‘Yeta Abagurusi b’Ekitebe’

1. Yahwe ayolekere ata ngu abaheereza be b’omuhendo muno hali uwe?

ABAHEEREZA ba Yahwe b’omuhendo muno hali uwe. Akahayo omwana we w’omuhendo habwabo kandi yaha abagurusi obujunaanizibwa obw’okubarolerra. (Ebik. 20:28) Ruhanga naagonza abaheereza be batwazibwe omu mulingo gw’embabazi. Abagurusi bahondera obwebembezi bwa Yesu kandi bakoonyera abaheereza ba Yahwe kwikara baine enkoragana enungi na Yahwe.—Is. 32:​1, 2.

2. Nibaha Yahwe abaakira kufaaho muno? (Ezekyeri 34:​15, 16)

² Yahwe afaaho abaheereza be boona, baitu akira muno kubafaaho obu baba nibabonabona. Abamu nibasobora kuba nibabonabona habw’ensobi ezi baakozere, kandi Yahwe akozesa abagurusi kubakoonyera. (Soma Ezekyeri 34:​15, 16.) Baitu nabwo naagonza niitwe tubanze kugira eki twakoraho kuserra obukoonyezi obu turukuba nitubwetaaga. Tarukugonza tugarukire ha kumusaba obukoonyezi kuraba omu saara zaitu kyonka, baitu naagonza tuserre n’obukoonyezi ‘obw’abaliisa n’abeegesa’ ab’omu kitebe.—Bef. 4:​11, 12.

3. Nitusobora kugasirwa tuta kuraba omu kwegaho obujunaanizibwa bw’abagurusi b’ekitebe?

³ Omu kicweka kinu nitwija kurora enteekaniza Ruhanga ei ataireho kusobora kutukoonyera kutunga obukoonyezi obw’eby’omwoyo kuraba omu bagurusi. Nitwija kugarukamu ebikaguzo binu bisatu: Ni di obu tusemeriire kusaba abagurusi obukoonyezi? Habwaki tusemeriire kukikora? Kandi batukoonyera bata? Obundi kasumi kanu enkoragana yaitu na Yahwe neesobora kuba egumire, baitu eby’okugarukamu by’ebikaguzo binu nibiija kutukoonyera kweyongera kusiima enteekaniza Ruhanga ataireho, kandi kiro kimu obu tuliba nituserra obukoonyezi tuliba tumanyire eky’okukora.

NI DI OBU TUSEMERIIRE ‘KWETA ABAGURUSI’?

4. Habwaki nitugamba ngu Ebyahandiikirwe ebiri omu Yakobbo 5:​14-16, 19, 20 nibibazaaho oburwaire obw’eby’omwoyo? (Rora n’ebisisani.)

⁴ Omwegeswa Yakobbo akasoborra omulingo Yahwe atukoonyeramu naakozesa abagurusi. Akahandiika ati: “Haroho omuntu weena anyakurwaire? Leka ayete abagurusi b’ekitebe.” (Soma Yakobbo 5:​14-16, 19, 20.) Ebigambo ebyetoroire orukarra oru nibyoleka ngu Yakobbo akaba naabazaaho abarwaire omu by’omwoyo. Ekyokurorraho, akagambira anyakurwaire kweta abagurusi hatali dakitaali. Ekindi, Yakobbo akasoborra ngu omuntu omurwaire akizibwa, obu aganyirwa ebibi bye. Omu nyikara ezimu, ebintu ebyetaagisibwa kukoonyera omuntu ow’arwaire omu by’omwoyo nibisisana n’ebi ebyetaagisibwa kukoonyera omuntu ow’arwaire oburwaire obw’omubiri. Obu tuba turwaire oburwaire obw’omubiri, tugenda hali dakitaali, tumusoborra obwokurorraho bw’oburwaire bwaitu kandi hanyuma tuhondera ebi, ebi aba aturagiire kukora. Omu mulingo nugwo gumu, obu tuba turwaire omu by’omwoyo, tusemeriire kugenda hali omugurusi, tumusoborre enyikara yaitu kandi hanyuma tute omu nkora obuhabuzi obu araatuha oburukusigikirra ha Byahandiikirwe.

