Daudi na Saulo

Daudi obu yamazire kwita Goliasi, Omukama Saulo akamufoora mukuru w’ihe lya Isareri. Daudi akasingura obulemu bwingi kandi yafooka muntu ruranganwa. Buli murundi Daudi yarugaga omu bulemu, abakazi barugaga omu maju gabo nibazina kandi nibacekeca nibagamba ngu: ‘Saulo aisire enkumi, kandi Daudi aisire enkumi n’enkumi!’ Saulo akakwatirwa Daudi ihali kandi yagonza kumwita.

Daudi akaba amanyire kuteera kurungi enanga. Kiro kimu Daudi obwakaba natera enanga omu maiso g’omukama Saulo, omukama akamucumira icumu. Baitu Daudi akalyehugura kandi icumu lyakwata ekisiika. Saulo akalengaho kwita Daudi emirundi nyingi. Obwire bukahika Daudi yairuka yagenda kwesereka omu irungu.

Saulo akatunga ihe ly’abasaija 3,000 bagenda kuhiiga Daudi. Akataaha omu bwingira nambere Daudi n’abasaija be bakaba beserekere. Abasaija ba Daudi bakamugambira mpora ngu: ‘Gunu nugwo mugisa ogw’otungire kwita Saulo.’ Daudi akasobasoba nambere Saulo akaba ali yasaraho akacweka ha rugoye rwe. Saulo atakyetegereze. Hanyuma y’obwire, Daudi akehurra kubi muno habwokuba akaba atatairemu ekitiinisa omukama akaba akomerwe Yahwe. Ataikirize abasaija be kukora kubi Saulo. Kandi Saulo obu yaturukire omu bwingira, Daudi akaimukya iraka yamugambira nk’oku akaba atungire omugisa gw’okumwita baitu yamuganyira. Saulo obu yakimanyire, akaleka kuharana Daudi?

Nangwa. Saulo akaikara nahiiga Daudi. Kiro kimu, omu bwire bw’ekiro, Daudi na Abisai, omwana wa mugenzi we bakataaha omu nkambi ya Saulo. Abuneri, omulinzi wa Saulo nauwe atabahurre habwokuba akaba agwijagiire. Abisai akagambira Daudi ati: ‘Leka mwite habwokuba gunu nugwo omugisa ogu tutungire.’ Daudi akamugarukamu ati: ‘Yahwe nuwe amanyire ekyaramukorra. Itwe katutwale icumu lye lyonka n’ekisisi kye eky’amaizi tugende.’

Daudi akatemba ha kasozi akakaba karoleriire enkambi ya Saulo. Akatokera haiguru yagamba: ‘Abuneri, habwaki otalinzire kurungi mukama wawe? Icumu lya Saulo n’ekisisi kye biri nkaha?’ Saulo akahurra iraka lya Daudi yamanya ngu nuwe, yagamba ati: ‘Okubaire onyisire baitu onganyiire. Manyire ngu niiwe arukwija kuba mukama wa Isareri arukuhonderaho.’ Saulo akagarukayo omu kikaali kye. Baitu tikiri ngu buli muntu omu ka ya Saulo akaba anobere Daudi.