Yesu Kristo Nuwe Oha?

1. Obwomezi bwa Yesu bukatandika buta?

Yesu nuwe omuzigaijo omu bihangirwe bya Ruhanga byoona. Yaikaraga omu iguru nk’omuntu ow’omwoyo rundi maraika atakabaire kuzarwa omu nsi. (Yohana 8:23) Nuwe yabandize kuhangwa, kandi akakonyera Ruhanga kuhanga ebintu ebindi. Nuwe wenka Yahwe y’ayehangiire nahabwekyo kihikire kumweta Omwana wa Ruhanga ayazairwe “omu wenka.” (Yohana 1:14) Ayetwa “Kigambo habwokuba Ruhanga ak’amukozesa nk’omugambi we.”​—Yohana 1:14; Soma Enfumo 8:22, 23, 30; Abakolosai 1:15, 16.

2. Habwaki Yesu y’aizire omu nsi?

Ruhanga akatuma Omwana we kuruga omu iguru kwija omu nsi n’ateka obwomezi bwe omu nda ya Malyamu omukazi Omuyudaaya, ayaali atamanyire musaija. Nahabwekyo Malyamu kuzaara Yesu atabanze kuterana n’omusaija. (Luka 1:30-35) Yesu akaija (1) kutwegesa amananu agarukukwata hali Ruhanga, (2) kutwoleka nkoku tusemerire kuhikiriza Ruhanga eby’agonza gonze twina ebizibu, (3) n’okuhayo obwomezi bwe obuhikirire ‘nk’ekicunguro.’​—Soma Matayo 20:28.

3. Habwaki nitwetaaga ekicunguro?

Ekicunguro nugwo muhendo oguheebwayo kusumurra omuntu kuruga omu kufa. (Okuruga 21:29, 30) Okukaikura n’okufa bitabe omu ntekaniza ya Ruhanga eya kara. Ekyo tukimanya tuta? Ruhanga akagambira Adamu omusaija ayabandize ngu, obu y’akukozere “ekibi,” yakufiire. Nahabwekyo kakuba Adamu atarakozire ekibi, tiyakufiire. (Okubanza 2:16, 17; 5:5) Okusigikirra ha Baibuli, okufa kukahika ha bantu nikukaraba omu Adamu. Omu mulingo ogu, Adamu akagwetera abaana be boona ekibi n’okufa. Nitwetaaga ekicunguro tusobole kusumururwa kuruga omu kufa.​—Soma Abarumi 5:12; 6:23.

Nooha ay’akutusasulire ekicunguro? Obu tufa, tuba tusasulire ekibi kyaitu kyoonka. Busaho muntu wena atahikirire arukusobora kusasurra ebibi by’abantu abandi.​—Soma Zabuli 49:7-9.

4. Habwaki Yesu y’afiire?

Butasisanaho itwe, Yesu we yali ahikirire. Kyali kitarukumwetagisa kufa kusasurra ebibi bye habwokuba atakole kibi kyoona. Baitu Yesu akafa ha bw’ebibi byaitu. Ruhanga akoleka abantu okugonza n’ahayo Omwana we kutufeera. Yesu nawe akatwoleka okugonza n’ayorobera Ise kandi n’aikiriza kuhayo obwomezi bwe habw’ebibi byaitu.​—Soma Yohana 3:16; Abarumi 5:18, 19.

Rora vidiyo Habwaki Yesu Yafiire?

5. Yesu n’akora ki omu kasumi kanu?

Yesu obw’akaba ali omu nsi akakiza abarwaire, y’ahumbura abafu, y’akonyera n’abaali omu buzibu. Omu mulingo ogu akoleka eby’alikorra abantu abahulizi omu kasumi ak’omu maiso. (Matayo 15:30, 31; Yohana 5: 28) Hanyuma y’okufa, Ruhanga akamuhumbura nk’omuntu ow’omwoyo. (1 Petero 3:18) Akalindiirra ha mukono gwa Ruhanga ogw’obulyo kuhika obu y’amuhaire obusobozi kulema ensi nk’Omukama. (Abaheburaniya 10:12, 13) Omu kasumi kanu Yesu ali omu iguru n’alema nk’Omukama, kandi abahondezi be nibamanyisa amakuru ganu amarungi omu nsi yoona.​—Soma Danieri 7:13, 14; Matayo 24:14.

Omu kasumi akatali kahara, Yesu n’aija kukozesa obusobozi bwe nk’Omukama kumaraho okubonabona n’okuhwerekereza abo abakuleta. Boona abarukumwikiririzamu kandi nibamworobera, nibaija kutunga obwomezi obutahwaho omu rugonjo orurungi.​—Soma Zabuli 37:9-11.