Yahwe Arwanirra Yehosafati

Omukama wa Yuda, Yehosafati akahwerekereza ebyoto bya Baali hamu n’ebisisani ebi baramyaga. Akaba n’agonza abantu bamanye ebiragiro bya Yahwe. Nahabweki, akatuma ababiito hamu n’Abalevi kugenda omu Yuda yoona kwegesa abantu ebiragiro bya Yahwe.

Amahanga agakaba gali haihi na Yuda gakatiina kurwanisa Yuda habwokuba gakaba gamanyire ngu Yahwe n’akonyera abantu be. Abantu b’amahanga ganu bakaletera Omukama Yehosafati ebisembo. Baitu kandi, Abamoabu, Abamoni, hamu n’abantu abandi abarugire Seyiri bakaija kurwanisa Yuda. Omukama Yehosafati akaba akimanyire ngu nayetaaga obukonyezi bwa Yahwe. Akeeta abantu boona, abasaija, abakazi, hamu n’abaana kwesorooleza omu Yerusalemu. Akasaba omu maiso g’abantu boona yagamba ati: ‘Ai Yahwe, titusobora kusingura tutaine obukonyezi bwawe. Tugambire eky’okukora.’

Yahwe akagarukamu okusaba kwe ati: ‘Mutatiina. Ninyija kubakonyera. Mwesimbe inywenka mwemerreho kwonka murole nk’oku ndabajuna.’ Yahwe akabajuna ata?

Ekiro ekyahondiireho, Omukama Yehosafati akaragira abazini yabagambira kukumba omu maiso gamahe. Bakakumba kuruga Yerusalemu bagenda Tekoa omu kiikaro ky’okurwaniramu.

Abazini obu baali nibakugiza Yahwe niraka erikooto, Yahwe akarwanirra abantu be. Akaletera Abamoabu hamu n’Abamoni kutandika kwitangana bonka kandi busaho n’omu ayakizire. Baitu Yahwe akalinda abantu ba Yuda, ihe, hamu n’abanyakatagara. Abantu boona abakaba bali omu mahanga agehinguliriize, bakahurra omulingo Yahwe akaba arwaniriire abantu be kandi akaba n’akyabarwanirra. Yahwe ajuna ata abantu be? Abajuna omu miringo nyingi kandi tarukwetaaga obukonyezi bw’omuntu wena kusobora kujuna abantu be.