Amakuru Amarungi Mali Garuga Hali Ruhanga?

1. Noha Y’ahandiikisize Baibuli?

Amakuru amarungi ag’arukwoleka ngu abantu nibaija kwikara omu nsi ebiro byoona g’ahandiikirwe omu Baibuli. (Zabuli 37:29) Omu Baibuli harumu ebitabu ebitaitotaito 66. Ruhanga akakozesa abasaija abesigwa 40 kubihandiika. Ebitabu ebitanu eby’okubanza bikahandiikwa Musa, emyaka nka 3,500 erabireho. Kandi ekitabu eky’okumalirra kikahandiikwa omukwenda Yohana, emyaka nka 1,900 ehingwireho. Abahandiiki ba Baibuli bakahandiika ebitekerezo byoha? Ruhanga y’abamanyisaaga eby’okuhandiika n’akozesa omwoyo ogurukwera. (2 Samuiri 23:2) Bakahandiika ebitekerezo bya Ruhanga hatali ebyaabu. Nahabwekyo Ruhanga nuwe y’ahandiikisize Baibuli.​—Soma 2 Timoseo 3:16; 2 Petero 1:20, 21.

Rora vidiyo Noha Ayahandikisize Baibuli?

2. Nitusobora tuta kukigumya ngu ebiri omu Baibuli nugo mananu?

Nitukigumya ngu Baibuli Kigambo kya Ruhanga habwokuba etugambira bingi ebikwatiraine n’obusumi obw’omu maiso, kandi omu buhikirire bwabyo. Busaho muntu wena arukusobora kukora ekyo. (Yosuha 23:14) Ruhanga ow’Obusobozi bwoona nuwe wenka arukusobora kumanya omulingo obusumi bw’omuntu obw’omu maiso buraaba.​—Soma Isaya 42:9; 46:10.

Twakunihiire ekitabu ekirukuruga hali Ruhanga kuba kiri ky’embaganiza. Baibuli ezirukukira omu buhumbi zigabirwe omu endimi nyingi. Gonze y’ahandiikirwe ira, n’ikiraniza n’enyegesa ya sayansi. N’ebi abasaija 40 bahandiikire nibikiraniza.a Ebyo ebiri omu Baibuli nibyoleka engonzi z’ogu ay’agituhaire, kandi nibisobora kuhindura obwomezi bw’abantu. Ebintu ebyo nibyo biretera abantu kukigumya ngu Baibuli Kigambo kya Ruhanga.​—Soma 1 Abasesalonika 2:13.

Rora vidiyo Nitusobora Tuta Kugumya ngu Baibuli Ehikire?

3. Bintu ki ebirukusangwa omu Baibuli?

Baibuli eyoleka ngu Ruhanga aina ekigendererwa ekirungi habw’abantu. Ebyahandiikirwe byoleka omulingo omuntu y’aferirwe omugisa gw’okwikara omu rugonjo orurungi n’omulingo nkoku orugonjo oru ruragarurwaho.​—Soma Okusuku’rwa 21:4, 5.

Ekigambo kya Ruhanga kirumu ebiragiro, emisingi, n’okuhabura. Baibuli etwoleka omulingo Ruhanga nkoku y’akoraganaga n’abantu abaira—ekitukonyera kumanya ali muntu wa mulingo ki. Baibuli etukonyera kumanya Ruhanga kurungi, n’omulingo nkoku turukusobora kufooka nganjani ze.​—Soma Zabuli 19:7, 11; Yakobo 2:23; 4:8.

4. Kiki ekirukusobora kukukonyera kwetegereza Baibuli?

Akatabu kanu nikaija kukukonyera kwetegereza Ebyahandiikirwe omu mulingo ogurukusisana ogwa Yesu y’akozesaaga. Y’ajuliizaga ebyahandiikirwe kandi n’asobo’ra ‘n’amakuru gaabyo.’​—Soma Luka 24:27, 45.

Tiharoho biingi ebirukusemeza kukira amakuru amarungi kuruga hali Ruhanga, baitu abantu baingi tibagafaaho kandi tibagasemererwa. Ekyo kitakumaramu amaani. Kirungi kukiijuka ngu kusobora kutunga obwomezi obutahwaho, nikisigikirra ha kumanya Ruhanga.​—Soma Yohana 17:3.