5. Nitusobora kumanya tuta enkoragana yaitu na Yahwe obu eraaba eriyo neeceka?

⁵ Enteekaniza ey’erukubazibwaho omu Yakobbo ensuura 5 neetwekambisa kuhikirra abagurusi obu twehurra ngu nitusobora kuba turwaire omu by’omwoyo. Baitu kikira kuba kikuru muno kusaba abagurusi obukoonyezi tutakafeeriirwe enkoragana yaitu na Ruhanga! Tusemeriire kukiikiriza ngu nitwetaaga obukoonyezi. Baibuli etutererra ngu kakuba tuteegendereza, nitusobora kuteekereza ngu twine enkoragana enungi na Ruhanga kandi kunu tikiri nukwo kiri. (Yak. 1:22) Abakristaayo abamu ab’omu kyasa eky’okubanza ab’omu Sadisi bakakora ensobi niyo emu, baitu Yesu akabagambira ngu bakaba batakyasemeza Yahwe. (Kus. 3:​1, 2) Omulingo gumu ogu tusobora kumanya obu turaaba tuli boomeezi omu by’omwoyo, nukwo kulengesaniza obwekambi obu tukaba twine kara, n’obwekambi obu twine hati. (Kus. 2:​4, 5) Nitusobora kwekaguza: ‘Ninkyayegondeza omu kusoma Baibuli n’okugyecumiitirizaaho nkooku nakoraga kara? Ngenda omu nsorrokano zoona kandi mba nziteekaniize? Ninkyayekambira obuheereza nkooku nakoraga kara? Ninkyayebembeza ebintu eby’omwoyo kukira sente?’ Eky’okugarukamu kyawe hali ebikaguzo binu obu kiraaba kiri nangwa, nikisobora kumanyisa ngu oine obuceke kandi kakuba otagira eki wakoraho, nihasobora kurugamu ekibi eky’amaani. Obu turaaba tutasobora kumaraho obuceke bunu habwaitu, rundi obu buraaba bumazire ira kutuleetera kucwa endengo za Ruhanga, tusemeriire kusaba abagurusi obukoonyezi.

6. Kiki abo abakozere ekibi eky’amaani eki basemeriire kukora?

⁶ Abo abakozere ekibi eky’amaani ekisobora kubaleetera kwihwa omu kitebe, basemeriire kubaza n’abagurusi. (1 Kol. 5:​11-13) Abo ababa bakozere ekibi eky’amaani, baba nibeetaaga obukoonyezi kugarraho enkoragana yabo na Yahwe. Yahwe kusobora kutuganyira kuraba omu kicunguro, tusemeriire “kukora ebikorwa ebirukwoleka ngu [twegarukiremu].” (Ebik. 26:20) Ebikorwa ebi nibitwarramu kuhikirra abagurusi obu tuba tukozere ekibi eky’amaani.

7. Oihireho abo abakozere ekibi eky’amaani, nibaha abandi abarukwetaaga obukoonyezi bw’abagurusi?

⁷ Abagurusi tibagarukira ha kukoonyera abo ababa bakozere ekibi eky’amaani, baitu bakoonyera n’abo ababa bacekere omu by’omwoyo. (Ebik. 20:35) Ekyokurorraho, noosobora kuba otiinire habwokuba olemerwe kusingura okwegomba okubi. Nikisobora kukugumira kukira muno obu oraaba okaba nookozesa ebitokooza bwongo, noorora ebisisani by’orwanju, rundi nooyejumbira omu busiihani obu okaba otakeegere amananu. Obu oraaba oli omu nyikara egi, otatiina kusaba obukoonyezi. Noosobora kubaza n’omugurusi ow’arukukwanguhira, kandi naija kukuha obuhabuzi kandi akugumye ngu noosobora kusemeza Yahwe kakuba oyanga kukorra ha kwegomba kwawe okubi. (Mug. 4:12) Obu oraaba nooyehurra ohoirwemu amaani habw’okwikara noorwanisa okwegomba okubi, abagurusi nibaija kukwijukya ngu kinu nikisobora kuba nikyoleka ngu nootwara enkoragana yaawe na Yahwe nk’ekintu ekikuru kandi nooyetantara kweyesiga ekihinguraine.—1 Kol. 10:12.

