Ekigendererwa kya Ruhanga Hali Ensi Nikyo Kiraha?

1. Habwaki Ruhanga y’ahangire ensi?

Yahwe akahanga ensi ikarwemu abantu. Adamu na Hawa batahangwe kwikara omu iguru habwokuba Ruhanga iguru yali amazire kuliha abamaraika. (Yobu 38:4, 7) Baitu Ruhanga akatekaniza orugonjo orurungi Adeni, nuho y’ataire omusaija ayabandize. (Okubanza 2:15-17) Ruhanga akaha Adamu n’oruzaaro rwe omugisa gw’okwikara omu nsi ebiro byoona.​—Soma Zabuli 37:29; 115:16.

Ha kubanza, Adeni hoonka nuho habaire orugonjo orurungi. Adamu na Hawa baali baina kuzaara abaana baijuze ensi, nahabwekyo baali baina kulima ensi yoona bagifoole orugonjo orurungi. (Okubanza 1:28) Ensi enu terihwerekerezebwa, abantu baina kugiikaramu ebiro n’ebiro.​—Soma Zabuli 104:5.

Rora vidiyo Habwaki Ruhanga Yahangire Ensi?

2. Baitu habwaki ensi etali rugonjo orurungi hati?

Ruhanga, akabinga Adamu na Hawa omu rugonjo habwokuba batamworobere. Bakafeerwa orugonjo orurungi kandi busaho n’omu arasoboire kurugarraho. Baibuli egamba: “Ensi ehairweyo omu mukono gwababi.”—Yobu 9:24.​—Soma Okubanza 3:23, 24.

Hati obu tugambe ngu ekigendererwa ekya Yahwe akya kara akakirugaho? Nangwa! titurukusobora kugamba tuti habwokuba Nuwe w’obusobozi bwona kandi Tarukusobora kulemwa. (Isaya 45:18) Naija kuhikiriza ekigendererwa kye eky’abantu abahikirire kwikara omu nsi, omu mulingo y’akitekanize kuruga kara.​—Soma Zabuli 37:11, 34.

3. Orugonjo orurungi ruragarurwaho ruta?

Nihaija kubaho obulemu oburukwetwa Haramagedoni, nambere Yesu aija kwebembera abamaraika kuhwerekereza abantu boona abanyakuhakaniza Ruhanga. Hanyuma y’ekyo, Yesu naija kuboha Setani omu nkomo kumara emyaka 1,000. Abantu ba Ruhanga nibaija kujunwa bali hansi y’obwebembezi n’obuliinzi bwa Yesu, batunge obwomezi obutahwaho omu ntekaniza empyaka hanu omu nsi. Obu ensi yoona niija kufooka rugonjo rurungi.​—Soma Okusuku’rwa 20:1-3; 21:3, 4.

4. Okubonabona kulihwaho ddi?

Ruhanga aramaraho ddi ebintu ebibi ebiri omu nsi? Enu niyo manyikirizo Yesu y’ahaire ey’akwolekere ngu empero eri haihi. Ebintu ebibi ebiroho omu nsi hati nibyoleka ngu mali tuli ‘ha mpero ye ntekaniza enu ey’ebintu.’​—Soma Matayo 24:3, 7-14, 21, 22.

Yesu obwaraaba ali omu iguru n’alema ensi habw’akasumi k’emyaka 1,000, naija kumaraho okubonabona kwoona. (Isaya 9:6, 7; 11:9) Oihireho kuba Mukama, naija kandi kukora nka Nyakatagara Omukuru aiheho ebibi by’abo abagonza Ruhanga. Ruhanga naija kukozesa Yesu kumaraho endwaire, okukaikura, n’okufa.​—Soma Isaya 25:8; 33:24.

5. Nibaha abaraikara omu rugonjo orurungi?

Abantu aborobera Ruhanga nibo abaraikara omu rugonjo. (1 Yohana 2:17) Yesu akatuma abahondezi be kuserra abantu abaculezi babegese omulingo gw’okukorramu Ruhanga eby’agonza. Omu kasumi kanu Yahwe n’ayegesa abantu ebintu ebirabasobozesa kwikara omu rugonjo rwe omu nsi. (Zefaniya 2:3) Nambere Abakaiso ba Yahwe baso’rokanira abantu nibegesebwa omulingo barukusobora kufooka banyineka, bataata, abanyinabwenge n’abamaama abarungi. Abazaire baramya Ruhanga bali hamu n’abaana baabu kandi begesebwa omulingo barukusobora kugasirwa omu makuru amarungi.​—Soma Mika 4:1-4.