintu nikyo kimu
Abagurusi bafaaho abantu boona omu kitebe
Abagurusi batebeza butoosa
Abagurusi begesa. Ekindi bakonyera omu kuyonja n’emirimo endi
6. Nitusobora kukorra hamu n’abagurusi
Baibuli etuha ensoga enkuru habwaki tusemeriire kukorra hamu n’abagurusi. Musome Abaheburaniya 13:17, hanyuma mubazeeho ebikaguzo binu:
Ky’amagezi Baibuli kutwekambisa kuhurra n’okworobera abo abarukwebembera omu kitebe? Habwaki?
Musome Luka 16:10, hanyuma mubazeeho ekikaguzo kinu:
Habwaki tusemeriire kworobera abagurusi n’omu bintu ebirukuzooka nk’ebitaito?
ABANTU ABAMU BAGAMBA: “Tikirukwetagisa kuba omu diini.”
Habwaki n’otekereza ngu kirungi kuheereza Ruhanga obu oli kicweka ky’ekitebe kye?
OYEGERE KI?
Yesu nuwe mutwe gw’ekitebe. N’okusemererwa tukorra hamu n’abagurusi abali hansi y’obusobozi bwa Yesu habw’okuba batutwaza omu mulingo ogw’embabazi kandi batuteraho ekyokurorraho ekirungi.
Kweijukyamu
Noha arukwembembera ekitebe?
Abagurusi bakonyera bata ekitebe?
Buli omu ha Bakaiso ba Yahwe aine bujunanizibwa ki?
SERULIIRIZA
Rora obwakaiso oburukwoleka omulingo Akatebe Akalemi hamu n’abagurusi bafaaho muno Abakristaayo kasumi kanu.
Kugarramu ab’Oruganda Amaani Nambere Omulimo Gwaitu Gutangirwe 4:22
Manya omulimo abaroleerezi b’ebicweka bakora.
Somaho omulimo omukuru abakazi ogubaine omu kitebe.
“Omu Bakaiso ba Yahwe Harumu Abatebezi Abakazi?” (Watchtower, eya Sebutemba 1, 2012)
Manya omulingo abagurusi bekamba kugarramu Abakristaayo bagenzi babo amaani.
“Abagurusi b’Ekitbe—Bakozi Bataahi Baitu omu Kusemererwa Kwaitu” (Watchtower, eya Janwali 15, 2013)