8. Tusemeriire kugambira abagurusi buli nsobi yoona ei tuba tukozere? Soborra.

⁸ Tikirukutwetaagisa kugambira abagurusi buli nsobi yoona ei tuba tukozere. Ekyokurorraho, kakuba obaliza ow’oruganda rundi munyaanya itwe ekintu ekirukusaaliza obundi okakwatwa n’ekiniga. Omu kiikaro ky’okugenda hali abagurusi, noosobora kuta omu nkora obuhabuzi bwa Yesu oburukukwata ha kugarraho obusinge hagati yaawe n’ow’oruganda rundi munyaanya itwe. (Mat. 5:​23, 24) Noosobora nookukora okuseruliiriza ha miringo enungi nk’obuculeezi, okugumiisiriza hamu n’okwetanga nukwo esobole kukukoonyera omu kasumi ak’omumaiso. Obu oraaba okyalemerwe kumaraho ekizibu, noosobora kusaba omugurusi obukoonyezi. Omu bbaruha Paulo ei yahandikiire Abafiripi, akasaba ow’oruganda ow’atamanyirwe ibara kukoonyera Ewodiya na Suntuke kumaraho obuteetegerezangana bwabo, na iwe, omugurusi omu kitebe kyawe naasobora kukukoonyera omu mulingo nugwo gumu.—Baf. 4:​2, 3.

HABWAKI TUSEMERIIRE KWETA ABAGURUSI?

9. Habwaki tutasemeriire kwikiriza ensoni kutulemesa kweta abagurusi? (Enfumo 28:13)

⁹ Nitwetaaga okwikiriza n’obumanzi kusobora kusaba abagurusi obukoonyezi obu turukuba tukozere ekibi eky’amaani rundi obu twehurra ngu tulemerwe kusingura obuceke bwaitu. Tutaikiriza ensoni kutulemesa kweta abagurusi. Habwaki? Habwokuba obu tuhondera enteekaniza ya Yahwe, twoleka ngu nitumwesiga kandi nitwesiga oburagirizi bwe obutukoonyera kwikara tuli boomeezi kandi tugumire omu kwikiriza. Ekindi, tuba nitwoleka ngu nitwetaaga obukoonyezi bwe kusobora kwikara nitukora ekihikire. (Zab. 94:18) Kandi obu turaaba tukozere ekibi, Ruhanga naija kutuganyira kakuba tukyatura kandi tukakireka.—Soma Enfumo 28:13.

10. Kiki ekisobora kubaho kakuba tulengaho kusereka ebibi byaitu?

¹⁰ Obu tuserra obukoonyezi hali abagurusi, Yahwe atuganyira ebibi byaitu kandi twongera tutunga enkoragana enungi na uwe. Baitu obu tusereka ebibi byaitu, enyikara yaitu eyeyongerra kimu kusiisikara. Omukama Daudi obu yalengereho kusereka ebibi bye, akabonabona omu by’omwoyo, omu nyehurra, n’omu by’omubiri. (Zab. 32:​3-5) Tweyongera kuhurra obusaasi obu twikaraho kujanjaba oburwaire obu tuba tutungire, omu mulingo nugwo gumu enyikara eyeyongera kusiisikara obu twikaraho kusaba abagurusi obukoonyezi obu tuba tukozere ekibi eky’amaani. Kandi eki Yahwe akimanyire, egi niyo ensonga habwaki naaturaaliza kwija ‘kuteerekereza ensonga’ hamu na uwe kuraba omu kukozesa enteekaniza ey’ataireho kutukoonyera kukizibwa omu by’omwoyo.—Is. 1:​5, 6, 18.

