Kulinda Enkoragana Enungi n’Abanyabuzaale Baawe

Obu mutaha obuswere mutandikaho amaka gaanyu ha bwanyu. Gonze oine kusigara n’ogonza kandi n’otamu bazaire baawe ekitiinisa, mukazi waawe rundi musaija waawe nuwe osemerire kutwara nk’arukukirayo omu bwomezi bwawe hati. Kinu abamu ha banyabuzaale baawe basobora butakyetegereza. Baitu Baibuli esobora kukukonyera kusigaza enkoragana enungi n’abanyabuzaale baawe.

1 ABANYABUZAALE BAAWE BATEMU EKITIINISA

BAIBULI EGAMBA: “Otinege ‘so na nyoko.” (Abefeso 6:2) Nobworaaba okuzire, abazaire baawe osemerire kusigara n’obaheereza ekitiinisa. Buli omu asemerire kukiijuka ngu mutahi we akyaina obujunanizibwa hali bazaire be. “Okugonza tikuba nihali,” nahabwekyo enkoragana eroho hagati ya mutahi waawe n’abazaire be etakweraliikiriza.—1 Abakolinso 13:4; Abagaratiya 5:26.

EKY’OKUKORA:

• Werinde embaza nk’enu, “abazaire baawe bangaya” rundi “busaho eki nkora maama waawe akakisiima”

• Otagwera orubaju, mutahi waawe nauwe muhulirize

2 MUCWEMU NAMBERE ABAZAIRE BAINE KUGARUKIRA

BAIBULI EGAMBA: “Omusaija nikyo alilekera ise na nyina, aterane na mukazi we nabo baliba omubiri gumu.” (Okubanza 2:24) Abazaire baanyu obundi bahura nibakyabainaho obujunanizibwa. Bagonza kusigara nibabacweramu ebintu bimu gonze mumazire kuswerwa.

Kirungi kucwamu nambere abazaire baanyu basemerire kugarukira kandi mukabagambira. Murole omulingo omurungi ogw’okubagambiramu kitabasaliza. (Enfumo 15:1) Okwebundaaza, obuculeezi n’okugumisirizangana biija kubakonyera kulinda enkoragana enungi n’abanyabuzaale baanyu.—Abefeso 4:2.

EKY’OKUKORA:

• Kakuba okirora ngu abazaire baanyu nibataha omu buli nsonga ey’amaka gaanyu, mutunge obwire oburungi mukibazeeho

• Mwikiranize omulingo murakwatamuga ensonga ezikwatiraine n’abazaire baanyu