11. Abandi nibasobora kukwatwaho bata kakuba tusereka ebibi eby’amaani?

¹¹ Kakuba tukora ekibi eky’amaani kandi tukalengaho kukisereka, nikisobora kukwataho abandi. Nikisobora kutangira omwoyo gwa Yahwe kukora omu kitebe kyona kandi kimaraho obusinge hagati y’ab’oruganda na banyaanya itwe. (Bef. 4:30) Nahabweki, kakuba tukyetegereza ngu omuntu omu kitebe akozere ekibi eky’amaani, tusemeriire kumutererra kubazaaho ensonga egi n’abagurusi.a Kakuba tusereka ekibi ky’amaani eky’omuntu akozere, na itwe kituleetera kuba basiisi omu maiso ga Yahwe. (Lev. 5:1) Okugonza oku twinire Yahwe kusemeriire kutuleetera kurugayo tukabaza amananu. Obu tukikora, tuba nitukoonyera ekitebe kwikara kiri kyecumi kandi tukoonyera omuntu ow’aba ahabire kwongera kutunga enkoragana enungi na Yahwe.

ABAGURUSI BATUKOONYERA BATA?

12. Abagurusi bakoonyera bata abo abacekere omu by’omwoyo?

¹² Abagurusi bahairwe oburagirizi obw’okukoonyera abo abacekere omu by’omwoyo. (1 Bas. 5:14) Obu oraaba omazire kusiisa, abagurusi nibasobora kukukaguza ebikaguzo nukwo kibakoonyere kumanya enyehurra zaawe n’enteekereza yaawe. (Nfu. 20:5) Noosobora kubakoonyera kuraba omu kubagambira amananu goona noobu kiraaba ngu kinu nikisobora kukugumira habw’obuhangwa bwawe, enyetwaza yaawe rundi noohurra ensoni habw’ekintu eki wakozere. Oteeralikirra ngu noosobora kubaza ebigambo ebitahikire. (Yob. 6:3) Abagurusi tibarukwija kwanguhiriza kukucwera omusango, baitu nibaija kukuhuliiriza n’obwegendereza kuhikya obu baraatunga amananu goona. (Nfu. 18:13) Bakimanyire ngu kugarramu abaheereza ba Yahwe amaani kitwara obwire, nahabweki tibarukunihira kugonjoora ensonga ey’egumire omurundi ogw’okubanza kubaza na iwe.

13. Abagurusi nibasobora bata kutukoonyera kuraba omu saara zaabo hamu n’obuhabuzi oburukusigikirra ha Byahandiikirwe? (Rora n’ebisisani.)

¹³ Obu orayeta abagurusi, tibarukwija kwongera ha busaasi obu oine obw’okwecwera omusango, oihireho nibaija kukusabira. Noosobora kuhunirra ‘habw’amaani amaingi’ esaara zaabo ezi gaine. Obukoonyezi bwabo nibutwarramu “[kukusiiga] amagita omu ibara lya Yahwe.” (Yak. 5:​14-16) “Amagita” nigamanyisa amananu agali omu Kigambo kya Ruhanga. Nahabweki abagurusi nibaija kukozesa Ebyahandiikirwe kuruga omu Baibuli kukugarramu amaani, kandi bakukoonyere kugarraho enkoragana yaawe na Yahwe. (Is. 57:18) Ebyahandiikirwe ebi baraakusomera nibiija kukukoonyera kucweramu kimu kukora ekihikire. Kuraba omuli bo noija kusisana nk’ow’arukuhurra iraka lya Yahwe nirigamba ngu: ‘Gunu nugwo muhanda, gugenderemu.’—Is. 30:21.

14. Kusigikirra ha Abagaratiya 6:​1, abagurusi bakoonyera bata abo ababa ‘bahabire’? (Rora n’ebisisani.)

¹⁴ Soma Abagaratiya 6:1. Omukristaayo ‘ow’ahabire’ aba atarukukora ebintu Ruhanga ebi arukugonza akole. Kuhaba nikisobora kumanyisa, kukora encwamu etali ey’amagezi, rundi kukora ekibi eky’amaani. N’okugonza, abagurusi “[balengaho] kuteereekereza omuntu ogu omu mwoyo ogw’obuculeezi.” Ekigambo eky’Oruyonaani ekihindwirwe kumanyisa “kuteereekereza” nikisobora n’okumanyisa kugarra igufa omu kiikaro kyalyo nukwo litaleetera omuntu kufooka mulema. Nkooku dakitaali ateekamu amaani kugarra igufa omu kiikaro kyalyo ataleetiire omuntu obusaasi obw’amaani, nukwo n’abagurusi bateeka omutima ha kutukoonyera kukira omu by’omwoyo batatwongiireho obusaasi. Nibaterererwa ‘kwerinda.’ Obu baba baliyo nibatukoonyera kuterekereza omuhanda gwaitu, abagurusi bakyetegereza ngu na bo tibahikiriire kandi nibasobora kuhaba. Tibeyoleka ngu bali bahaiguru muno, ngu bahikiriire, rundi kutucwera omusango, oihireho balengaho kuba b’embabazi.—1 Pet. 3:8.

15. Kiki eki tusobora kukora kakuba tuba twine ekizibu?

¹⁵ Nitusobora kwesiga abagurusi baitu ab’omu kitebe. Batendekerwe kulinda ensita, kuha obuhabuzi nibasigikirra ha Byahandiikirwe, omu kiikaro ky’okusigikirra ha nteekereza zaabo, hamu n’okutukoonyera kwetweka emigugu yaitu. (Nfu. 11:13; Bag. 6:2) Abagurusi bamazire obwire oburukwahukana nibaheereza, kandi baine n’emiringo erukwahukana, baitu eki noobu kiraaba nukwo kiri, nitusobora kuhikirra omugurusi weena kandi tukamugambira ekizibu eki turukurabamu. Baitu titusemeriire kugenda nitugambira buli mugurusi kutuha amagezi, obu nituserrayo omu ow’aratugambira ebi turukugonza kuhurra. Kakuba tukora eki, nitwija kusisana abo abaserra “abeegesa abaraabagambira ebi barukugonza kuhurra” omu kiikaro ky’okwega “enyegesa ezihikire” ez’omu Baibuli. (2 Tim. 4:3) Kakuba tuhikirra omugurusi tukamugambira ekizibu eki turukurabamu, naasobora kutukaguza obu turaaba twine omugurusi ondi weena ou tugambiireho, n’obuhabuzi obu atuhaire. Kandi habwokuba omugurusi muculeezi, naasobora kukaguzaaho omugurusi ondi kumuha obuhabuzi.—Nfu. 13:10.

OBUJUNAANIZIBWA BWAITU

16. Bujunaanizibwa ki buli omu hali itwe obu aine?

¹⁶ Noobu kiraaba ngu abagurusi batulinda, tibatukorra encwamu. Buli bujunaanizibwa bwaitu kuheereza Yahwe n’obwesigwa. Nitujunaanizibwa hali Ruhanga habw’ebigambo byona ebi tubaza hamu n’ebikorwa byaitu. Habw’obukoonyezi bwe, nitusobora kuba abasinguzi obu nitulinda obwesigwa bwaitu. (Bar. 14:12) Nahabweki omu kiikaro ky’okutugambira eky’okukora, abagurusi batukoonyera kuteeka omutima ha nteekereza ya Ruhanga nkooku erukwolekwa omu Kigambo kye. Kuraba omu kuhondera obuhabuzi obu baba batuhaire oburukusigikirra ha Byahandiikirwe, nitusobora kutendeka “obusobozi [bwaitu] obw’okwetegereza” ekiraatukoonyera kukora encwamu ez’amagezi.—Baheb. 5:14.

17. Kiki eki tusemeriire kucweramu kimu kukora?

¹⁷ Mali ka mugisa gw’amaani kuba abaheereza ba Yahwe! Yahwe akasindika “omuliisa omurungi,” kandi ogu nuwe Yesu, kuhayo ekicunguro habwaitu nukwo tutunge omugisa ogw’okwomeera ebiro n’ebiro. (Yoh. 10:11) Kandi kuraba omu kukozesa abagurusi ab’omu kitebe, Yahwe ahikiriize omurago gwe ogurukugamba ngu: “Ndibaha abalisa nkomutima gwange okuguli, abalibalisa nokumanya nokwetegereza.” (Yer. 3:15) Kakuba tuba turwaire omu by’omwoyo rundi tucekere, tusemeriire kwanguha kweta abagurusi kutukoonyera. Leka tucweremu kimu kugasirwa omu bwijwire omu nteekaniza Yahwe ei ataireho ey’okuserra obukoonyezi omu bagurusi b’ekitebe.